حب نتيجة خطأ طبي

الجزء المئة و التاسع و الثلاثون

حب نتيجة خطأ طبي
#بارت139♡♡

وصلات ربعة ديال العشية وخاصهم يمشيو ادفنوها.. عند منصف لي كان فبيتو لبس عليه سروال وتريكو كيجي لاصق فالكحل ولاح عليه مونطو طويل لبس سبرديلتو ونضارات كحلين على عينيه.. مشا ناحية زمرد كيفيقها بشويا حتى فاقت ليه...

منصف: نوضي راه خاصنا نمشيو..
زمرد:واش غادي دفنوها دبا!!!
منصف:اه
زمرد شافت فيه وناضت كتمشى وهي جارة رجليها عيانة.. مشات لدريسينغ لقات فيه شي حوايج ديالها.. لبسات عباية طويلة وزيف على راسها وصندالة وخرجات لقات منصف كيتسناها.. شاف فيها منصف شحال ونطق...
منصف:جا معاك الحجاب
زمرد تبسمات بتعب: شكرا..

مشا ناض حل الباب سبقها وهي تبعاتو هبطو التحت لقاو رانيا وكنزة وامجد وسي محمد كيتسناوهم.. خرجو زمرد ركبات مع منصف اما كنزة ورانيا ركبو مع سي محمد...

موقفو غير قدام مستشفى باش يديو الگنازة من بعدما المستشفى تكلف بالتغسيل ديالها و يديوها لدارها باش تخرج الگنازة من تماك ويدوزو لدفين نيشان..
هبطات زمرد بقات كتشوف شحال ودور فعينيها كتستوعب بلي ماماها كاينة تما دارهم لي عندها فيها بزاااف ديال الذكريات الزوينة و الحزينة فنفس الوقت... قدام الدار الجيران كانو مجمعين كلشي ساق الخبار.. حسات بشي حد حط يديه على كتافها دارت لقاتها سارة لي كتشوف فيها نضرات كلهم شوق..
سارة تلاحت عليها معنقاها بجهد وزمرد كذلك لي بادلاتها العناق..
سارة: زمرد توشحتك اختي متخايليش قداش بلاصتك بقات كبيرة...
زمرد: حتى انا توحشتك بزااف وهاني رجعت دبا...
بعدات عليها ومشات عند رحمة الام ديال سارة سلمات عليها وعزاتها... دخلو كاملين للدار و حطو فاطمة فالبيت ديال النعاس ديالها باش كلشي يودعها لآخر مرة.. حتى عائلة زمرد لي قليل فين تتشوفهم جاو ملي عرفو شنو وقع..

دخلات زمرد ومعاها منصف لي شاد فيها تشوف ماماها لآخر مرة و كانت حتى سارة وكنزة ورحمة و رانيا فالدار و بداو تيدخلو العزايا.. وصلات قدام الباب قلبها تقبط والبكية على طرف عينيها مترددة دخل ولكن غير كنزة لي زعماتها...

كنزة: زمرد بنتي دخلي..
حركات راسها بإيجاب ودخلات كتمشا بخطاوي تقال..
وصلات حداها و منصف مفارقهاش..بانت ليها ماماها مغطية بإيزار بيض مكيبان منها والو هنا مقدراتش تحبس دموعها كتر قربات يديها كترعد باش تهبط داك ليزار مخلاهاش منصف و حرها فحضنو

منصف: عفاك ا زمرد لا!
زمرد تتبكي و تتشهق: عفاك خليني نشوفها آخر مرة
منصف مبغهاش تبقى عندها اخر صورة ديال ماماها هاكا حيت وجه فاطمة محروق...
منصف: هاكا حسن! أ زمرد.. غير ودعيها و صافي بلاما تشوفيها..
زمرد بحزن بعدات عليه: مبغيتينيش نشوفها لآخر مرة!! بابا و مشفتوش واش حتى ماما نتحرم من آخر شوفة؟
منصف تنهد بقات فيه و فنفس الوقت مبغهاش تصدم من وجه مها و هو باقي مقال ليها والو على كيفاش ماتت..
منصف: زمرد حاولي تفهمي من الأحسن بلاش!!
زمرد مسمعاتش ليه و فنفس الوقت مقدرش يمنعها.. خصوصا ملي قالت ليه بلي مشافتش باها و نظرة الحزن لي شاف فعينيها...

#يتبع...
قطعات ليا قلبي هاد زمرد😓😓💔..