حب نتيجة خطأ طبي

الجزء المئة و السابع و الخمسون

حب نتيجة خطأ طبي
#بارت157♡♡

دخلات الكوزينة ممنتابهاش لرانيا لي واقفة فدروج كاع هضرتهم سمعاتها مرة تصدم مرة تخلع مرة تفرح دارت 100 ردت فعل فداك الوقت وفرحات كتر فاش سمعات منصف قال بلي معاذ غادي يطلب يديها يعني منصف وافق وهنا تأكدات بلي فعلا باغيها مكيتفلاش عليها... طلعلت بجرية لبيتها والضحكة مرسومة على وجهها...

داز الوقت تقريبا 4 ديال العشية... نمشيو لمكان آخر..
بالضبط فالمطار كان غادي جار فاليز ديالو ونضارات على عينيه غادي باش يركب فالطائرة ديالو لي غادي تمشي لفرنسا..
اه هدا امجد لي منبعد كاع هادشي لي وقع قرر يمشي يخوي فمرة وحدة مقالها لحتى واحد حتى من حوايجو مشا الفيلا بالليل وهزهم وخرج بلا ميشوفو حتى واحد... 

~ بعد مرور اسبوع~ 🌕
اسبوع لي نقدرو نقولو متبدل فيه والو بالنسبة لزمرد...
من غير رانيا لي جا معاذ جاب الأم ديالو وختو وجا حتى عمو نيابة على باباه تقدم لرانيا على سنة الله ورسوله... بطبيعة الحال منبعد الموافقة ديال الأب ديالها لي وخا عارف أب معاذ مزيان اش دار ولكن هو تايق فمعاذ وكيعرفو مزيان ويقدر يأمن ليه بنتو بلا ميتردد...

رانيا حتى هي وافقات وكلشي داز مزيان تافقو على الموعد ديال الخطوبة حتى هو باش يركبو الخواتم منبعد العرس...

اليوم بحال كاع الأيام فاقو فطرو وكل واحد مشا لخدمتو زمرد لي باقي مرجعات للفيلا اما أمجد لي هضر مع باباه وقال ليهم بلي مشا لفرنسا وخا الياقوت معجبهاش الحال يمشي وهي كانت يالاه فاقت باقي حتى مشافتو ولكن قالت يقدر تكون عندو خدمة اما منصف لي عارف علاش مشا ومقال ليهم والو من غير خليوه على راحتو...

نمشيو عند الياقوت لي لبسات عليها حوايجها ولاحت عليها كاب من الفوق أو زيف لاحتو على راسها هزات صاكها ومشات خرجات لقات منصف كيتسنى فيها فالطموبيل... مشات ركبات حداه ونطالق بلا ميهضر...

داز الوقت وهاهو وقف حدا دار زمرد كاع ناس ديال الحي عينيهم عليه وعلى ديك الطموبيل لي راكب وكلشي باغي يعرف عند من جا حتى كتبان ليهم واحد المرا هبطات بلباسها الانيق باينين عليها الفلوس وشي عيالات كيوشوشو عليها اما البنات عينيهم غيخرجو على منصف وعلى طموبيلتو.. واحد جوج بنات بقاو ساهيين فيه حتى نغزاتهم واحد المرا...

المرا: نتوما جمعو عينيكم سيد راه مزوج.. 
البنت اللولة: ونتي شكون قاليك مزوج
المرا: هدا راه راجل بنت فاطمة الله يرحمها شفتو فالكنازة..

البنات لي سمعوها قلبو عينيهم وقالو" هاد دنيا شي عطاتو شي زواتو"
ومشاو مكملين طريقهم..
نرجعو عند منصف غير حط ماماه مشا دق فالباب ورجع ركب طموبيلتو مشا باش يخليهم يهضرو على راحتهم..

عند زمرد لي ناعسة بحال ديما هادي هي حالتها غير الماكلة والنعاس..
اليوم كانت ناعسة حتى سمعات صونيت فالباب جاتها عجب شكون غيكون دق عليها سيمانة هادي وهي بوحدها قليل إلى دق عليها شي حد غير جيران اولا مامات سارة لي مرة مرة كتجيب ليها الماكلة...

ناضت من بلاصتها لبسات بانطوفة فرجليها ودوزات يديها على شعرها غير من الفوق وتمشات جيهة الباب...حلاتو وهي تبان ليها الياقوت...
زمرد بقات كتشوف ليها شحال قارنة حجبانها وتساءل اشنو جابها لهنا غير ديك سيمانة خلاتها فغيبوبة ودبا كتشوفها قدامها حيت هي مفخبارهاش بلي فاقت وحتى من منصف عمرو جبد معاها هاد الموضوع...

#يتبع...