حب نتيجة خطأ طبي

الجزء العشرون

حب نتيجة خطأ طبي
#بارت20♡♡

فالشركة العمراني 🏢

كان جالس هو و معاذ و امجد كيدويو وكيتناقشو بخصوص الخدمة حتى نطق معاذ

معاذ: منصف اش بان ليك واش غتمشي الحفلة اولا لا؟؟
منصف(لي كيلعب بستيلو فوق البيرو) : ميل فمو معرفتش على حسب نقدر نمشي نقدر منمشيش...
امجد بحماس: فنضري اخويا خاصك تمشي گاع رجال الاعمال غيكونو تما ونتا خاصك ضروري تكون حاضر اولا لا؟! شكون عرف تقدر نتا لي تاخد الجائزة
معاذ مبتاسم: اول مرة نتافق معاك فشي حاجة
امجد: اوا شتي بعدا ههه
امجد ناض كيلبس فالتجاكيط ديالو
أمجد: سيادنا بسلامة عليكم
منصف لي مدوا متكلم من ديما معندوش مع الهضرة بزااف

معاذ: شي سهرة عوتاني؟
أمجد غمزو: اش بان ليك؟
معاذ: غنمشي معاك
أمجد: يالاه نوض

ناضو دراري غاديين للسهرة ديالهوم بحال ديما أمجد عاطيها غير لسهير و مدور بيه گاع البنات ضارب الدنيا بركلة ممسوقش؛ ولكن فالأمور ديال الخدمة والعائلة تلقاه واقف وقفة ديال الرجال..

اما منصف

لي بقا فالشركة خدام معندوش مع كترة الصداع والهرج كيبغي إبقا بوحدو كاالم

دخلات عندو السكريتيرة كيف ديما كتعوج عليه بارزة مفاتنها..
السكريتيرة بصوت مثير: مسيو منصف هاد الملفات خاصهوم توقيع ديالك
منصف: شير ليها بيديها زعما حطيهوم

وقع عليهم وعطاهم ليها وكتسناه يهضر معاها ساعة بحال الا كتكب الما فالرملة، كانت خارجة حتى سمعاتو نطق

منصف: وقفي

دارت عندو فرحانة على بالها باغيها و قلبها تينقز

منصف: جيبي ليا قهوة دبا تكون عندي
السكريتيرة: احم اوكي مسيو

خرجات و هو هبط راسو خدام على واحد الصفقة لي مهمة

عند كنزة

لي جمعات الدار رداتها كتشعل و الكوزينة حتى هي نقاتها و قاداتها جمعات گاع ديك الكركبة لي كانت فالدار وبدات كتوجد فالعشاء ليها هي و زمرد

أما زمرد خرجات من البيت باش تمشي تشرب حتى شافت الدار نقية ومهوية وريحة ديال الطياب عاطيا من الكوزينة ، ابتاسمات بلاما تحس و ارتاحت نوعا ما حيت حتى ديك الفوضى والكركبة كتأثر على نفسية الإنسان.. تمشات حتى وقفات عند باب الكوزينة كتبان ليها كنزة عاطياها بالضهر كطيب وريحت طياب عاطية زوينة..

تفكرات أيامها مع ماماها وملي كانت كترجع من لافاك وتعاونها فالطياب وكلشي

تمشات ناحية كنزة ونطقات

زمرد:نعاونك ا خالتي؟؟
كنزة بتاسمات: اه اجي ابنتي هاكي (مدات ليها طباسيل) قادي هادو فوق الميدا

شدات من عندها زمرد داكشي وجلسات كتقاد معاها حتى سلات و جلسو تياكلو فصمت حتى نطقات كنزة كاسرة داك سكات لي بيناتهوم

كنزة بفضول: واش ابنتي مكتقرايش؟ بنتي ليا باقي صغيرة..
زمرد سكتات شحال: كنقرا غير مببقيتش كنمشي و صافي
كنزة: وعلاش مكتمشيش

زمرد لي سكتات حيت معرفات باش تجاوب

كنزة: عاودي ليا ابنتي قولي ليا مالك! (حطات داكشي من يديها) حسبيني بحال ماماك

زمرد لي الدموع تحجرو فعينيها و واحد الغصة واقفة ليها فالحلق؛ حبسات من الماكلة وبقات ساكتة عاد نطقات وهي باين عليها الحزن

زمرد بحرقة: توحشت ماما
#يتبع...