حب نتيجة خطأ طبي

الجزء المئة و السادس و الخمسون

حب نتيجة خطأ طبي
#بارت156♡♡

منصف لي كيتصنط ليه ومركز معاه معرفش علاش ولكن لامس داك الصدق فالهضرة ديالو ونضراتو كفاش كيتبدلو بين كل موضوع قالو...

منصف(مصغر فيه عينيه) واش نتا باغي رانيا؟!
معاذ طلع فيه عينه بزربة وفيهم واحد البريق ديال الفرحة الشي لي لاحضو منصف..

معاذ: اه اه والله حتى باغيها ومن شحال هادي..
منصف: اوكي جيب عائلتك وخطبها وبين ليا..
معاذ: كون هاني من غذا نجيب الواليدة...
منصف(بجدية): معاذ! نتا صاحبي وعشرة سنين وتايق. فيك وعارف بلي مغاديش دير شي حاجة لي غادي تآديها كون كنت متايقش فيك مغاديش نوافق وانا راه كنعرفك مزيان...

معاذ( بابتسامة): كون هاني امنصف غنديرها فعيني..
منصف: ولكن ممنوع عليك تقرب منها ولو شوية حتى تزوجو ديك ساعة ديها..
معاذ: ولكن... صافي صافي كون هاني مغاديش نقرب ليها.. دبا غادي تقولها لواليديك ياك!!؟

منصف: نشوف شي وقيتة ونهضر معاهم وغنعلمك باشما كان..

ناض منصف كيقاد فحوايجو باش يدخل حتى كيبانو ليه خارجين دليل على انه غيمشيو..
مشا تاجه جيهتهم لقا الياقوت كتحاول معاهم ابقاو حتى يتغداو ولكن والو قاليك زربانين...
داكشي لي كان ودعوهم ومشا حتى معاذ سلم على الياقوت ورانيا ضربها ليها بواحد الغمزة لي خلاتها تحشم فحوايجها بطبيعةالحال هادي مشافهم حتى واحد...

ركب سيارتو منطالق اما سي محمد لي مشا حتى هو للشركة اقابل خدمتو بقا منصف لي جالس فالصالون مع الياقوت ورانيا مشات لبيتها..

منصف: الواليدة! باغي نهضر معاك...
لالة الياقوت(بتساءل): فين بعدا زمرد مبانتش ليا و حتى فاطمة!

حيت هي معارفاش بشنو واقع وحتى الاختطاف تاع زمرد وموت فاطمة باقي مقالو ليها والو...
منصف: هادشي فاش باغي نهضر معاك...
الياقوت باستغراب: هاني كنسمعك اولدي هضر!

منصف لي متوتر معارف منين يبداها ليها...
منصف: منين وقع داك الحريق فالفيلا نتي جاتك ازمة وهادشي عارفاه!! مهيم.. فديك الليلة زمرد تخطفات..

الياقوت لي شهقات ونطقات بالزربة: وفين هي دبا واش لقيتوها ولا لا؟؟
منصف: كالمة وسمعيني وغادي تفهمي...

بقا كيهضر شرح ليها كلشي بلي زمرد تخطفات وشكون خطفها وشنو حاولو يديرو ليها وشنو داز عليهم فديك الفترة فاش كانت هي فغيبوبة وبلي فاطمة ماتت عاود ليها كلشي... هاد الهضرة لي خلاتها مصدومة وغير حالة فمها كتحاول تستوعب...

منصف: هادشي لي كاين.. الواليدة واش سمعتيني؟
الياقوت عينيها دمعو: الله يا وليدي كاع هادشي داز عليكم وفين هي زمرد مسكينة واش داز عليها هادشي كامل..

منصف: هي دبا فدار واليديها...
الياقوت: ديني عندها اولدي بغيت نشوفها ونعزيها...
منصف(بجدية): الواليدة من الأحسن ماشي دبا باغة ترتاح حتى لمنبعد ونديك عندها...
لالة الياقوت لي كتافات فقط تحرك ليه راسها بإيجاب...

منصف: باقي خاصني نهضر معاك!
الياقوت(بتعب): واش باقي كاينة شي حاجة مجايبة ليها خبار...
منصف: معاذ غادي يخطب رانيا...
لالة الياقوت(باستغراب): واش معاذ معااذ؟ وامتا هادشي بالسلامة...
منصف: هو هضر معايا وقاليا بلي إلى وافقنا غيجي ويطلب يديها من عندكم...

الياقوت تنهدات: اول اولدي اش غنقول ليك إلى هي بغات انا معندي منزيدهم غير الله يكمل بالخير بالحق خاصك تهضر مع باباك هو الأول...
منصف: باغة اماما باغية وبابا انا غنهضر معاه...
لالة الياقوت شافت فيه مضيقة عينيها: كفاش باغة واش رانيا باغية معاذ؟
منصف: والواليدة الله يهديك كون مكانوش باغيين بعضياتهم مكانش غادي يبغي يخطبها...

لالة الياقوت: احياني ولاد اليوم زربانين انا باك شحال هادي منين كان جا خطبني عمري شفت وجهو سميتو هي اللخرا مكنتش عارفاها. 
منصف لي عارفها غتبدا وهو ينوض جمع الوقفة...

منصف: الواليدة بسلامة انا غادي خدام...
لالة الياقوت(خنزرات فيه): امم يشويني فيك هضرة المعقول متبغيوهاش...
منصف (باس ليها راسها): والله يهديك الياقوت راه الوقت تبدلات ومن الأحسن متقوليش هاد الهضرة لرانيا غادي تحرجيها...
لالة الياقوت: غير سير سير مغنقول ليها والو...
منصف: ردي البال لراسك دواك شربيه فالوقت متنسايش...
لالة الياقوت: الله يرضي عليك اولدي بسلامة...

مشا منصف خرج  اما الياقوت ناضت للكوزينة تعاون معاهم فالغذا وخا كاينين الخدم مكلفين بكلشي ولكن عزيز عليها تبقا تعاون معاهم مرة مرة متبقاش غير جالسة...

#يتبع...