حب نتيجة خطأ طبي

الجزء المئة و الثاني و الثلاثون

حب نتيجة خطأ طبي
#بارت132♡♡

وصلو حدا سبيطار هبطو يزيد داوه لمستودع الأموات... اما منصف وزمرد حطو كل واحد فغرفة بوحدو...
منصف لي حيدو ليه الرصاصة حيت جاب الله الجرحة مغارقاش بزاف خيطو ليه الجرح وعطاوه شي مسكنات ديال الألم...

اما زمرد لي باقي مفاقت حالتها خايبة نوعا ما عندها نقص فالتغدية وصحتها طاحت بزاف وتعرضات لصدمات لي يقدرو يأثرو عليها نفسيا... ولكن عندها امل تفيق...

عند منصف

لي جالس ملابسش من الفوق حيت منين كانو غيخيطو ليه جرحة قالو ليه احيد حوايجو..
جالس ولي فيه شي مهناه عقلو كامل مع زمرد وشنو غيتكون حالتها.. بقا كيشوف حتى عيا وهو ينوض لبس تيشورت ديالو غير بزز دار بانضة على يديه وخرج وهو شاداه دوخة معاطيش راحة لراسو... تلاقا بفرملية فالباب..

الفرملية: فين غادي رجع جلس الله يخليك راه باقي مبريتي خاصك تعطي راحة لراسك...
منصف(ممسوقش لهضرتها): فيناهي زمرد؟
الفرملية: واش مراتك...
منصف(بصوت عيان وعينيه بزز باش حالهم): اه فيناهي فين جات غرفتها؟
الفرملية: يالاه نديك عندها ولكن راه ضروري خاص ترجع تكا...

حرك ليها راسو بإيجاب وتمات غادية وهو تابعها كيتسنى امتى يوصل عندها...

وصلو حدا غرفتها مشات الفرملية وهو بقا حاضيها من زاج ناعسة مغيبة على هاد العالم وجهها شاحب مفيهش قطرة ديال الدم...

بقا كيشوف فيها شحال مترددش باش ادخل عندها وخا قالو ليه بلي مخاصوش ادخل عندها...
غادي جيهتها وعينيه مفيكسين عليها وصل حداها جلس جنبها فالسرير كيمتع عينيه بملامح وجهها البريئة...

هز يديه حطها كيدوزها على خدها بشوية...

منصف: (تنهد تنهيدة حارة): اشنو داور فيك ازمرد؟ اشنو امم... مناوياش تفيقي خلاص...

بقا كيشوف فيها شحال تمناها تفيق وتعاود ليه شنو دوزو عليها ويطمنها ويقول ليها بلي انا معاك وحتى واحد مغيآديك وبلي مبقا حتى واحد غيقرب ليها...

هبط عندها بشويا ناسي يديه لي عاطياه الحريق حط شفايفو على جبهتها طبع قبلة طويلة وهو مغمض عينيه... هز راسو شاف فيها آخر مرة وخرج عارف بلي جلوسو عندها معندو باش غينفعها...
خارج كيتمشى وكتافو يتمشاو معاه واحد جوج فرمليات كيوشوشو عليه..

الفرملية اللولة: ياختي شحال تيتيز كيحمق....
جاوباتها هاديك: عندك الحق ياختي سعدات مراتو مشفتيش كيفاش كيعاملها...

بقاو شادين فيه جماعة ناسيين خدمتهم... اما منصف دخل لغرفة لي عطاوه فالكلينيك هز جاكيط ديالو جبد تيليفونو لقا شحال من ابيل من واحد النمرة معارفهاش... قرن حجبانو وعاود صونا على نفس النمرة جاوباتو بنت..

منصف: لقيت هاد نمرة مصونيا ليا؟
البنت: اه كنصونيو ليك من مستشفى"....." باش نقولو ليك بلي المرا لي جابو البارح راه توفات البركة فراسكم وقلت نعلمكم باش الا بغيتو دفنوها...

منصف غمض عينيه مزير عليهم وردد بين شفايفو "إن لله وإن إليه راجعون"...

منصف: اه صافي حنا غنجيو ناخدوها مغسي...

قطع عليها حط تيليفون وعقلو خدام كان باغيها تبرا وترجع لبنتها كيشوف زمرد شحال متعلقة بماماها وكيفكر كفاش غيقول ليها بلي ماماك ماتت!!! كيفاش يقولها ليها و هي يلاه عرفات بموت باها؟ واش غتقدر تقبلها! باينة غدخل ليهم فحالة خايبة ولكن هدا مكتاب الله القدر كيلعب لعبتو...

#يتبع...