حب نتيجة خطأ طبي

الجزء المئة و الخامس و الخمسون

حب نتيجة خطأ طبي
#بارت 155♡♡

أصبحنا وأصبح الملك لله...

صبح صباح جديد بأحدات جديدة فالفيلا ديال العمراني..

مجموعين على طاولة ديال العشا كل من سي محمد ورانيا ولالة الياقوت وكنزة.. كيفطرو وهما فرحانين حيت الياقوت فاقت وفرحانين حيت شحال هادي متجمعو على الماكلة واخا ناقصهم امجد ومنصف لي حتى واحد باقي معارفهم فين مشاو...

باقي كيفطرو حتى تسمع صونيت ديال الباب ستغربو حيت مكيتسناو حتى واحد مشات الخدامة تحل الباب وما هي الا تواني حتى بانت ليهم حفصة ومعاذ و زينب جايين هازين فيديهم الورد فرحانين بلالة الياقوت واخا حفصة حشمانة منهم ولكن كتبقا الياقوت صاحبتها ومن زمان واكيد غادي تفرح ليها إلى فاقت...

قبل الياقوت لي بانت ليها ناضت عندها والابتسامة مزينة شفايفها بطبيعة الحال مفراسها ميتعاود باقي مقالو ليها والو سي محمد لي عارف بوحدو ورانيا لي مفاهماش القصة غير داكشي لي عاودو ليها وصافي....

لالة الياقوت(بإبتسامة): مرحبا بيكم نورتونا دخلو مرحبا بيكم...
سلمات عليهم كاملين وشدات من عندهم الورد وسلمات حتى على زينب خت معاذ صغيرة من طبعها سكوتية ومكتعمرش مع ناس بزاف وحتى إلى خرجات كتخرج مع ماماها ولا خوها....
دخلو لداخل منبعد ما قالو ليها على سلامتك...

مشاو لصالون جلسو وجلسات معاهم حتى رانيا لي غير كضور فعينيها باس متجيش فعين معاذ لي حاضيها...

بقاو مجمعين والخدامة جابت ليهم الضيافة معاذ لي جالس ومقابل مع رانيا ولالة الياقوت مقابلة مع الباب حتى كيبان ليها منصف داخل من الباب شعرو مخربق وملامح وجهو لي عاقدهم...

لالة الياقوت: مننصف ولدي اجي راه عندنا ضياف!
منصف دار شاف فيها وبتاسم ابتسامة فوق الخاطر وقال...

منصف؛ واخا الواليدة نبدل عليا ونجي...
مشا طلع لبيتو معندو خاطر يجلس مع حتى واحد عيان عضامو بحال إلى واكل فيهم العصى وهو الليل كامل ناعس فالطموبيل ولكن بزز منو يدير الخاطر لماماه معندو كيدير...
طلع الفوق دخل دوش حيد عليه العيا لبس حوايجو تعطر وقاد شعرو وهبط عندهم سلم عليم كاملين وعلى معاذ لي سلم عليه عادي... ومشا جلس بلاصتو وعينيه كيضورو غير بين معاذ ورانيا حاضيهم ممخليش ليهم فين يرمشو..

معاذ لي عاق بيه مبقاش هز عينيه فرانيا وحتى رانيا مشات كتجبد الهضرة مع زينب غير باش تنسي دوك شوفات لي كيدير فيها منصف...

بقاو جالسين كل واحد كيهضر مع لاخر حتى نطق معاذ...

معاذ: احم منصف ممكن نهضرو شويا...
رانيا لي سمعاتها هزات عينيها بزربة فمعاذ مخنزرة وكدير ليه براسها زعما شنو باغيه اما معاذ لي غير حرك ليها راسو زعما كوني هانية...

منصف شاف فيه مخنزر وناض خرج لجردة ومعاذ تبعو مباشرة...

وصل عندو وبقا واقف موراه ومنصف عاطيه بالضهر...
منصف: واش انبقا نتسنى فيك هنا ولا شنو؟؟
معاذ: غادي نهضر معاك راجل لراجل وغتسمعني بلا متقاطعني نسالي وديك ساعة دير لي عجبك...
منصف: امم كنسمعك...
معاذ: نجلسو بعدا مغنهضروش واقفين!!

مشا منصف جلس فوق واحد الكنابي مقابل مع لابيسين ومعاذ مقابل معاه مشابك يديه مع بهضياتهم وكيرتب الهضرة منين غيبدا...

منصف(مطلع حاجب): يالاه كنسمعك..
معاذ(قلب ملامحو لجدية): منصف عارف داك نهار فاش لقيتيني مع رانيا احم(توتر) عارف داك المنضر مكانش عليك تشوفو ولا نقولو انا مكانش عليا نطيح معاها فداك الموقف.. ولكن الحاجة لي بغيتك تعرفها هي انه انا ختك كنبغيها( قالها وبقا مركز مع ردة فعل منصف لي مكانتش عندو شي ردة فعل فقط كيسمع ) انا مباغيهاش نبقا نتفلا عليها انا ناويها الحلال نشاء الله والا مكنتش غنجي ونهضر معاك نتا بالضبط فهاد الموضوع... وكون على يقين إلى نتا وافقتي وقبلتي غنجيب واليديا من غذا( دغيا ملامحو تقلبو لحزن)...

منصف: كمل كنسمعك..

معاذ؛ عارف مزيان شنو دار معاكم بابا وبلي متقدروش تنساوه ولكن(طلع فيه عينيه) انا هادشي مكانش فخباري وعمري كنت غندير شي حاجة لي تآديك نتا ولا تآدي زمرد... فالاخير حنا كنقصد انا وماما وختي معندنا حتى دخل فهادشي... وهداك راجل لي سميتو بابا( ورك على يديه بالجهد حتى تحبس ليها دم) مبقيتش عارف فين هو عمري شفتو من داك نهار اقدر اكون رجع لخدمتو شكون عرف...

#يتبع....