حب نتيجة خطأ طبي

الجزء الثاني و التسعون

حب نتيجة خطأ طبي
#بارت 92♡♡

وصلو حدا الفيلا هبطو البنات كيتماشو شادين فزمرد كل وحدة من جهة.. دخلو الحديقة لي كانت فوق من زوينة واعرة بالجهد و الديكور لي مقاد الطبالي فكل مكان و الاضاءة لي دايرين بالحديقة و فالوسط كاينة واحد الميدة كبيرة دايرين بيها الكراسى ديال عائلة العريس و العروسة.. اما فالطرف لاخر كانت بلاصة العرسان لي مقادة باللون الذهبي فيها مخيدات محطوطين داكشي الفريع... و صالة خاصة غير بالديدجي و الاغاني...

لالة الياقوت شافت الديكور وابتاسمات برضى تماما كيف ما قالت ليها حيت صاحبتها و كون مكانتش كتيق فيها مغتأمنش ليها باش تقاد ديكور العرس.. دخلو الداخل فالفيلا فالصالون الكبير كاينة تما بلاصة خاصة العروسة كتكون جالسة فيها ليلة حنتها هي و البنات لي كتعرض عليهم..

لالة الياقوت: البنات طلعو الفوق بدلو حوايجكم بينما جاو البنات و هاد الصالون هو فين غتجلسو...

داكشي لي كان طلعو الفوق جلسو زمرد فوق الفوطوي و حلفو عليها مدير شي حاجة هما غيتكلفو بكلشي... مشات سارة كتقاد ليها فشعرها بالبلاك رداتو ليها سامبل و لواتو ليها من التحت جاها غزال.. و مشات للضفيرات كتصبغهم ليها و تقادهم..

اما رانيا لي مكلفة ليها بالميكاب ديال وجهها و وركزات على انه يكون خفيف و بارز جمالها...

سالاو الميكاب شافو فيها البنات وقالو"تبارك الله" الميكاب لي جاها كيحمق خفيف ركزات ليها على عينيها لي جبداتهم ليها بايلاينر...

سارة: تبارك الله جيتي كتحمقي اختي الله يحجبك من العين...
رانيا: هاي هاي خويا دا الزين تبارك الله عليك..

زمرد لي ابتاسمات ليهم... قاطعهم صوت دقان فالباب كانت الخدامة لي داخلة و هازة فيديها واحد القفطان..

رانيا: اش داكشي لي فيديك؟
الخدامة: هادا صيفطاتو لالة الياقوت لزمرد قالت ليك لبسوها و هبطو راه البنات بداو كيجيو واقيلا صحابات زمرد..
رانيا:اه صافي شكرا ها حنا هابطين دبا...

خرجات الخدامة اما سارة لي تقدمات و هزات داك القفطان كان لونو باللون الاخصر و طويل فيه طرز فالقدام و اليدين ديالو باللون الذهبي كيجي حتى التحت فيه واحد الفتحة مدورة عليها سفيفة ذهبية مع المضمة ديالو..

سارة: هادشي غزال ماماك عندها دوق و حتى زمرد غيجيها غزال..
رانيا: اه زوين... زمرد كي جاك الا معحبكش نشوفو ليك شي حاجة خرا..
زمرد: لا لا البنات زوين عجبني... فراسكم؟؟

البنات كاملين شافو فيها و قالو : شنو؟؟

#يتبع...