حب نتيجة خطأ طبي

الجزء المئة و السبعون

حب نتيجة خطأ طبي
#بارت170♡♡

بعد شفايفو على شفايفها حط جبهتو على جبهتها وهو كينهج هادي غير بوسة ودارت فيه هادشي كامل،، اما زمرد لي مكانتش اقل منو قلبها كتحس بيه غيخرج من بلاصتو نسات العالم كامل وهي معاه.. حسات بلي الزمان توقف و مكرهاتش تبقى غير تبوس فيه حيت هاد التحربة عجباتها بالجهد خصوصا و لي تتلقى منو القبلات هو منصف.. زمرد كتحس بأنفاسو كيضربو فيها بورشوها ويديه لي باقي مضورة على خصرها... حلات عينيها لي تلاقاو مع عينيه..

منصف: متقولي والو!!
زمرد حركات راسها بآه.. و غمضات عينيها مساخياش بهادشي لي تتحس بيه أقوى منها.. و باقي منتيقاش بلي هادشي تتعيشو مع منصف.. منصف لي بارد متيحسش لي بالنسبة ليها غريب الأطوار.. منصف طبع قبلة على حنكها و هي تبتاسم ليه غير بعد عليها بقات غير تتشوف

منصف: مغاديش ترجعي!! غتبقاي هنا..
زمرد حركات راسها بآه.. و هي دايبة فيه مكرهاتش يعاود يبوسها..

منصف: نخليك ترتاحي!
زمرد خركات راسها بآه.. تاجهات للناموسية و تكات تتشوف فالسقف يديها على فمها و تتحس بشي حاجة تتلعب ليها فكرشها.. مفهمات هاد الاحساس لي جاها اما منصف كان فلبالكو جبد گارو تينتر فيه و فوجهو ابتسامة ساحرة.. زمرد مقدراتش تصبر و هي تنوض من بلاصتها و وقفات متكية على لباب ديال لبالكو تتشوف فيه عاطيها بالظهر.. فلحظة سهات فيه و عقلها رجعها للقبلة و جميع الاحاسيس لي عاشتهم معاها.. فيقها من شرودها صوتو..

منصف: أش تم؟

دار عندها بجسمو و هو مبتاسم الابتسامة لي خلات قلبها يدق بزربة هبطات عينيها حشمانة و مزنگة..

منصف بصوت هادئ: زمرد!
زمرد طلعات راسها فيه و هي تشوف لگارو بين يديه قبحات وجهها.. منصف شافها فيه تتشوف و هو يطفيه و تاجه لعندها..

منصف: زمرد!
زمرد: عفاك واش تقدر تواعدني بواحد الحاجة؟
منصف عقد حواجبو و دار ليها اشارة بعنى شنو..

زمرد: لگارو! بغيتك تقطعو متبقاش تدور بيه..
غير كملات هضرتها شافت فيه تتسنى منو الرد.. منصف تصدم متوقعاش منها و فنفس الوقت معرفش باش يجاوبها..

زمرد شدات ليه فيديه: عفاك أ منصف واعدني عمرك تقرب ليه مرة خرة!
منصف غير سمع سميتو من عندها و يديها لي شادة فيديه حرك راسو بآه بلاما يحس.. مقدرش يعارضها و لا يرفض و هي تتطلب فيه و عينيها فعينيه لي ذوبوه.. قرب منها كثر و قبل عينيها كل وحدة فيهم بحب و حنان و شاف فيها..

منصف: تنواعدك! على قبلك غادي نحيدو بمرة..
زمرد عجبها الحال و بلاما تشعر عنقاتو بادلها العناق.. و غير وعات على راسها بعدات منو و تتشوف فيه.. و هي تدخل و تكات فوق الناموسية.. تبعها منصف و تكا حدها.. جرها لعندو و حط راسها على صدرو..

منصف: من ليوم هاد هي بلاصتك..

#يتبع