حب نتيجة خطأ طبي

الجزء الثامن عشر

نمشيو عند منصف

لي كان جالس مع كنزة كيدويو( منصف لي كيعتابر كنزة بحال مو لي ولداتو عزيزة عليه كان ديما كيجي يطل عليها ولي خصاتها يجيبها ليها،  حتى من إياد لي خوه وعزيز عليه ومفهامين هو وياه)

منصف: كيفما قلت ليك امي كنزة اش بان ليك
كنزة: واش دبا هاد البنت معندها حد؟؟

منصف ببرود: معرفتش عمري سولتها
كنزة: و دبا شنو المطلوب مني انا؟
منصف: البنت مريضة داخلة فاكتئاب و آخر مرة كنت لقيتها بغات تنتاحر كون معتقتهاش كانت غتموت وديتها لداري تما فين بقات.. البارح عاود سخفات ديتها لسبيطار قالو ليا عندها نقص فالتغذية. .
كنزة باسى:مسكينة
منصف: بغيتك تمشي معايا نديك عندها تعاوينها تخرج من ديك الحالة لي هي فيها وتوانسي نتي وياها.. ، واش موافقة؟

كنزة: مكرهتش اولدي ولكن الدار لمن غنخليها و زيد عليها إياد واش غيبقى بوحدو؟!! نتا عارف شنو وقع ليه راني عاودت ليك!
منصف: إياد مبقاش صغير وزايدون انا غنهضر معاه كوني هانية ، كلشي دبا كيرجع ليك نتي.. اش قلتي؟
كنزة: صافي اولدي لي بغيتي.. منقدرش نخصر ليك خاطرك!
منصف مبتاسم: سيري جمعي حوايجك غنديك دبا

كنزة مزادتهاش معاه فالهضرة ناضت فالبلاصة تجمع حوايجها

غير سالات لقات منصف حدا الباب هز عليها حوايجها حطهوم فالكوفر، طلعات وطلع حتى هو وكسيرا نيشان لدار فين كاينة زمرد ...

فالدار عند لالة فاطمة

كانت حاطة الغدا وبقات كتفرج فيه معندو منين  يدوز ليها هكا دايرة حالتها كاع هاد الايام دار خوات عليها من غير سارة أولا الجيران لي كيجيو إطلو عليها مرة مرة..

حتى تفكرات بنتها لي توحشاتها بلا قياس معرفاتها واش ميتة ولا حية.. البحث عليها توقف لكن لداخل ديالها ممتيقش بلي صافي فقدات عائلتها كلها..

تفكرات فاش كانت هي وياها كيبقاو فالكوزينة كيشقاو و مجمعين مرة ضاحكين مرة مضاربين(هكا  گاع الأمهات مرة يضحكو معاك مرة يغوتو ) منبعد كيجي سي براهيم كيتجمعو على الماكلة كيضحكو كانت زمرد هي كلشي فحياتهم بنت وحدة لي كانت عندهم و منورة حياتهم(حيت ملي تزوجو مكانوش كيولدو ديما كيتسناو و كيطلبو الله يرزقهوم حتى هما بالولاد) حتى نهار عرفات بلي حاملة بزمرد كانت فرحتهم كبييرة وأخيرا ربي استاجب ليهم..

بقات على داك الحال كتفكر فعائلتها الصغيرة لي توحشاتها وزادت فوتيرة البكاء بقات كتبكي حتى تفشات و ناضت جمعات داكشي فوق الطالبة و دخلات لبيت زمرد لي وقتما توحشاتها كدخل ليه تبقا تشم فريحتها

<عند منصف>

لي كانو وصلو قدام الشقة و تحل الباب مع الدخلة كتلقا الدار مضلمة الضو مكيدخلش ليها

كنزة دخلات بقات كتشوف الدار بحال الا ساكن فيها زوافريا.. كوزينة مرونة الصالة لي المخاد ديالها مرونين و الغطا مليوح فالأرض تيلكوموند ديال تلفازة مخشية تحت الطابلة.. و ريحة ديال لغمولية حيت زمرد سادة گاع الشراجم ديال الدار.. متتهواش بمرة.. أما طواليط لفوطة فالأرض و بزااف ديال الحوايج محطوطين تماك و قرعة ديال شامبوان خاوية ملوحة فلبينوار و لبقايا ديال الشعر باقين تماك.. الدار حالتها حالة هادشي غير باقة مشافتش لبيت فين تتنعس زمرد..

كنزة شهقات: واش ا ولدي هاد البنت حياتها هكا دايرة؟؟ ويلي ويلي على حالة  (بدات كتحل فالريدوات و الشراجم باش يدخل الضو و الهواء للدار )...

#يتبع..
#واش كنزة غتقدر تعاون زمرد تخرج من الخالة لي فيها؟