حب نتيجة خطأ طبي

الجزء السابع و الستون

حب نتيجة خطأ طبي
#بارت67♡♡

باست ماماها وقالت ليهم "صباح الخير"وجلسات

بداو كيفطرو حتى تم منصف هابط كيقاد الساعة ديالو ف ايديه..
لالة الياقوت:ولدي اجي تفطر..
منصف:لا مفياش...
هضر منصف موجه الكلام ديالو ل زمرد
منصف:زمرد،الا فطرتي تبعيني غنتسناك فالطموبيل
زمردلي تعحبات مالو اش بغاها؟
لالة الياقوت:منصف واش غاديين لشي بلاصة

هضر منصف وهو عاطيها بالضهر:عندها حصة ديال الترويض...وتم خارج...
فاطمة:زمرد بنتي اشمن ترويض؟؟

زمرد عضات لسانها حيت ديما كتنساها وهادي المرة التانية لي كيفكرها فيها حيت هو لي كيصونيو ليه ديما هي نسات معطاتهومش نمرتها وحسات بالاحراج نوعا ما من انه تبقا مبرزطاه وخا راجلها مزاعماش عليه..
زمرد:اه اه نسيت عندي حصة ديال الترويض على قبل يدي لي تقصحت منها..
فاطمة لي فهمات حيت عاودات ليها كلشي اما لالة الياقوت ورانيا لي مفهمو تا حاجة ومبغاوش اسولوها مبغاوش ادخلو فكلشي....

مسحات جناب فمها وناضت قادات حوايجها طلعات بالزربة الفوق هزات واحد جاكيط ديال التجين لاحتها من الفوق حيت تحرك البرد وحيدات ديك الصندالة ولبسات بلاصتها سبرديلة فالبيض وهبطات دغيا خافتو يتعصب عوتاني الا تعطلات عليه...

خرجات لقاتو راكب فالطموبيل كيتسناها...
ركبات حداه هو لي طلعها من سيقانها البويض لي كيبانو حتى ل راسها بغا اقول ليها سيري لبسي شي حاجة مغطية حيت طبيعي ك أي رجل مغربي ميبغيش مراتو لحمها ابان(طبعا داويا على الرجال ديال بصح ماشي هادوك لي كيعيريو عيالاتهم) وخا الصاية هابطة شويا ولاكن مبغا اقول ليها والو باغي اخليها هي حتى تفهم ل راسها بلي ولات مرات الراجل ومبقاتش ديال راسها وهادشي بطبيعة الحال مع مرور الوقت غتفهمو مزيان...

شاف حتى عيا وهو يديماري اللوطو متوجه ل اوبيطال لي متبعا عندهم...وصل باركا طموبيل وتمو داخلين كيتمشاو وكاع الفرمليات لي تما بقاو متبعين منصف بالعين وكيوشوشو بيناتهم ،طبعا منصف لي متسوق لحد العين هي الخرا مكيهزهاش فيهم...

داز الوقت سالات زمرد الحصة لي عندها وقالو ليها بلي باقيين ليها جوج حصص وتكمل وبلي خاصها تعاود ترجع عندهم من هنا يوماين...

وصلها منصف ل الدار وهو مشا لخدمتو ،لقات غير رانيا لي جالسة فالجردة بوحدها ملي سولاتها على ماماها ولالة الياقوت قالت ليها رانيا بلي خرجو ابدلو الجو حيت شحال هذا مخرجو ولالة الياقوت بطبعها معندهاش مع الخروج بزاف غير مرة مرة ولي خصاتها توصلها حتى ل الدار...

#يتبع...