حب نتيجة خطأ طبي

الجزء المئة و الثالث و الأربعون

حب نتيجة خطأ طبي
#بارت143♡♡

بقات تتغوت بكل صوتها حتى ندمات لاش هضرات معاها.. ناضو العيالات تيسمتو فيها و هي غير شافتهم مجموعين و هي تجعر..

بدات تتندب فحناكها و تنتف فراسها بزز شدوها و بدااات تتغوت.. و كلشي تيحاول معاها تسكت والو.. دارت ليهم الشقيقة بالغواات زمرد تاهي تعصبات ملي شافتها هكاك تتندم بحناكها و تتعدد على مها..

زمرد بقلة حيلة: براااكة!! راه هادي دار لگنازة.. حشومة عليك أ خالتي والله حتى حشومة!!!
أمال شافت فيها: حشومة؟؟ رااااااه مك لي ماتت راااااه ختي(وضربات صدرها بقوة) و نتي تتقولي ليا بشوية ؟ خلييينييي نخرج لي فقلبي خليني
سارة بترجي: غير متغوتيش راك هاكا غير تتعدبيها عفاك!!
أمال بعصبية: مدويتش معاك أ الكلبة!! يا قليلة الحياا!

زمرد صدماتها خالتها ملي سمعاتها شنو قالت لسارة

زمرد بحدة: الله يعشر خطواتك!! حتى تجي من بعد.. دابا خرجي من دار لگنازة و سيري ديري سيرك ديالك فبلاصة خرى..

برا الدار فالخزانة كاينين المسمعين و القرآن مطلوق.. سمعو لغوات منصف خنزر معارفش شنو واقع ناض من بلاصتو و شدو اياد..

اياد: منصف تبت لرض واش غادي عند لعيالات؟؟

منصف نتر يدو منو و مشا تاجه للدار نيشان مع دخل سمع شنو قالت زمرد لخالتها.. عرفها تقدر تشبك خصوصا ملي شاف أمال حطات يديها على ودنيها و غوتات بگاع الحهد لي بقى فيها

أمال: واك واك أعباد الله بنت ختي تتجري عليا من الدار و أنا جاية غير

منصف تاجه لعند أمال سد ليها فمها و جرها معاه لبرا خرج من الدار و سدها واخا خاصها تبقى محلولة.. و داها معاه حل طونوبيلتو و طلعها و بدا دار لقفل لطونوبيل باش متخرجش و خنزر فيها حتى تخلعات..

منصف: معاك منصف العمراني راجل زمرد.. لي هي بنت ختك الله يرحمها!!

يلاها غادي تبدا تنوح عليه و هو يقاطعها بواحد تخنزيرة

منصف بحدة: انا راه مريض فراسي نقتلك و تاشي حد ميجيب خبارك!! و دابا غادي نجيك من لخر.. و جيني غير نيشان بلاما دوخي و قولي ليا شنو باغا؟

أمال خلعاتها نبرة صوتو و حتى تهديدو ليها و نطقات غير بزز

أمال: غير نعزي ختي!

منصف مجاوبش بقا غير تيشوف فيها بنضرات لي بردو ليها الما فالركابي و تيتسناها تهضر بقات مدة عاد جاوبات قالت تقول ليه و لي ليها ليها..

أمال: ختي ماتت! و راجلها المرحوم راه خلا ليها ورث صحيح!(بلعات ريقها و هي تتحاول تهرب عينيها على عينيه) يعني انا غير جيت.. منها نعزي زمرد و نوقف معاها، و منها ناخد حقي حيت فاطمة معندهاش لولد يعني نقدر نورث..

منصف جبد الشيك من المجر ديال طونوبيل و كتب فيه واخد الرقم و عطاه ليها.. هي غير شافتو عينيها خرجو منهم لقلوبة نسات ختها و نسات كلشي..

منصف: منعاودش نشوفم تدوري بزمرد!! عطيها تيساع و حقك غتنازلي عليه..

أمال حركات راسها بآه

منصف: المحامي غدا غيجي لعندك للدار..
أمال كون هاني..

#يتبع