စစ်ဧကရာဇ် လီကွမ်ရီ ( Book 2 ) ( Ch 991 - ) ခွင့်ပြုချက်ရပြီး

1381 - 1385

စစ်ဧကရာဇ်(Chapter:1381)
(မုန့်ကျန်းထျန်း)
......................
     လီကွမ်ရီက မျှော်စင်အတွင်းရှိနေစဥ် ကုန်းတိုက်ကြီး၏ ဆန့်ကျင်ဘက်အခြမ်းမှ ပေါက်ကွဲသံတစ်ချက် ကျယ်လောင်စွာ ထွက်ပေါ်လာခဲ့သည်။ ထိုအသံက လူတိုင်းကို ထိတ်လန့်တုန်လှုပ်စေခဲ့သည်။

     ချက်ချင်းပင် အားလုံးက အသံထွက်လာသော နေရာသို့ လှည့်ကြည့်လိုက်ကြသည်။ ထိုအခါ မုန့်ကျန့်ထျန်းရှိနေသည့်နေရာမှ ထွက်လာခြင်းဖြစ်ကြောင်း သတိပြုမိခဲ့ကြ၏။ တောင်ထိပ်၌ တံခါးပေါက်တစ်ခု ရှိနေပြီး လီကွမ်ရီရွှေ့ပြောင်းထားသည့် တားမြစ်ဇုန်၏ စွမ်းအားများက တံခါးပေါက်မှတစ်ဆင့် မုန့်ကျန်းထျန်း၏ ကိုယ်ပေါ်ကျဆင်းရန် တာစူနေကြသည်။

     သို့သော် နောက်ဆုံးတွင် ထိုအနက်ရောင်စွမ်းအားများက တစ်စစီ ပေါက်ကွဲသွားခဲ့၏။ နောက်ဆုံး၌ ကြည်လင်သည့် ကောင်းကင်တစ်ခု ပြန်ပေါ်လာခဲ့သည်။ လူတိုင်းသည် ထိုမြင်ကွင်းကိုကြည့်ပြီး ရင်သပ်ရှုမော ဖြစ်နေကြရသည်။ မုန့်ကျန်ထျန်းက တားမြစ်ဇုန်၏စွမ်းအားကို သန့်စင်နိုင်ခဲ့တာလား ...။

     ပေါက်ကွဲသံတွေ အဆက်မပြတ် ထွက်ပေါ်နေခဲ့၏။ အနက်ရောင်စွမ်းအားတွေက တဖြည်းဖြည်း သန့်စင်ခံနေရပြီး နောက်ဆုံး၌ မတူညီသော အရောင်တစ်ခုဖြစ်သွားခဲ့သည်။ ထိုမြင်ကွင်းက ကျင့်ကြံသူ အတော်များများကို တုန်လှုပ်စေခဲ့သည်။ အတွေ့အကြုံရင့်ကျက်သူတွေမှာ အခြေအနေကို နားလည်ကြ၍ ပို၍ပင် တုန်လှုပ်နေမိကြသည်။

     "မုန့်ကျန်းထျန်းက အနက်ရောင်စွမ်းအားတွေကို သူ့ရဲ့ကိုယ်ပိုင်စွမ်းအားအဖြစ် သန့်စင်နေတာပဲ ..."စကြာဝဠာအဆင့် ကျင့်ကြံသူတစ်ယောက်က စိတ်လှုပ်ရှားနေဟန်ဖြင့် ရေရွတ်လိုက်သည်။

     တားမြစ်ဇုန်၏ အနက်ရောင်စွမ်းအားကို မည်သူမှ မရပ်တန့်နိုင်ကြပေ။ ထိုစွမ်းအားများက အထွတ်အထိပ်နတ်ဘုရားသခင်အဆင့်တွေကိုပင် ပြာအတိ လောင်ကျွမ်းစေနိုင်သည်။ ကိုယ်ပိုင်စွမ်းအားအဖြစ် သန့်စင်ပစ်ဖို့ဆိုသည်မှာ လူတိုင်းလိုလို အိပ်မက်ပင် မမက်ဖူးကြပေ။

     "သူက အင်မော်တယ်ဧကရာဇ်ဖြစ်ဖို့ တကယ်ပဲ ထိုက်တန်ပါပေတယ် ... သူ့ရဲ့တာအိုအုတ်မြစ်က လူတွေထင်ထားတာထက် အများကြီး ခိုင်မာတာပဲ ..."မုန့်ကျန့်ထျန်းနှင့် မျိုးဆက်တစ်ခုထဲ မွေးဖွားခဲ့သည့် ကျင့်ကြံသူတစ်ယောက်က စိတ်ပျက်လက်ပျက် ညည်းညူလိုက်သည်။