حب نتيجة خطأ طبي

الجزء التاسع و الثمانون

حب نتيجة خطأ طبي
#بارت89♡♡

...بقاو على داك الحال شحال حتى حسات زمرد براسها رتاحت.. و هي تبعد عليه عاد حسات براسها وشنو دار بيناتهم.. بعدات عليه و هي متوترة كتقاد فشعرها و دور عينيها هنا و هنا و تفرك صبعانها خلاصة القول السيدة تلفات... و معرفاتش كيفاش تتصرف

منصف لي غير مركز معاها و على حركاتها العفويين كتصرف بحال شي بنيتة معرفش واش تصنع و لا اشنو..

منصف بهدوء: علاش بكيتي؟!
زمرد هزات كتافها باهمال: بكيت و صافي..
منصف طلع حاجبو مستغرب: غير هكاك... اوكي سيري لبسي عليك حوايجك و تبعيني راه بقات ليك حصة ديال الترويض لي ديما ناسياه...

زمرد حشمات حيت نفس السيناريو كيتعاود و منصف هو لي كيفكرها بحال ديما..

زمرد:و لكن واش ضروري اليوم؟؟.. زعما مكاين لاش اصلا يدي مبقاتش كضرني...
منصف:  و مؤكد بلا قوة الهضرة..

مشا دخل الدريسينغ بدل حوايجو و خرج اما هي لي دارت روتينها الصباحي و لبسات عليها كسوة طويلة مخطلة فيها الالوان صيفية و صنيديلة فرجليها و صاك و خلات شعرها مطلوق على راحتو انا الميكاب لي كتافات فقط بماسكارا و گلوص لشفايفها...

هبطات لتحت لقات الدنيا عامرة بالاشخاص لي كيقادو فالديكور الحديقة و مرا واقفة عليهم كتوريهم اش غيديرو باينة بلي هي مهندسة ديكور... اما لالة الياقوت لي كتهضر مع شي شركة يصيفطو ليها السربايا...

تمشات ناحية سيارتو لقاتو جالس كيشوف قدامو ركبات هي و كسيرا للوجهة ديالهم... و هما غافلين على واحد السيارة كحلة زاجها فيمي و طويلة كان راكب فيها واحد الشخص فالاربعينات من عمرو لابس نضارات كحلين و حاط يد كيدوزها على لحيتو دار ابتسامة شريرة ونطق بين سنانو...

الشخص**: اممم سي منصف العمراني مبقا والو(دار ضحكة انتصار )

نرجعو الفيلا

لي الدنيا مقلوبة كل واحد باش مكلف عند رانيا لي جالسة هي و سارة كلفاتهم لالة الياقوت باش يعرضو على صحابات زمرد باش يديرو حفلة ديال الحنة صغير بيناتهم لالة الياقوت حالفة حتى دير عرس تقليدي على حقو و طريقو...

جالسين البنات مجمعين و سارة لي تصوني على صحابات زمرد و حتى هادوك لي ميحملوهاش و تعرض عليهم و فاطمة حداهم جالسة مقاداها فرحة غتشوف بنتها عروسة.. حتى تم داخل واحد الولد هاز ف ايديه واحد البواطة كبييرة باللون الابيض.. دخلها حطها فالصالون كيفما قالو ليه و خرج...

سارة: رانيا اشنو تما؟؟
رانيا: لاغوب ديال زمرد هاديك عاد و صلات اليوم من فرنسا...
سارة: كفاش واش جات من فرنسا ناري متحمسة نشوف كي غتجي مع زمرد...
رانيا متحمسة: ايه من فرانسا خصيصا لمرات خويا... شوفي مغنحلوهاش زمرد هي اول وحدة غتشوف اشنو فيها...

#يتبع...