حب نتيجة خطأ طبي

الجزء التاسع عشر

كنزة شهقات: واش ا ولدي هاد البنت حياتها هكا دايرة؟؟ ويلي ويلي على حالة  (بدات كتحل فالريدوات و الشراجم باش يدخل الضو و الهواء للدار )...

منصف لي دخل حط ليها حوايجها وتمشى للصالون جلس فوق الفوطوي لي مقاد فيهم...

أما زمرد
لي كانت متكية فبيتها كتفكر فحياتها لي ولات بحال هكا لافاك مكتمشيش ليها ديما سادة عليها الضو هو الآخر مكتخليهش ادخل ل البيت حتى من الماكلة مكتاكلش قليل و الدوا لي شرا ليها مداتهاش فيه عمرها كانت بحال هكا..

كانت واحد البنت لي ضريفة ضحوكية ديما الطاقة الإيجابية متملكاها على عكس دبا الضحكة مزارتش وجهها من نهار خرجات من دار باباها؛ شوية سمعات شي أصوات وتخرشيش فالدار.. تهزات من بلاصتها بالزربة و خرجات من البيت حفيانة ما لابسة والو فرجليها وشعرها شاد ريزو الفوق

بان ليها منصف و واحد لمرة كتحل فالشراجم ديال الدار وسعات عينيه بالصدمة و تزنگات حيت عارفة الدار كيرجعاتها.. منصف شافها فديك الحالة جابت ليه الضحكة اما كنزة لي ضارت شافت فيها شفقات عليها حيت كتبان فعلا داخلا فاكتئاب تحت عينيها لي كحل و وجها صفر ولكن وخا هادشي كامل مغطاش على ملامح ديال وجهها لي تيبينوها طبيعية اي واحد يشوفها يقدر يميز الجمال ديالها لي مخبيه التعب لي فوجهها..

زمرد شافت فديك المرا مستغربة و خشمانة من حالة الدار

منصف: مي كنزة نخليكم تعرفو على بعضياتكم( خرج لخدمتو)

اما زمرد لي بقات غير كتشوف فديك المرا و خدودها توردو بالحشمة و الخجل..

زمرد بابتسامة: احم سلام
كنزة تتحقق فيها: سلام بنتي كيدايرا ؟
زمرد: لاباس اخالتي واش نتي مامات أاا(معارفاش سميتو) احم هاداك زعما
كنزة لي ضحكات: اجي بنتي جلسي وتعرفي عليا

مشات زمرد جلسات فوق السداري من بعد مقاداتو و جلسات حداها كنزة

كنزة: انا سميتي كنزة أم ديال منصف ولكن ماشي انا لي ولدتو غير رضعتو و صافي
زمرد باستغراب: واش ماماه ماتت؟
كنزة: لاواه ابنتي كي شتي دبا ملي تزاد هو كانت ماماه جاها كتئاب مبغاتش ترضعو و انا ديك ساعة كنت يالاه ولدت..
زمرد: احم اه فهمت
كنزة: شنو سميتك
زمرد: سميتي زمرد
كنزة: سميتك زوينة

زمرد لي اكتفات تبتاسم ليها فقط

كنزة: علاش نتي سادة عليك غير فالدار واش مكتخرجيش و علاش عاطياها غير النعاس هادشي راه ممزيانش ابنتي غير غتمرضي صحتك.. خاصك تحركي شوية وخا غير تجمعي الدار شوفي حالتها كيف ولات..

زمرد لي مرگات من حالة الدار لي هي لوصلاتها لهكا و فنفس الوقت تفكرات گااع الآلام ديالها وتغرغرو عينيها كنزة لاحظات هادشي

كنزة : مالك؟؟
زمرد: والو اخالتي

وناضت ناحية الغرفة ديالها

اما كنزة لي تنهدات حيت بقات فيها وناضت حطات حوايجها فالبيت وبدلات عليها و خرجات...

#يتبع....

#واش زمرد غتقدر تفتح قلبها لكنزة؟؟