حب نتيجة خطأ طبي

الجزء المئة و الخمسون

حب نتيجة خطأ طبي
#بارت150♡♡

وصل الليل فالفيلا عند رانيا لي خارجة من بيتها غادة عند ماماها طل عليها بحال ديما...
مع حلات الباب بان ليها واحد المنضر لي خلاها تغوت بالفرحة ودموع ينزلو ليها... على إثر ديك الغوتة غوتات جا منصف كيجري يشوف مالها...
منصف: رانيا... صافا مالك
رانيا: ماما.. ماما فااااااقت...

منصف لي غير سمعها دخل مدرم البيت بانت ليه لالة الياقوت حالة عينيها بشوية وباقي باين عليها بلي عيانة...
دخلات رانيا مشات جلسات حدا ماماها شدات فيديها ومنصف من الجهة التانية وكلهم عينيهم كيخرجو منهم القلوبة بقوة الفرحة..

منصف: الواليدة فقتي واش نتي بيخير؟!! واش نجيب ليك طبيب..
لالة الياقوت لي كتافات فقط تحرك ليه راسها بلا زعما ممحتاجاش طبيب...

منصف: رانيا فيناهي الفرملية علاش خلاتها بوحدها سيري عيطي ليها...
رانيا: كالما أ خويا أنا غنمشي نعيط ليها...
داكشي لي كان مشات هي تعيط ليها اما منصف لي بقا مع ماماه وهو فرحان حيت أخيرا فاقت من بعد مدة طويلة...

باقي جالس حتى تحل الباب تم داخل سي محمد لي ساق الخبار ومعاه امجد لي وجهو كامل زرق منفوخ... منصف لي شافو كحل بالعمى ينوض يجري عليه ويقوليه بأشمن وجه جاي قدامي...
مشا امجد حدا ماماه باس ليها على راسها...

امجد:الواليدة على سلامتك توحشناك... متبقايش ديري لينا بحال هكا... المهيم تهلاي فراسك الالة الياقوت هه.. عاود باس ليها على راسها وتم خارج قبل ميخرج دار شاف شوفة اخيرة فماماه وخوتو وباباه وعينيه كيحكيو بزاف ديال الحوايج لي ميقدرش يقولهم...
اما فالداخل كلشي مجموع فرحان بالياقوت لي فاقت والفرملية حداها كتقيس ليها فالضغط وتشوف النبض ديالها. واش مقاد...

رانيا بحماس: امضرا واش هي بيخير؟؟
الفرملية ابتاسمات: على سلامتها هي بيخير خاصها غير شوية ديال راحة وتولي مزيانة الله يشافيها...

هما لي سمعوها فرحو ورانيا جالسة كتعنق فيها اما منصف لي عقلو عند زمرد وكفاش غتكون حالتها واش ناعسة؟ واش واكلة؟ معطاتوش خاطرو يخليها بوحدها... من بعد تفكير طويل ستأذن منهم وخرج هز جاكيط لاحها عليه من الفوق وسوارت طموبيل ومشا خرج....

موقف غير فالحي ديال زمرد كانو ناس باقي مدخلو لديورهم شي غادي شي جاي ودراري كيلعبو بالكرة ويتجاراو... منصف كان متأكد ايلقاها تما وفعلا بان ليه ضو باقي خدام... مشا حل الكوفر ديال طموبيل هز شي تقدية جابها ليها باش تعشا بيها حيت عارف غتكون باقي مكلات والو...

مشا دق الباب دازو تواني قلال حلات ليه زمرد الباب طلات عليه بشوية غير بان ليها جمعات غوباشتها...

زمرد: اشنو جاي كدير هنا؟
منصف بهدوء: ماشي من حقي نشوف مراتي... حيدي ندوز حيدي..
زمرد بحدة: قلت ليك بلي بغيت نبقا بوحدي

منصف متصنطش ليها دفع الباب برجليه و دخل مخليها غير كتشوف فيه منطقات متكلمات..
مشا دخل الكوزينة حط داكشي فوق البوطاجي وبدا كيجبد كل حاجة ويشوف اشنو غيدير بيها... حتى جات زمرد داخلا مربعة يديها..
زمرد بعصبية: اشنو كدير امم قلت ليك بغيت نبقا بوحدي علاش تبعتيني ؟وشكون قاليك انا هنا؟
منصف: فبلاصة متبقاي واقفة عاونيني نقادو العشا راه فيا جوع باقي مكليت...

زمرد صافي قاداهم ليها هي كتهضر فجهة وهو كيهضر فجهة خرا...
زمرد بعصبية: اسيدي انا مباغاش ناكل إلى كان فيك جوع بقا فداركم وكول علاش جيتي حتى لهنا؟

#يتبع...