حب نتيجة خطأ طبي

الجزء المئة و الخامس و الأربعون

حب نتيجة خطأ طبي
#بارت145♡♡

على اثر هاد الكلمات وساعو عينيه بالصدمة.. شكون من غيرو أمجد و قلبو بدا تيضرب بالجهد و عقلو تيتردد غير جملة وحدة "زواجنا غير على الورق"

بقا عقلو خدام كيستوعب فالأمر فالاخير ترسمات ابتسامة عريضة على شفايفو وقلب طريق ومشا..

عند زمرد لي كلمة راجلي جاتها فشكل شي حاجة زوينة حسساتها بالراحة معرفاتش علاش عينيها مفيكسين فعينيه وابتسامة خفيفة ضهرات على شفتيها... حركات راسها بإيجاب كجواب على هضرتو لي قال..

منصف: صافي مشينا؟
زمرد: واخا يالاه...

مشا منصف و زمرد حداه ركبو فسيارتو و انطلق راجع بيها للفيلا ترتاح شوية هاد تلت يام لي دازت عليها صعيبة بزاف..

وصلات زمرد هبطات مشات لبيتها ديريكت مهضرات مع حتى شي واحد من لي كانو فصالون معندهاش طاقة تناقش مع شي حد باغة غير ترتاح تجلس مع راسها وتفكر فحياتها لي ولات مقلوبة...
دخلات لبيتها ونيشان لدريسينغ هزات الحوايج لي غيخصوها وتاجهات للدوش... خدات ليها دوش خفيف لبسات حوايجها لي عبارة على سروال ديال كيطمة فالابيض و تيشورت كحل غير ديال منصف جاها وااسع حيت ملقاتش تما شي تيشورت ديالها تلبسو وتقاشر فرجليها مشطات شعرها و مشات تخشات ففراشها بحال ديما ولات عاطياها غير نعاس و التفكير زايد...

تعاشات العشية عند منصف لي عاد رجع من شركة بكري على قبل زمرد.. تمشى لداخل لقاهم مجموعين على طبلة ديال العشا الا زمرد..

منصف: فين زمرد مكتعشاش معاكم؟
كنزة: لا اولدي مشيت حاولت معاها مبغاتش تنزل قالت ليا مقداتش عليه...

منصف شاف فيها وعيط الخدامة لي جات بالزربة..

منصف: وجدي العشا ديال زمرد طلعيه البيت... وتمشى طالع الفوق

اما الخادمة لي مشات دير داكشي لي قال ليها...

وصل عندها البيت حل الباب بشويا بانت ليه ناعسة ولا نقولو غير مغمضة عينيها وصافي تمشى ناحية دريسينغ بدل حوايجو وخرج لقا الخدامة يالاه حطات ليه العشا وخرج...

مشا جلس حداها حط يديه على شعرها لي باقي فازك وريحة زوينة كتعطى منو..

منصف: زمرد... زمرد... زمرد فيقي تعشاي...
زمرد: لا مبغيتوش غير خليني..
منصف: لا نوضي هاهو جابوه حتى لعندك نوضي كولي غير شويا ورجعي نعسي..
زمرد: ولا عافاك غير خليني معندي شهية...

بقا عليها تما مبغات تنوض ليه حتى ركبات فيه الأعصاب بزز باش هدن راسو غير حيت عارفها كدوز من وقيتة صعيبة.. ناضت جمعات رجليها عندها فوق ناموسية كتبان كيوت فداك تيشورت لي عريض عليها وتقيشرات لي لابسة كانو مرسومين فيهم رسوم وشعرها لي فازك حناكها لي تزنكو حيت كانت خاشية راسها فالمخدة...

منصف بقا غير كيشوف فيها وفتقاشر ديال سبون جبوب هو براسو لي شراهم ليها منين تحرقات دار تحرقو حتى حوايجها واكيد غيخصها متلبس ومشا ختار ليها الحوايج اونلاين...

منصف: هاكي! مناوياش تاكلي؟؟
زمرد: ياك قلتي غير نوض وهاني نضت!!
منصف: زمرد بلا قسوحية راس كولي العشا ديالك بلا هادشي كامل راك كتجيبيها غير فصحتك...

هز الدغمة اللولة قربها لفمها حلات ليه فمها وكلات من يديه لاول مرة..

بقا هكاك كيوكلها حتى مبقاتش قادة شبعات وتنفخات مسحات فمها ورجعات نعسات منطقات متكلمات..

اما منصف لي شاف فيها بقلة حيلة هز داك البلاطو حطو فوق الكوافوز ومشا تخشا فالفراش حداها مقابل معاها كيشوف ويحلل فملامحها لي طاغي عليهم الحزن من الشوفة اللولة....

#يتبع...