حب نتيجة خطأ طبي

الجزء السادس و التسعون

حب نتيجة خطأ طبي
#بارت96♡♡

دخلات سارة لقات زمرد حنات دارت غير نقش خفيف بزاف سامبل و زوين وتاها و جا معاها... و حداها رانيا لي حتى هي جالسة كتحني مشات سارة جلسات حداها شادة نوبتها باش تنقش حتى هي... سالاو البنات النقش ديالهم و ناضو يشطحو و هاد المرة منوضين معاهم حتى زمرد حاطينها وسط منهم و هما دايريه بيها كيشطحو و يغنيو مع الاغنية... زمرد لي كتشطح غير بالتباتة كتحرك بلاصتها و تشالي بيديها و هي حشمانة حنيكاتها لي مزينكين...

00:20

البنات لي بداو كيمشيو من بعد ما دوزو وقيتة زوينة شطحو نقشو كلاو ضحكو دوزو نهار زوين...

البنات مشاو و سارة و رانيا طالعين البيت ينعسو و حتى لالة الياقوت و فاطمة لي مشاو زمرد تا هي طلعات لبيتها بقات غير الروينة موراهم تكلفو بيها الخدامات...

عند زمرد

لي طلعات الفوق دورات عينيها مبانش ليها منصف مشات البالكون كطل بان ليها فالجردة جالس متكي راسو على الفوطوي.. دخلات حيدات عليها داك القفطان قاداتو فبلاصتو خدات حوايجها لي غتحتاج و دخلات الدوش تحيد عليها العيا ديال هاد النهار....

داز الوقت

و زمرد يالاه خارجة لابسة بيسامة نص كوم باردة و سروالها لي واسع بغات تاخد فيه راحتها نشفات شعرها غير بالفوطة رطبات وجهها و الجسم ديالها... و مشات تخشات ففراشها مستسلمة للنوم

عند منصف

لي بقا جالس حتى حس بالنعاس طلع لبيتو تاجه ناحية الناموسية حيد صندالتو و تخشى حداها مقابل معاها كيف كل ليلة... حتى جاه نعاس و نعس حتى هو غدا كيتسناهم نهار طويل...

اصبحنا و اصبح الملك لله🌷

فالفيلا لتحت الاجواء نايضين و علاش لا و اليوم عرس واحد من عائلة العمراني لي بقات ليه فقط ساعات قليلة و يبدا... لالة الياقوت لي واقفة على كلشي هي و سي محمد كيديرو جهدهم كامل باش يدوز العرس على اكمل وجه و گاع الحضور يعجبهم...و ضروري شوية ديال التوتر خاص...

الياقوت واقفة وسط الفيلا و تتوريهم اش غيديرو و الدراري لي خدامين غاديين كيدخلو فالحلاوي الكوزينة غير الشكال و النواع...

لالة الياقوت: غير بشوية ا ولدي دخلو داكشي كامل الكوزينة... اه نتا داك لورد ديه الصالون حتى نقادو ليه بلاصتو.... عنداك غير بشوية على طباسل لا يتهرسو الله يرضي عليك راه الخدامة توريك فين غتحطهم.... (بانت ليها رانيا) اجي اجي رانيا واش باقي موصلات الحلوة لي غتقطع العروسة؟!
رانيا: لا باقي راه صونيت قالو ليا شوية و يجيو....
لالة الياقوت : ضروري تكون واجدة من هنا العشية الا شفتيهم تعطلو صوني ليهم.
رانيا: واخا اماما غير بشوية عليك راه كلشي مزيان...
لالة الياقوت بهدوء عكس التوثر لي حاسة بيه: انشاء الله ابنتي يدوز كلشي بيخير... اجي بعدا واش صيفطو الدعوات...
رانيا: اه ماما راه صيفطناهم البارح مزال نسيتي؟!!
لالة الياقوت تنهدات: متديش عليا.... (بان ليها واحد دايز) شوف نتا نتا اجي سير للجردة راه واحد البولة طاحت قادها ا ولدي...
رانيا: ماما واش هادوك لي غيطيبو جاو؟
لالة الياقوت: اه اه جاو... اجي بعدا داك مولاي السلطان باقي مفاق هو لي جات معاه اليوم عرسو و هو ناعس...

#يتبع...