حب نتيجة خطأ طبي

الجزء المئة و الثالث و الستون

حب نتيجة خطأ طبي
#بارت163♡♡

تعاشات العشية عند رانيا لي جالسة فبيتها حتى دقات عليها الياقوت حلا الباب بانت ليها رانيا جالسة فبيتها حاطة يديها على خدها ساهية كتفكر... تقدمات جيهتها حطات داكشي لي كانت جايبة ليها...

اما رانيا لي ساهية حتى بانت ليها ماماها جاية دغيا توكضات وكتشوف فيها..

رانيا: ماما شنو داكشي هازة فيديك؟؟
الياقوت: اللبسة لي غادي تلبسي غدا...

رانيا لي قلبها كيضرب فالتسعين حاسة بالستريس والخلعة كلشي تخلط عليها ولات كطلب غير يدوز كلشي بيخير..
الياقوت لي ردات ليها البال وباين على وجهها بلي مستريسية...

الياقوت(حطات يديها على كتافها): متخافيش ابنتي كلشي غيدوز بيخير وراه ضروري تكون فيك الخلعة اي بنت فهاد المناسبة كتكون متوترة...

رانيا: اه اه عادي نحس بحال هكا ياك غيكون كلشي مزيان؟
الياقوت(كطمنها): متخافيش كلشي غيكون مزيان غير نتي خاصك تنعسي مشا الحال ولا غادي يصبح ليك تحت عينيه كحل..

بتاسمات ليها الياقوت وتمات خارجة اما رانيا لي مشات هزات ديك اللبسة لي جابت ليها كتحل فيها باش تشوفها..
مع حلاتها ضهرات ابتسامة عريضة على شفايفها دليل على انه اللبسة عحباتها...

كان قفطان باللون الأزرق ملكي مرصع كامل بالأحجار من الفوق للتحت ومعاه حزام ديالو وصندالة باللون الأسود كلاص غتجيها مع القفطان... بقات كتشوف فيه شحال عحبها منبعد رداتو لبلاصتو ومشات تعلقو باش ميخسرش ليها وتاجهات لبلاصتها باش تنعس...

أصبحنا وأصبح الملك لله
صباح جديد باحدات جديدة
فالفيلا لي كلشي مشغول كلشي كيوجد للخطوبة لي غتكون خطوبة وفنفس الوقت غادي يديرو العقد.. داكشي علاش قررو يديرو غير حفلة صغير فيها العائلة والاقارب والأصدقاء فقط...

فالجردة ديال الفيلا فين كانو محطوطين الطبالي ديال المعازيم وطاولة خاصة بالكوبل والعدول...

عند رانيا فبيتها جالسة مقابلة مع المرايا ومعاها البنت لي كتقاد ليها الميكاب. تيليفون فودنيها كتهضر وهي مقلقة...

رانيا: وعفاااك اجي لعندي انا غنصيفط ليك شيفور ماشي حشومة تخليني فنهار بحال هدا مكاين لي يوقف معايا كلشي مشغول واصلا راه وجدت ليك اللبسة ديالك غير اجي..

زمرد(بقلة حيلة): الله معرفت اش غنقول ليك ارانيا... صافي وخا انا غنجي..

رانيا(فرحانة): صافي بيزو متعطليش...
قطعات عليها ورمات تيليفون فوق ناموسية وركزات مع البنت لي كتقاد ليها

عند زمرد فالدار لي جالسة فالبيت كتفكر متقدرش تقول لرانيا لا مغنجيش حيت غيبقا فيها الحال وهي عارفة رانيا نهار عرسها شحال وقفات معاها داكشي علاش متقدرش تخسر ليها... ناضت زمرد بزز منها دخلات لدوش دوشات عليها بالزربة خرجات نشفات شعرها وقاداتو سامبل ومبوكلي من التحت مدارتش ميكاب كاع.. قالت حتى تمشي وديرو مشات لاحت عليها سروال وتريكو وسبرديلة فرجليها وجمعات داكشي لي غتحتاج وخا حوايجها كاملين خلاتهم فالفيلا ولكن جابت معاها غير داكشي لي ضروري... هزات صاكها وشافت نضرة اخيرة فراسها بقات شحال كتخمم فاللخر قررات دير كريم ديال الشمس بوحدو

سالات وهزات صاكها وخرجات على برا سدات الباب كضور فعينيها على شي طاكسي.. حسات بشي طموبيل وقفات عند رجليها دورات راسها بان ليها الشيفور لي هبط من طموبيل...

احمد(شيفور): مدام زمرد صيفطاتني انسة رانيا نديك..
زمرد: اه يالاه كنقلب على طاكسي. .

مشا شيفور حل ليها الباب ركبات وركب حتى هو ديمارا متاجه للفيلا...

#يتبع...