حب نتيجة خطأ طبي

الجزء المئة و السادس و الستون

حب نتيجة خطأ طبي
#بارت 166♡♡

عند زينب لي واقفة مع البنات من عائلتها متهضر معاهم وتضحك حتى نغزاتها واحد بنت عمتها..

اسماء: زينب شوفي داك تيتيز من قبيلا وهو حاضيك ياختي شحال فن..
زينب دورات عينيها وهي تلقاه باقي كيشوف فيها بقات كتشوف فيه شحال وتفكر فين شافتو حتى تفكرات بلي هو خو منصف وهي تهبط عينيها حشمانة...
زينب: متبقايش تشوفي فيه ا أسماء غيقول غير نتي مزعوطة فيه..
اسماء هزات كتافها: على اساس معجبنيش..

بقاو البنات كيهضرو ومجمعين حتى وصل وقت الماكلة مشاو جلسو كل وحدة فبلاصتها وعاود سربايا جايين هازين أطباق فيديهم وزعوهم على الطبالي وكيسان ديال العواصر اما فواحد الطابلة لي كانت مزينة باينة ديال العرسان كانت جالسة رانيا ومعاذ وحداهم الياقوت وحفصة وسي محمد ومنصف مجموعين كاملين...

داز الوقت وصل وقت تركاب الخواتم وكتاب العقد..

ناضت رانيا مشابكة يديها مع معاذ تقدمو للوسط بقاو واقفين وناس كيباركو ليهم والضحكة ممفارقاش وجههم..

اما عند زمرد لي واقفة جامعة يديها عندها ودور فعينيها وتبتاسم للضياف حتى حسات بشي حد وقف حداها.. دورات عينيها بان ليها منصف لي واقف كيشوف قدامو بقات كتشوف فيه شحال.. وكفاش كيبان انيق فديك اللبسة لي كانت عبارة على سروال تجين فالكحل مع فيست حتى فالكحل وقميجة بيضة فالتحت مع سبرديلة بيضة حتى هي وساعة كتوسط يديه شعرو لي مطلعو الفوق بطريقة عصرية وريحة بارفان ديالو كتشم منين ومنين... زمرد مزعزعاتش عينيها للحضة سهات فزينو كيبان رجل ذو ملامح شرقية رجل حرش لي رجولتو طاغية كتخليك تحتارمو بزز وعقليتو لي ناضجة مفيقها من سهوتو غير صوت منصف لي هضر معاها...

منصف: عبجتك ولا شنو!!
زمرد متوترة: ااا اه الاا زعما..

منصف حابس ضحكة: ابشويا عليك مالك..
زمرد: احم والو مهيم نخليك نمشي عند رانيا!
يالاه تحركات حتى جرها منصف من يديها متبتها فبلاصتها وهضر من تحت سنانو...

منصف: رانيا راه واقفا مع راجلها غير نتي لي كطيري جلسي بلاصتك وتبتي وباقي غنتفاهمو على هاد اللباس...

زمرد لي غير مخرجة عينيها من تصرفاتو لي مبقاتش كتفهمهم مرة معصب مرة مهدن ومرة ضاحك بقات تالفة وباش كملها منين شابك يديها مع يديه ومزير عليها ممخليش ليها فين تحرك...
زمرد طلعات فيه عينيها قارنة حجبانها.
زمرد: اش كدير؟ راك زيرتي ليا على يدي!!

منصف شاف فيها ورخف منها شويا هو دار هاد التصرف غير باش يبين لكلشي بلي هي ديالو وماشي من حق اي واحد يشوف فيها.. خصوصا واحد خونا منين يالاه بدا الحفل وهو حاضيها.. منصف محملو مقبلو مكرهش امشي اتلاح عليه ويقول ليه بلي هاديك لي كتشوف فيها راه مراتي وديالي غير مقال ليه راسو وصافي.. اما تصرفاتو هو براسو مبقاوش عاجبينو.. ومخلاهاش تمشي تحرك عند رانيا حيت مباغيش تمشا ويبقاو ناس حاضينها خصوصا لابسة داك القفطان مبين طايتها كاملة...

بقات زمرد واقفة شحال ومنصف متزعزش من حداها حتى عيطات ليهم كنزة وقالت ليهم راه غادي يركبو الخواتم وخاص يكونو حاضرين باش يشهدو على زواجهم..
زمرد يالاه تحركات حتى جرها منصف عوتاني مخنزر وزمرد كتر منو..

زمرد بعصبية: شنو مالك؟!
منصف غمزها: نتي لي مالك كطيري غير بوحدك.
زمرد بصدمة: مسمعتيهاش اش قالت؟ راه غادي يركبو الخواتم دبا..
منصف ببرود: زمرد ديري عقلك! واش غتمشي نتي ونبقا انا تابعك!!

زمرد شافت فيه ديك شوفة ديال شنو؟

منصف شاف فيها وتنهد جرها لعندو مدور يديه على خصرها شاف قدامو.. وتم غادي كيتمشى وزمرد كتمشى معاه فنفس الخط كتقرقب بطالونها وداك القرب لي بيناتهم باقي مولفات عليه عاد مزادها توتر...

وصلو حدا العرسان لقاوهم واقفين مشاو وقفو حداهم.. حتى كتبان ليهم الياقوت جاية هازة بلاطو فيديها باللون الذهبي كيبري، فيه جوج كيسان ديال الحليب مدور عليهم شريط باللون الأحمر والتمر حتى هو وجوج بواطات وحدة فيها خاتم ديال معاذ وحدة خاتم ديال رانيا لي كان خاتم باللون الابيض كتوسطو الماسة فالوسط ديالو.. خاتم سامبل وفنفس الوقت زوين وأنيق من دوق معاذ هو لي ختار ليها الخاتم بلا ميوريه ليها...

#يتبع...