حب نتيجة خطأ طبي

الجزء التاسع و السبعون

حب نتيجة خطأ طبي
#بارت79♡♡

حلات دريسينغ و بقات كتشوف و تقلب فدوك الحوايج واش كاين متلبس و لا لا بقات هكاك شي 10 دقايق و هي غير كتقلب...

زمرد:اففف هادشي كامل و ملقيتش منلبس...

بقات كدور فعينيها فاللخر جات عينيها على واحد الكسيوة حد الركبة فاللون الغوز بيبي كتجي مزيرة من الصدر و مفرفرة من التحت سميطات... لبساتها جاتها عبار مع لاطاي ديالها و مبينة رجيلاتها البيضين طلقات شعرها سامبل دارت ميكاب خفيف ركزات غير على شفايفها لبسات صندالة ديال الطالون ودارت العطر ديالها شافت راسها فالمراية نضرة اخيرة بتاسمات برضى و رمات لراسها قبلة فالهواء...

يالاه دارت تجمع الروينة لي خلات موراها حتى بان ليها منصف متكي على الحيط ديال البالكون مربع يديه كيشوف فيها...

زمرد شافت فيه ديك شوفة ديال شنو؟

منصف:غتهبطي عندهم هكا؟
زمرد: اه علاش؟
منصف: بدلي ديك الكسوة
زمرد: لا علاش عحباتني...
منصف بحدة مورك على الحروف:قلللت لييييك بدليها هي بدليييها.

زمرد دوك الشوفات لي كيدر فيها خلعوها وكلات امرها ساطت بغيض و دخلات تبدل عليها... خرجات لابسة عليها سروال ديال الفصالة فالاسود تحت منو تيشورت بالبيض خاشياه تحت السروال وفيست ديالو فالاسود مع طالون فالابيض..

لقات منصف لي لابس عليه تا هو سروال فالكحل مع فيست بيضة حال صدفات اللولين و مطلع شعرو الفوق و ريحة عطرو مالية المكان.. بقات ساهية كتشوف فهاد كتلة الاناقة و الجمال لي قدامها و نسات راسها حتى تسمع دقان فالباب كانت الخدامة لي جايا تعلمهم يهبطو...

خرج منصف حدا الباب كيتسنا فزمرد لي خارجة و كتقرقب بطالونها طلعها و هبطها برضى تقدم ناحيتها شد فايديها (هي لي توترات ملي قاسها و شد فايديها) هبطو فالدروج كيتمشاو بكل اناقة كيبانو كوبل متناسق و متفاهمين...

لالة الياقوت و فاطمة لي كيشوفو فولادهم و هما راضيين عليهم علاش لا و فاطمة اخيرا تهنات من ناحية بنتها حيت كيبان
ليها منصف هو الراجل لي غيقدر يكون سند لزمرد و يحميها من كلشي...

اما لالة الياقوت لي كتشوف فزمرد ديك الزوجة لي غتكون زوجة صالحة لولدها و ام مزيانة لحفايدها(معارفينش بلي زواج فقط على الورق 🤭)

نزلو وقفو حداهم و هما باقيين مشادين فبعضياتهم..

لالة الياقوت:تبارك الله عليكم اولدي جيتو مواتيين بعضياتكم الله يحجبكم..

فاطمة مشات وقفات حدا بنتها: الله يخليكم لبعضياتكم..

#يتبع...