حب نتيجة خطأ طبي

الجزء مئة و ستة

حب نتيجة خطأ طبي
#بارت106♡♡

فالداخل فالجردة منصف وامجد و اياد و معاذ كلش كيجري ويتجارا كيحاولو اعتقو الا باقي ميتعتق....
منصف(وجهو ولا حمر اما عينيه جغمة ديال الدم): عيطو البومبيا اش كتسنااااااو يالاااااه...
معاذ : وراه عيطنا ليهم قبيلا تعطلو...

يالاه حا يهضر حتى كيشوف ماماه سخفات فبلاصتها الخلعة دارت خدمتها وزيد عليها مريضة بالقلب... منصف و امجد لي شافوها ضربوها بجرية لعندها هزوها دغيا داوهاا ل الطموبيل لي كاينة على برا حطوها... خرجو سارة ورانيا حتى هما... دخان مالي المكان من الصباح وهما كيكبو فالما والو داكشي عاد مزاد كيجهد...

خرجو كاملين الناس البلاصة خوان مبقا حتى واحد اما سيلفيا لي منين سمعاتها جرات باباها ومشاو فحالهم..

منصف بقا واقف على برا وما فيايديه حيلة كيشوف للدار كتحرق وخا خرجو كاع داكشي لي غيخصهم ولكن قلبو ممهنيهش... وما هما البومبيا عاد هداهم الله وجاو...

منصف: فييين هااد تعطيلة كااملة اش كتسناو حتى تشد فينا حنا العافية...
جا عندو إياد لي كيحاول اهدنو: كالمة منصف تهدن...

منصف(مصعور): كفاش غنتهدن مشفتيش الدنيا كيف ولات مكتشوفش فين كنا فين ولينا ولكن كنقسم ليك ونلقا مول هاد الفعلة غنشرب من دمو بلا رحمة...

يالاه غيجاوبو اياد حتى جات سارة كتغوت...

سارة(بخلعة شعرها كامل لصق عليها): عتقووووو عتقوو و حالتي فااااطمة بقات الداخل مخرجاتش هئىىى ديرو شي حاجة غتمووووت...

منصف متسناهاش تكمل هضرتها مشا ضربها بجرية راجع الفيلا مكيخممش فالعواقب...

كلشي حاول امنعو باباه وخوتو كلشي كيغوت عليه خافو عليه توقع ليه شي حاجة ولكن متصنطش ليهم...

معاذ: واااااااش هداااا حماااق علااش دخلتيييي امنصففف علاااش اااع(خبط رجليه مع الارض)..

اما سي محمد لي جالس مبقاتذ عندو طاقة رجليه فشلو عليه شاد راسو بين ايديه محيلتو لمراتو لي ناعسة كومة فالسبيطار ولا ل ولدو لي اقدر امشي فيها حتى هو... عند رانيا لي طاحت الارض كتبكي تخلعات حتى هي عمرها عاشت هادشي واليوم كتاب تعيشو.. جا عندها معاذ جرها معنقها لعندو وكيحاول اهدنها وخا هو كتر منها...

امجد شاف داك المنضر معحبوش ولكن تبت راسو ماشي وقتها دبا...

فالداخل العافية لي شاعلة كتحرق فكل انش فالفيلا ومنصف وسط منها دخل وكيدفع برجليه ممسوقش ل العافية لي تقدر تشد فيه فاي لحضة...

#يتيع...