حب نتيجة خطأ طبي

الجزء المئة و الثاني و الخمسون

حب نتيجة خطأ طبي
#بارت152♡♡

تفكرات الفران ناضت طايرة لايكون داكشي تحرق...

حلات الفران بزربة خرجات منو ديك الطاوة جاب الله يالاه بدات كتحمر متحرقش..
اما منصف لب غبر متبعها بعينيه...
منصف: صافي حرقتي لينا العشا!
زمرد(طالعة ليها): متحرقش غير هنينا..

منصف لي ضحك بجنب جابت ليه ضحكة...
ناض عندها بغا يعاونها يحطو العشا...
منصف: فيناهما طباسل؟
زمرد: هاهما(شيرات ليه البلاكار)..
مشا هزهم داهم لفوق الميدة فالصالون ما الفرشيطات وكيسان ديال العصير اما زمرد لي دات العصير وداك الكراتان...
جلسات هي وجلس هو حداها قطعات ليها طرف وحطات ليه حتى هو فطبسيل وبداو كياكلو وهما ساكتين...

سالاو عشاهم هزات زمرد الماعن داتهم الكوزينة غسلاتهم دغيا ونشفات يديها وتمات خارجة حتى كيبان ليها باقي جالس...

زمرد: واش مغتمشيش؟؟
منصف: كتجري عليا!
زمرد: لا غير قلت مشا الحال
منصف: انا مغادي فين هنا فين غنجلس
زمرد: واش غتبات هنا؟؟
منصف: امم معجباتكش
زمرد: نعس فينما بغبتي انا غندخل ننعس.

تمات داخلا البيت مراداش البال لمنصف لي تابعها مع بغات تسد الباب كالاه برجليه ودخل.
زمرد لي غير كتعجب منين خرج ليها هدا..
زمرد: علاش تبعتيني لهنا؟
منصف دار عندها مركز فيها شوفة..
منصف: علاش باقي واخدة مني موقف؟ وخا راه شرحت ليك زعما شنو كاين

زمرد: مناش غناخد موقف انا ممقلقاش..

منصف: علاش كتعامليني هكا ازمر. علاش مصرة تحطي حواجز بيناتنا واش انا كنآديك؟؟
زمرد لي غير كدور فعينيها: لا انا محاطاش حواجز عادي كفاش بغيتيني نتعامل امنصف..
منصف: زمرد كلشي كيبين بلي نتي مباغاش هاد زواج نتي مصرة متعطيش فرصة لزواجنا وهادشي قرار ديالك نتي فالاخير نتي شوفي فاش مرتاحة...

مشا خرج وخلاها غارقة فالافكار ديالها سمعات صوت الباب ديال دار تسد عرفاتو غيكون مشا، جلسات فطرف ناموسية حاطة يديها على راسها كتخمم...

زمرد: اففف زعما نكون انا معاملتوش مزيان... ولكن كفاش متعطيش فرصة لزواجنا ؟؟؟ اش كيقصد هدا اشمن فرصة.... اففف مالي انا اش قلت ليه...
بقات كتخيط وتفصل غير بوحدها حسات براسها ضرها ومشات تكات باش تنعس شويا ولكن نعاس حلف لا زارها...

عند منصف لي مشا ركب طموبيلتو عفط عفطة وحدة موقف غير قدام البحر... البحر لي كيلقا فيه راحتو وصوت المواج كيضرب فالصخر والهدوء ديال الليل...
نزل من طموبيلتو وتمشا واقف مقابل مع البحر ويديه فجيابو والريح كيلعب بشعرو وعينيه السوداويتين كيتوسطهم واحد الغموض كبير...
واقف كيفكر فيها شكون من غيرها زمرد لي ولات ساكنة عقلو... كيفكر فحالتها لي كيفاش كانت وكيف ولات كيفكر فعلاقتهم لي مبقاش عارف واش مزوجين ولا لا.. هو فعلا منين قاليها عطي فرصة لزواجنا كان قاصدها وكيعنيها باغي يعطي فرصة لزواجهم ولكن زمرد باينة عليها مباغاش... هو منين تبعها لدار كان باغي يوقف معاها ويساندها ويهضرو فبزاف ديال الحوايج ولكن زمرد بحال ديما سادا عليه كاع البيبان

#يتبع...