حب نتيجة خطأ طبي

الجزء المئة

حب نتيجة خطأ طبي
#بارت100♡♡

عند رانيا

لي واقفة كتقاد فرموشها كطلعهم بماسكارا... لابسة قفطان حتى هي فاللون الموف فيه طرز من الكول ديالو كيجي هابط على الكتاف مع سمطة ديالو جاها غزاال...

وقفو البنات بتلاتة حدا بعضياتهم كيستعدو يهبطو..

زمرد بتوتر كتاخد نفس عميق: افففففف...
سارة: تهدني ا زمرد و يالاه حنا غنخرجو نتيا تبعينا..

خرجو البنات على برا بقات زمرد لي جوج نگافات واقفين حداها وحدا من اللور... خرجات زمرد على برا لقات منصف واقف عاطيها بالضهر و خاشي يديه فجيبو... منصف لي كان واقف حتى سمع شي حس مواراه عرفها بلي هي دار عندها بالعرض البطيء حتى وضاحت ليه الصورة...

بانت ليه واحد الاميرة آية فالجمال تبارك الله ديك تكشيطة و كيف مواتياها و يديها لي مزيناهم بالحنة و داك الخاتم كيبري فصبعها...

تقدم عندها بخطوات تابتين قرب وقف حداها دار ابتسامة مد يديه شابكها مع يديها زاد قربها لعندو هابطين مع الدروج و كيف كيبانو كوبل زوين جاو مع بعضياتهم...

نگافات من اللور تابعينهم طالقين حلوقهم"الصلااااااة والسلاااااام على رسول الله " بقاو كيصليو على نبي و يزغرتو حتى هبطو لتحت خارجين الجردة..

برا فالجردة

كانو الاضوية خدامين و الحضور لي جاو كاملين غير ناس الهاي كلاص شكووون وشكون كل واحد لابس احسن ما عندو كل واحد باغي يبان على لاخر العيالات ها لي لابسة ليك جوهرة ها لي لابسة الحرير.. اما رجال كلهم بالبذلات ديالهم من بينهم معاذ لي بكامل اناقتو لابس كوستيم باللون الازرق و شعرو مقادو و امجد حتى هو لي حاضر فالعرس غير حيت ماماه بززات عليه واقف فوق من خاطرو كيسوط بغيض.. حتى كيبان ليه منصف و زمرد جايين... ما اكترتش لمنصف عينيه فقط على زمرد كيطلع و يهبط فيها و فقلبو شاعلة ناار متحملش المنضر هبط على كاي النبيذ لي كان فيديه دقة وحدة لدرجة عينيه ولاو حمرين... حتى الصحافة جات باش تاخذ صور للحفل و ينشرو أحداثو...

لالة الياقوت لي لمحات العرسان جايين مشات عندهم عنقاتهم و باركات ليهم و فخاطرها كتقول غير تبارك و كدعي يدوز كلشي بيخير..

جلسو العرسان بلاصتهم و عينين الحضور و الصحافة و الكل عليهم رجال و نسا اما البنات لي حاسدين زمرد حيت نص فيهم كان حاط عينيه على منصف خصوصا انهم هما بنات رجال اعمال و متسوقش ليهم و جات زمرد وداتو ليهم...

عند زمرد

جالسة يديها فيد منصف كتشوف فبنادم كلشي ضاحك ناشط و نگافة حداها قادات ليها حوايجها..

#يتبع...

#مبروك علينا الجزء 100 بغيت نشوف اشهاراتكم على القصة و تعاليقكم على أحداثها 🥰🥰