حب نتيجة خطأ طبي

الجزء السادس عشر

دخلو المسعيفين غير شافوهم الممرضات مشاو كيجريو خداو ليهم البياص فين حاطين زمرد... دخلوها الغرفة و جا الطبيب باش يعاينها.. اما منصف بقا واقف كيتسنا فالباب حتى خرج عندو الطبيب..

منصف: مالها؟

الطبيب بقا ساكت عاد نطق...

طبيب: لا والو مكاين باس غير هو عندها سوء التغدية خاسها ترد البال لراسها ومتهملش صحتها بان ليها واقلة گاعما تتاكل.. غير يسالي سيروم غتخرج وكتبت ليها مكملات غذائية باش تاكلهم و يكون خير

منصف: اوكي

طبيب حرك ليه راسو و مشا

منصف دخل عند زمرد جلس فوق واحد الفوطوي مقابل معاها{حاط رجل على رجل} وبقا تيشووف فيها و بزاف ديال الأسئلة فراسو
شكون هادي منين اصلا وعلاش داك نهار حاولات تنتاحر....الخ

دازت مدة

بدات كتحل عينيها بان ليها جالس قدامها و حاط يد كيدوزها على لحيتو و تينتف بعض الزغيبات ديالها(الحركة ديالو المعتادة)

زمرد فاقت وتقادات فالجلسة وشعرها كترجعو مور ودنيها بتوتر "توترات من وشوفاتو ليها "

زمرد متوثرة: احم و واش نتا لي جبتيني لهنا؟؟
منصف: اه انا !
زمرد: ش شكرا

كدور عينيها هنا وهنا متجاهلة تجي عينيها فعينيه.. أما هو بقا مراقب تحركاتها و متعجب منها

منصف بصوت رجولي طاغي عليه البرود: سيروم سالا

زمرد طلعات راسها تتشوف فالسيروم لي سالا مفهمات شنو بغا يقصد

زمرد حركات راسها بإيجاب: عندك الحق سالا

ناض منصف خارج من الغرفة وعيط على الفرملية باش تحيد ليها السيروم.. داكشي لكان.. عطاتو لوردونونص ديال الطبيب(وصفة طبية) فيها الدوا لي خاص.. يلاه غتدخل عند زمرد وقفها

منصف: قولي ليها غنتسناها لتحت

غير كمل هضرتو دخلات عند زمرد و هو اتاجه خارج المستشفى

سالات معاها الفرملية

الفرملية: بالشفاء انشاء لله! راجلك تيتسناك لتحت..
زمرد وسعات عينيها: كيفاش؟
الفرملية: راجلك قال ليك بلي تيتسناك لتحت! وخا متيبينش لكن اهتمامو باين و راجلك عاطي للعين تهلاي فيه!!

زمرد تزنگات من هضرة ديال الفرملية و جاتها اللقوة.. ناضت من بلاصتها تتقاد فحوايجها و خرجات من تما متاجهة لخارج المشفى

زمرد فنفسها: كيفاش زعما ديما تيعتقني؟؟

غير سلات الجملة تفكرات السبب لي خلاها تتلاقا بيه قلبها تزير و بدات تتبكي.. بقات هكاك حتى خرجات تتقلب على الطونوبيل ملقاتهاش صحاب ليها هرب عليها و زادت فوثيرة ديال البكاء و شهقاتها مسموعين.. عاد لقاتو كان تيشوف فيها ببرود مسحات دموعها و حشمات تمشي لعندو حسات بلي معندها حد وبلي تقلات عليه هاد الايام كاملة و هي فدارو عمرو جا ليها.. حسات بلي حرماتو من دارو(سيد عندو فين يبان غير هنينا) منصف بحالا فهم فاش تتفكر كلاكسونا شافت فيه و دار ليها اشارة باش تجي لعندو عاد زعمات و ركبات فالسيارة وهو ينطالق بدون ميتكلم معاها..

بقاو غاديين فالطريق والصمت هو سيد المكان حتى كسر داك الصمت منصف لي نطق

منصف بهدوء: شنو سميتك؟

زمرد تزنگات حيت مموافقاش تتجاوب على بحال هاد الأسئلة ديال التعارف خصوصا الا كان سولها دري

زمرد: زمرد! سميتي زمرد

منصف لي سكت مبقاش جاوبها وصلو قدام العمارة و عطاها سوارت دار.. هبطات من السيارة غير سدات لباب كسيرا نحو الوجهة ديالو

اما زمرد دخلات و نيشان ل بيت حلات البالكون وضرب فيها داك النسيم ديال الهواء لي كيداعب خصلات من شعرها.. و هي تتنفس بعمق بقات على داك الحال شحاال حتى تفكرات ماماها لي توحشاتها بلا قياس ، الدمعة على طرف عينيها ولكن كتحاول تكبحهم باش ميطيحوش بقات كدير شهيق زفير.. دخلات سدات البالكون ومشات تلاحت بلاصتها باش تنعس بدون متاكل " هادي هيا حالتها!"

أما منصف وصل لواحد الدار لي جات برا المدينة شويا هادئة و مفيهاش صداع بزاف كانت دار صغيرة على قد الحال ولكن زوينة لا من شكلها وحتى جريدة لي كانت دايرة بيها فيها شجيرات والورد وكانت باينة عليهم بلي مولاتهم مهلية فيهم

هبط من السيارة ديالو وتاجه نحو المنزل دق فالجرس حتى تسمع صوت ديال شي مرا

لمرا: شكووون

#يتبع

#فنضركم عند من غيكون جا منصف؟؟