حب نتيجة خطأ طبي

الجزء المئة و السابع و الستون

حب نتيجة خطأ طبي
#بارت167♡♡

تقدمات الياقوت حتى وقفات مقابلة معاهم وعلى وجهها ضحكة لي كتعبر على الفرحة ديالهم..
دارت ليها بعينيهم زعما بداو!

تقدم معاذ هو اللول هز كاس ديال الحليب فيديه ودار جيهة رانيا لي مبتاسمة قرب حداها ومد الكاس جغمات منو شويا وحيدو وهز كلينيكس مسح ليها جناب فمها...
رانيا حتى هي دارت نفس شي هزات الكاس جغم منو ورجعاتو...

وجا وقت تركاب الخواتم مد معاذ يديه البواطة هز داك الخاتم وسرح يديه جهة رانيا زعما تمد ليه يديها داكشي لي دارت شد يديها بين يديه وركب ليها الخاتم لي جاها عبار و حتى رانيا عجبها...

مدات رانيا يديها هزات خاتم ديال معاذ وركباتو ليه حتى هو وبعدات راسمة ضحكة على وجهها قرب منها معاذ طبع قبلة على جبهتها ويديه ملوية على خسرها...

تسمعات واحد تزغريتة فأرجاء المكان لي بقات كتردد فالمسامع ديال الحضور سرعان ما تبعاتها تزغريتة خرا هاد المرة كانت ديال كنزة شدات فيها شحال هاد طلقاتها ودارت شافت فالياقوت وضحكو...

وصل الوقت باش يكتبو العقد قربات رانيا جر ليها معاذ الكرسي حتى جلسات وجلس حتى هو حداها وزمرد ومنصف لي جالسين من الجهة لاخرا...

بقاو كيتسناو العدول يبدا...

قرب ليهم داك الكتاب وستيلو باش يسنيو ديجا مقادين كاع الوراق وداكشي لي غادي يخصهم غير بغاو اديرو العقد وسط الخطوبة قدام كلشي...
هز معاذ القلم قرب لجهة الكتاب سنا بزربة وعطا لرانيا حتى هي تسني..

هزات القلم ويديها كيترعدو من كترة ستريس وقعات حتى هي وتعلنو زوج وزوجة..

معاذ لي مقاداه فرحة اخيرا البنت لي كيبغي وباغيها من شحال هادي ولات مراتو وحلالو دار كيشوف فرانيا لي مخلطة ليها الفرحة مع البكية والتوتر لاعب عليها حتى هو...

مد معاذ يديه حطها فوق من يديها ونطق..

معاذ: رانيا اخيرا وليتي مراتي..
رانيا دارت شافت فيه شحال وكلمة مراتي جاتها عجب اول مرة تسمعها من فمو جاوباتو حتى هي...
رانيا: ونتا وليتي راجلي...

معاذ لي بتاسم مطول وشاف فيها..
معاذ: هااح شحال خارجة من فمك حلوة...
رانيا حشمات وحدرات عينيها اما معاذ لي دار لقا منصف كيشوف فيه...

معاذ: مالك كتشوف فيا ممنوع نهضر مع مراتي ههه
منصف خنزر فيه: عرفناها مراتك احتارمنا غير حنا لي جالسين..
معاذ(كيطنز عليه): اوا اخويا ختك ولات مراتي مشات يامات كنتي كتقول ممنوع تشوفها حتى تزوجو...

رانيا لي عفطات ليه على رجليه..
رانيا بهمس: سكت اش كتقول دبا تصدقو منوضينها..
معاذ: متخافيش عارفني غير ضاحك...

بقاو كيتحدثو هضرة تجبد هضرة حتى تطلق الشعبي مجهد ناضت الحيحة وروينة كلشي ناض يشطح جاو صحابات رانيا وبنات عائلتها جروها عندهم باش تشطح وخا معاذ مبغاش ولكن بقاو عليه حتى خلاوها هو بقا جالس مع منصف وزمرد لي حلف عليها منصف وتنوض حتى يقطع ليها رجليها اوا جلسات على وعدها وسعدها كضور فعينيها وتشطج غير بلاصتها وتصفق...

بقاو على داك الحال شحال ناس كيشطحو كلشي فرحان حتى فات الليل دغيا وصلات 4 ديال الصباح ناس بداو كيتفرقو كل واحد توجه لدارو يرتاح ومنهم رانيا لي توادعات مع عائلتها وخا قصحات قلبها باش متبكيش ولكن مقدراتش مسخاتش بواليديها مسخاتش تمشي وتخليهم وهي حياتها كاملة عايشة معاهم معرفاتش واش غتولف على البعد ديالهم ولا لا...

جا معاذ شدها كيواسي فيها وداها لطموبيلتو ركبها وركب حتى هو حداها وتمو منطالقين خلا ماماه وختو حتى يديهم شيفور...

داز الوقت

وهاهما وقفو قدام واحد الدار كانت بارطمة صغيرة وزوينة فحي زوين وحداها واحد الجردة لي عاطياها منضر زوين...

هبطات رانيا تابعها معاذ خشا يديه فجيابو وجبد ساروت وحل الباب...

معاذ: مرحبا بيك دخلي..
رانيا: ديالمن هاد دار امعاذ؟
معاذ: ديالي معجباتكش
رانيا: لا بالعكس زوينة..

دخلو الداخل مشات رانيا لي كتمشى غير بشويا ودور عينيها فالدار ديكورها لي كان كلاص وزوين مع الدخلة كيبان ليك صالون لي مفرش كامل... معاذ حتى هو خلاها على راحتها ومشا رجع حل الكوفر ديال طموبيل هز الفاليزات ديال رانيا كيدخلهم وحدة بوحدة حتى كملهم ودخل لقا رانيا جالسة مرجعة راسها اللور مغمضة عينيها...

معاذ: رانيا مالك؟
رانيا: والو غير عيانة...

#يتبع...