حب نتيجة خطأ طبي

الجزء مئة و أربعة

حب نتيجة خطأ طبي
#بارت104♡♡

عند رانيا لي واقفة فبلاصتها مبتاسمة جامعة يديها عندها و كتشوف فالعرسان و هي فرحانة.. محسات براسها غير مجرورة ضارت لقاتو معاد لي جرها عندو كيشطح..

رانيا: معاذ واش نتا حمق اش كدير...
معاذ: هنينا انا بغيت نشطح واش ماشي من حقي گاع ناس كيشطحو مع عيالاتهم و أنا واقف بوحدي حشومة..!
رانيا: واها نتا قلتيها عيالاتهم و انا باشمن حق(كتحاول ترطى و لكن هو ممسوقش غادي مع اللحن)..
معاذ: نشاء الله علاش لا الغزالة..

رانيا خنزرات فيه كيجيها مصندل كتر من القياس.. خلاتها فيد الله و بقات غادة مع الاغنية و معاذ شادها يد فخصرها و يد مشابكين بيها اليدين...

كلشي واقف كيرقص شي مع حبيبتو وشي مع مراتو حتى واحد مبقا بلاش من غير اياد و زينب وسارة وامجد لي واقف بعيد عينيه جغمة ديال الدم كيشوف هاديك لي اختارها ليه قلبو و بغاها شريكة حياتو بين ايدين خوه و بصفة مراتو!!

اما سيلفيا عينيها غير مخنزرين محملاتش الوضع... هزات تيليفون صيفطات مساج فيه "شحال بقى؟"

دازت تقريبا ديك جوج دقايق جاها مساج من نفس النمرة "10 دقايق كلشي مقاد كنتسناو غير الفرصة"...

بتاسمات بمكر و رجعات تيليفونها لصاكها...

حبسات الاغنية و وقف معاها كلشي منصف و زمرد لي باقيين على نفس الوضع نضراتهم زمرد لي ابتسامة باينة على شفايفها هاد الرقصة نساتها كلشي حسات براسها اسعد وحدة فهاد الدنيا عرس كيفما بغاتو بالضبط لاغوب كيفما تمناتها و هي بين ايدين راجلها..!! هنا حبس عقلها فقط كلمة راجلها كتردد فعقلها...

"واش بصح هدا غير راجلي؟ راجلي صافي زعما مكيناش شي حاجة كتر؟ لا ازمرد ميمكنش و لكن.. و لكن اشنو كيوقع ليا انا؟واش هادشي عادي؟"

گاع هاد الاسئلة دازو فعقلها مفيقها من سهوتها غير منصف لي طلق منها... تقادات حتى هي فالوقفة بانو ليهم تلاتة ديال السربايا لابسين اللباس ديالهم جايين و هازين واحد الكيك كبيير باللون الابيض فيه زواق باللون ذهبي متكون من 6 طبقات عالية مكتوب عليه "مبروك الزواج" جاو هادوك سربايا كيتمشاو غير بالمهل باش مطيحش ليهم وصلوها بلاصتها قادوها فوق واحد الطابلة لي واقفين حداها العرسان...

شافت زمرد فمنصف و هي مبتاسمة دار ليها اشارة بعينيها زعما نبداو..

هزات زمرد الموس فيد ومنصف حط يديه فوق من ايدها و طلعوها بداو كيقطعو فالكيك من الفوق للتحت... هزات زمرد قطعة صغيرة مداتها حدا فمو هو لي حل فمو قطع منها شوية و عينيه مركزين فعينيها.. داكشي كدلك بالنسبة لمنصف مد ليها قطعة حدا فمها قطعات منها شوية... حيد يديه و هز كلينيكس مسح ليها جناب فمها حيت بقا فيهم شكلاط...

#يتبع...