حب نتيجة خطأ طبي

الجزء ثمانون

حب نتيجة خطأ طبي
#بارت80♡♡

فاطمة مشات وقفات حدا بنتها: الله يخليكم لبعضياتكم..

ابتاسمات ليها زمرد و هي حشمانة... تمو خارجين الحديقة كانت واحد الطبلة محطوطة تما تقدمات لالة الياقوت جلسات و حداها فاطمة و زمرد  ورانيا من الجهة لاخرا اما منصف لي مشا كيهضر ابيل عاطيهم بالظهر...

فالدخلة ديال الحديقة كانت الصحافة لي جاية باش تنقل خبر زواج منصف العمراني و هما مقاداهم فرحة و علاش لا و هما غيكونو اول جريدة غتنقل الخبر... مشاو قربو وقفو حدا الطاولة واحد هاز كاميرة و شي هاز مدكرة كيكتب فيها الأسئلة و لاخر شاد كاميرة كلها فاش خدام كيتسناو مدام العمراني تقول الخبر ديالها...

الصحفي الأول: مدام العمراني فايت لينا سمعنا بخبر زواج ولدك وخا تقولي لينا امتى تزوجو بالضبط؟
لالة الياقوت بابتسامة: اه الخبر لي سمعتوه صحيح شهر هادي باش تزوج
الصحفي الثاني: وعلاش عاد بغيتو دير العرس...علاش مدرتوهش هاد المدة كاملة..
الياقوت: حيت بابات زمرد لي هي الزوجة ديال منصف كان توفى الله يرحمو و مقدرناش نديرو العرس...
الصحفي الأول: شكون لي غينظم الحفل؟
لالة الياقوت: بطبيعة الحال مغناكلفش أنا! واحد صاحبتي عندها شركة تنظيم الحفلات هي لي غتكلف..
الصحفي الثالث: و فستان العروس غيكون من مصمم مشهور؟ والا كان آه شكون هو؟
لالة الياقوت ابتاسمات: هاد السؤال الجواب ديالو انخليه حتال العرس باش ندير التشويق شوية
الصحفي الثالث: كفاش تعرف مسيو منصف على مراتو؟ واش زواجهم عن حب و لا تقليدي؟

منصف لي واقف حدا زمرد خاشي يديه فجياب و كيصوط الدخان من نيفو محاملش الوضع و قوة الأسئلة معندوش مع الهرج بزاف كون ماشي ماماه لي حالفة عليه يبقا مغيجلس يسمع لهادشي...

لالة الياقوت: بالنسبة لكفاش تعارفو عن طريقنا حنا حيت عائلة زمرد أصدقاء ديالنا و من تما تعارفو، و بالنسبة لواش زواج عن حب ولا تقليدي زواج راه تقليدي...

كلشي طلع عينيه مصدوم الصحافة لي غير كتعجب كفاش ولد عائلة العمراني مزوج زواج تقليدي... اما منصف تعصب و تفقص كفاش زواج تقليدي غير جات و قالتها بلا متفكر... زمرد غير ساكتة و كتشوف مدارت حتى ردة فعل..

الصحفي الثاني: و امتى عندكم العرس؟
لالة الياقوت: من هنا ل 3 يام العرس انشاء الله...
الصحفي الثاني: اوك شكرا ا مدام على وقتك لي عطيتينا..

مشا سلم على منصف حتى هو و تمنى ليه ادوز كلشي بيخير و على خير و عزاه فنسيبو لي مات.. منصف اكتافى فقط بابتسامة فوق من خاطرو... مشاو الصحافة خرجو فحالهم من بعد ما سمعو جميع المعلومات لي بغاو و هما راضيين على الوضع...

نرجعو عند لالة الياقوت لي الضحكة واصلة ليها الودنين حيت اخيرا كلشي غيسيق خبر زواج ولدها حتى قاطعها صوت منصف...

منصف مخنزر: الواليدة اش هادشي درتي؟

شافت فيه لالة الياقوت باستغراب: اشنو درت اممم؟
منصف محمر فيها: كفاش زواج تقليدي واش عارفة اش قلتي ا الواليدة

لالة الياقوت بعصبية: وشنو بغيتي نقول ليهم؟ بلي بين ليلة و نهار تزوجتي و بلا خبارنا معرفناه تقليدي و لا عصري و زايدها معارفين حتى اصلها و فصلها، هادشي لي بغيتيني نقول...؟!

#يتبع...