حب نتيجة خطأ طبي

الجزء المئة و الرابع و الثمانون

حب نتيجة خطأ طبي
#بارت184♡♡

الداخل فالفيلا

فالصالون جالسة الياقوت هي ورانيا وحاطين قدامهم صينية تاع اتاي مع تقيوتات باش ادوزو.. حتى دخلات عليهم زمرد وهي مبتاسمة..

زمرد: رانيا توحشتك..

رانيا(ناضت عندها معنقاها): حتى انا توحشتك بزااااف...
بقاو معانقين شحال حيت شحال هدا متشاوفو بحكم كانت راينا هي ومعاذ مشاو لشهر العسل طولو فيه شويا ويالاه جاو..
حيدات زمرد صباطها ومشات جلسات حداهم مشاركاهم فالجماعة حتى هي..

فالجردة فين كان منصف جالس يالاه سالاو خدمتهم جمعو كاع شغلهم وكل واحد مشا فحالو..
اما منصف لي بقا جالس جبد تيليفون من جيبو ودوز الخط كيتسناه اجاوب...

دازو تواني على رد على الخط..
منصف: سعد..

سعد:وي منصف صافا.؟

منصف: صافا.. كي غادي مع إياد.. كي دايرة خدمتو...

سعد: تبارك الله عليه فاهم كلشي وراه غادي شويا بشويا.. غير هو انا..

منصف: نتا مالك!؟

سعد: غادي يخصني ضروري نمشي برا البلاد واقدر نستقر تما ولدي مريض وخاصو علاج فاسرع وقت اقدر نمشي فهاد اليامات نيت...

منصف: نتا غير سير دي ولدك اتعالج وكون هاني مغادي تجي فين ترجع حتى تلقا الشركة وقفات على رجليها وباقي غادي تعرف فالسوق.

سعد: انشاء الله يالاه خليتك على خير..
قطع عليه منصف الخط وبقا ساهي كيفكر قدامو.. فهادشي لي دار واش اياد غادي يتقبلو ولا لا...

حيت منصف هو وسعد تافقو اديرو شركة صغيرة بجوج ويبداو يكبرو فيها شويا بشويا حتى توصل لفين بغاوها توصل.. ولكن منصف فكر فالاخير وقال انساحب من الأحسن ويخلي إياد هو لي يتكلف بيها حيت ديما منصف كيقول ليه اجي خدم معايا والى بغا كاع ادخل معاه شريك ولكن ديما كيرفض بداعي انه بغا شي مشروع ديالو لي يكبر هو.. ودبا منصف لي ضبر ليه فخدمة بلا خبارو وهو متأكد بلي إياد مغاديش اقبل الى قالها ليه وفضل اقوليه راه الشريكة ديال سعد.

نمشيو لداخل فالفيلا فين كانت رانيا يالاه كتلبس سبرديلتها حيت قاليها معاذ بلي خاصهم امشيو...
سلمات رانيا على دار كاملة وتمو خارجين هي ومعاذ ركبو فالطموبيل وكسيرا..

رانيا: معاذ كون غير خليتيني نجلس معاهم شويا.. شحال هذا مشفتهم.

معاذ: حتى لمرا خرا احبيبة اليوم الواليدة عارضة علينا العشا...

رانيا: نشاء الله..

فرنسا..(باريس)🔥

سارة يالاه خارجة من لافاك كتضحك مع البنات لي تعرفات عليهم غير مؤخرا..
بعيد عليها كان واقف بطموبيلتو السوداء زاج ديالها فيمي مكيبانش منها.. مركز فيها الشوفة وعينيه كون كانو قرطاس كون قتلوها..

بقا حاضيها حتى تفارقات مع البنات وبانت ليه بغات تشد طاكسي مشا بالزربة تبعها بالطموبيل موقف غير حداها حل الباب ديال الطموبيل جرها عندو حتى دخلات وسد الباب وعفط عفطة وحدة..

اما سارة لي كانت واقفة معليها مابيها حتى كتحس بشي يد قوية جراتها قلبها زدح بالزربة تخلعات كون متمالكاتش راسها كون غوتات وطلقات دموعها اخرجو...

#يتبع...