حب نتيجة خطأ طبي

الجزء المئة و السابع و الثمانون

حب نتيجة خطأ طبي
#بارت187♡♡

سارة: اففف يااا وااش انبقا هنا بوحدي؟؟ قتلني الملل.. وداك المكلخ حتى هو فين مشا..

بانو ليها دروج ومشات طلعات الفوق باش تشوف اش كيدير! بانو ليها جوج بيوت حلات واحد ملقات فيه ومشات لتاني حلاتو غير باين بيتو..

طاح الليل
نرجعو للمغرب
بالضبط عند زمرد لي عاد خارجة من الدوش لابسة حوايجها وكتنشف شعرها باش تمشي تنعس.. دورات وجهها بان ليها منصف واقف فالبالكون شافت فيه شحال وغير تفكرات السكرتيرة لي كانت مخشية فيه وهي تخنزر فيه.. ومشات جهة الناموسية جرات عليها الغطا كتقلب على النعاس..

اما منصف لي بقا شحال كيستنشق الهواء حتى مشا الحال حس بنعاسو طاب.. وتمشا جيهة الناموسية كيشوف فزمرد لي ناعسة على ضهرها وشعرها طايح على وجهها.. تخشا حداها جر عليه ليزار وبقا مقابل مع زمرد شحال كيحيد ليها فالخصلات ديال الشعر لي طايحين على وجهها.. ويقيس فملمس وجهها الرطب وريحتها لي كتفوح مد يديه تحت خصرها جرها عندو خاشيها بين ضلوعو ويديه مضورها على ضهرها ونيفو فشعرها لي فازك كيشم فريحتو تنهد شحاال وهو ينطق بين سنانو بهمس..
"اااه ازمرد اشنو درتي فيا؟"..

مع كملها سمعها هضرات حتى هي..

زمرد تنهدات: اشنو درت...

منصف: باقي منعستي اممم..

زمرد: مبغاش اجيني نعاس..
بقاو ساكتين بجوج مخلين قلوبهم هما لي يتحدتو ويتكلمو...

صباحنا مودة ورحمة من رب العالمين..

نبداوه من عند ابطالنا...

زمرد لي ضرباتها الفيقة مع 8 ديال الصباح، مبقاش جاها نعاس وخا مقارياش بقات كتقلب شحال ضورات عينيها بان ليها منصف ناعس ابتاسمات غير بينها وبين راسها ناضت بشويا من بلاصتها باش متفيقوش.. دخلات الحمام قدات حاجتها ودارت روتينها الصباحي.. لبسات كولون فالكحل سبورتيف مع قبية من الفوق خفيفة بالكحل جمعات شعرها كودشوفال.. ودارت سبرديلة فرجليها حزماتها وتمات هابطة لتحت فالدروج..
مشات الكوزينة لقات غير الخدامة كتوجد الفطور...

زمرد: صباح الخير.. وخا تعطيني واحد قرعة ديال الما عافاك..

الخدامة(بابتسامة): صباح نور مدام... اهاه هاكي(مدات ليها القرعة من التلاجة)..

زمرد خداتها من عندها شكراتها ومشات خارجة تلقات الياقوت فالجردة فايقة وكتسقي فالغرس لي تما...
زمرد: صباح الخير خالتي فقتي؟!

الياقوت: صباح نور اه فقت.. نتي فين غادية؟

زمرد: غنمشي نجري شويا بان ليا باقي الحال ومجانيش نعاس...
لالة اليوقت حركات ليها راسها مع ابتسامة اما زمرد دارت ليكيت فودنيها ومشات غادة كتجري باش تحرك عضامها شويا...

نمشيو لفرنسا(باريس)..

عند سارة لي ناعسة فالبيت رجل فالدنيا رجل فالآخرة ناعسة ومولاها ربي.. حتى فيقها صوت الكلاب لي كينبحو حدا الدار فاقت مفزوعة حاطة يديها على قلبها اصلا من البارح وهي خايفة من صوت الحيوانات لي كتسمع والليل كامل وهي كتحلم بكوابيس شحال من مرة فاقت مخلوعة...

بقات كتستوعب مدة عاد عرفات راسها فين كاينة هي..
سارة: صباحاتو لله!! داك كحل العفطة واش غيخليني محبوسة هنا ولا شنو..

ناضت من بلاصتها وهي باقية بحوايجها ديال البارح ملقات باش تبدل مشات لواحد طواليت كانت فالكلوار غسلات وجهها وهبطات لتحت كتشوف الضو لي داخل للدار عاد وضحات ليها الصورة كتر...

حلات ريدوات حتى بانت ليها غير الشجر والخضورية والشميسة ديال الصباح ابتاسمات عزيزة عليها الطبيعة والجو ديال الصباح...

سارة: الله على بلاصة شحال زوينة.. كانت غتكون زوينة كتر كون جيت ليها بوحدي ماشي نجي مخطوفة..

صاطت بغيض حسات بكرشها كتغرغر بالجوع مشات الكوزينة جبدات البيض من التلاجة بغات دير اومليط.. وتفكرات بلي مكاينش الخبز رمات داكشي من يديها مفقوصة...

سارة: اويلي انا دبا اش غناكل البيض بوحدو و مكنعرفش نعجن اففف اما كون صاوبت الخبز لراسي..
سمعات حسو من اللور دارت قافزة من بلاصتها...

امجد(بصوت خشن): هي الى تعلمتي تعجني بحال البنات...

#يتبع..