حب نتيجة خطأ طبي

الجزء المئة و الثاني و الأربعون

حب نتيجة خطأ طبي
#بارت142♡♡

سارة تاهي تتبكي ملي شافت حالة زمرد: عفاك متخلعينيش عليك..
زمرد بصوت محروق شافت فيها: بغييت ماما!
صوت لي قطع ليها قلبها معرفاتش شنو دير على قبل صاحبتها و هي تحضنها و تتبكي..

دازت مدة

الأوضاع تهدنات فالدار لي بقا الباب محلول تيستقبل العزايا لي غير تيدخلو تيتفاجؤو بأمال تدور فوسط الدار و تتعاود نفس الجملة و هي تتبكي "مشاااااات ختي الحبيبة!! مشاااات ".. زمرد نعسات و خلاوها بداو تيستقبلو العزايا.. رجعو من المقبرة من بعدما دفنوها..

سي محمد: منصف راك عارف شنو تيدار بلاما نوصيك

منصف تيشوف فباه بنظرة من نيتك

أمجد: محتاجني فشي حاجة؟؟
يلاه غيهضر جات كنزة: ولدي شنو غادي دير؟ راه زمرد ناعسة مسكينة و هاد الناس جايين يشوفوها!!

منصف مخنزر فخالة زمرد لي حلفات لبغات تسكت و صوتها ضرو فودنو.. أما أمجد غير شافو فين تيشوف حبس الضحكة بزز حيت منظرها ضحكو..

منصف: ليوم غنديرو العشا مغاديش نتسناو حتال غدا! و هاديك هضرو معاها متبقاش تغوت!!
كنزة دارت تشوف شكون عاد فهماتو: اوا أ ولدي راها مشوية فختها شنو بغيتيني نقول ليها تسكت؟؟
منصف تيليفونو كان تيصوني جبدو بان ليه اياد و جاوبو
اياد: منصف فينكم؟ راه الواليدة متتجاوبش و جيت للفيلا الجديدة مكاين تاشي حد!

منصف ضرب على جبهتو حيت نسى مصيفطش ليك لوكاليزاسيون ديال دار لگنازة

منصف: انصيفط ليك لوكاليزاسيون! ماشي تماك فدار والدين زمرد..
إياد: واها و غير سيفط ليا انا نشد طاكسي لتماك!
منصف: واخا!

قطع معاه و صيفط ليه لوكاليزاسيون.. و شاف فكنزة

منصف: ردي لبال لزمرد!

غير كمل هضرتو خرج من الدار فطريقو طلاقا مامات معاذ غير شافها وقف أما هي حدرات عينيها حشمانة من شنو دار راجلها و بلي عندو يد فهادشي..

حفصة: مجيتش ندير لكم الصداع! جيت غير باش نعزي.. و الا مبغيتونيش نمشي دابا..
منصف: معندك تاشي ذنب.. مرحبا بيك فأي وقت..

قربات منو و عنقاتو و بدات تتبكي منصف بدا تيطبطب عليها و غير بعدات منو بانت ليه زينب خت معاذ تاهي عينيها عامرين بالدموع باينة بكات..

زينب: لبراكة فراسك أ خويا!

منصف حرك ليها راسو بآه و شاف فخفصة

منصف: حاولي متقولي لزمرد والو هي مفخبارهاش شنو وقع و مبغيتهاش تعرف دابا.. و متبكيش قدامها!
حفصة: كون هاني أولدي راها غنديرها فعينيا

وصل ليل

جا اياد و عاون منصف عطاه فكرة ديال لخزانة باش يكونو فيها الرجال و يجيبو المسمعين.. و باش ميكونش الاختلاط العيالات يبقاو فالدار لداخل.. و داكشي لي كان.. زمرد ناضت و بداو تيحيو يعزيوها و عزاتها حفصة و زينب و لحد الآن معرفاتش شنو وقع مع مها.. عينيها نشفو و حمارو بكثرة لي بكات تتحاول تنشى غير لحظة تيجيو و يفكروها.. أما خالتها بقات محافظة على نفس الجملة تتقولها و غير غادة جاية الفرق الوحيد هو صوتها لي باين عيان.. بزااف ديال لعيالات تغامزو و ضحكو فالول و تعصبو دابا باغينها غير تسكت..

لمرا 1: وا ختي أمال الله يهديك سكتي شوية راه غير تتقري فراسك
أمال دارت شافت فيها و هضرات بعصبية
أمال: و مشاااااااااااااااااااات!!!! و اااااا ختييييي علااااااااااااش و جيييييبووووووهااااااا

بقات تتغوت بكل صوتها حتى ندمات لاش هضرات معاها.. ناضو العيالات تيسمتو فيها و هي غير شافتهم مجموعين و هي تجعر..

#يتبع