حب نتيجة خطأ طبي

الجزء المئة و الثالث و الثلاثون

حب نتيجة خطأ طبي
#بارت133♡♡

تفكر فاش ساقت خبار موت باباها وبلي داوها للصبيطار وملي فاقت دخلات فانهيار عصبي... راسو كيزدح المشاكيل ميكيتقاداوش كيصوني على معاذ مكايجاوبوش.. فكر حتى عيا فالاخير دوز نمرة سارة. 

منصف: الو سارة؟؟
سارة: وي صافا... امضرا شي خبار على زمرد؟
منصف: لقيناها اليوم...
سارة عينيها توسعو بالفرحة: حلف بالله اخيرا وكيف دايرة حالتها هي دبا واش بخير؟!
منصف: ماشي هادشي علاش صونيت ليك
سارة: وشنو واش...! ياكما واقعة شي حاجة لزمرد... غير قول بلا متخبي عليا
منصف: ماماها...
سارة: مال خالتي فاطمة؟
منصف: الله يرحمها ماتت..

سارة بحال الا كبيتي عليها سطل ديال الما...

سارة: كك كفااش كفااش ماتت اش كتخربق نتا واش عارف اشنو كتقول...
منصف: هادشي لي كاين حتى انا عاد سقت الخبار..

سارة دموعها خانوها مقدراتش تهضر مزال.. قطعات عليه وجلسات فطرف ناموسيتها حاطة مخدة على وجهها كتبكي وتندب وتقول مابكيت... فاطمة كانت بحال ماماها عمر شافت منها شي حاجة ديال العيب ديما كتعاملها مزيان وحتى سارة عزيزة عليها متقبلاتش فكرة انها ماتت..

تحل الباب كانت ماماها لي دخلات منين سمعات صوت شهقاتها...

رحمة: سارة بنتي مالك كتبكي ياك شي باس مكاين...
سارة: ماما(تلاحت عليها معنقاها) هئىىئ هئئئ  خالتي فاطمة ماتت هئئىى
رحمة شهقات وتصدمات: ياويلي ابنتي اش كتقولي نتي...
سارة: اه اماما هئىئ هئئىى يالاه صونا ليا منصف قالها ليا امكن ماتت غير هاد صباح عرفتي اماما مقادراش نتيق هئئئ كانت من أطيب خلق الله...
رحمة: الله يرحمها و يوسع عليها ويجعل مثواها الجنة فعلا كانت انسانة طيبة مكتادي حتى واحد...(تنهدات) ربي بغاها والموت علينا حق...

بقات سارة كتبكي وماماها كتواسي فيها حتى تهدنات وناضت للحمام غسلات وجهها...

الضلام طاح ومنصف باقي فالمستشفى كيتسنى زمرد امتا تفيق...

نرجعو الفيلا

رانيا وسي محمد وامجد لي جالسين مجموعين على طاولة العشا وحتى واحد معندو خاطر الماكلة.. رانيا لي شادة فرشيطة كتلعب بيها فطبسيلها وعقلها كيخمم... حتى قفزها صوت باباها...

سي محمد: رانيا كولي ابنتي متلعبيش بالماكلة...
رانيا: معندو منين ادوز ليا ابابا.... حتى فرحت قلت بلي واخيرا زمرد رجعات والفرحة ديالنا مكملاتش...
سي محمد: متاخديش فخاطرك ابنتي هادا هو المكتاب والحياة صعيبة...
رانيا: عارفة... مهيم بصحتكم تصبحو على خير انا غنطلع نرتاح عيانة...

ناضت رانيا طلعات لغرفتها سدات عليها ومشات لبلاكار جبدات بيجامة توبها حرير فاللون الكري لبساتها ومشطات شعرها دارت روتينها الليلي ومشات تخشات فبلاصتها....بقات كتقلب والنعاس حلف لاجا... ناضت مشات هزات واحد تريكو لبساتو عليها هبطات لتحت مالقات حتى واحد خرجات للجردة مشات جلسات ساهية بعيد مربعة يديها كتسمتع بجو الليل لي هادئ...

موراها بالضبط باقي واقف كيشوف فيها كيفكر واش امشي عندها ولا لا ولكن بأشمن وجه غيمشي اجلس حداها!!!

بقا كيفكر فالاخير تقدم بخطوات تقال عندها... مشا جلس حداها دور راسو كيشوف قدامو...

#يتبع...