စစ်ဧကရာဇ် လီကွမ်ရီ ( Book 2 ) ( Ch 991 - ) ခွင့်ပြုချက်ရပြီး

1476 - 1480

စစ်ဧကရာဇ်(Chapter:1476)
(ပြန်ဝင်စားနိုင်သော ကိုးပါးရွက်)
.............................................
     မျိုးနွယ်ပေါင်းစုံအစည်းအဝေး ပြီးသွားသော်လည်း နတ်သစ်ပင်ခံတပ်မြို့မှာမူ ဆက်လက်စည်ကားနေဆဲပင်။ ယနေ့မှာတော့ ကျင့်ကြံသူအများအပြားက နေရာတစ်ခုသို့ ထွက်ခွာရန် ပြင်ဆင်နေကြ၏။ အကြောင်းမှာ ထိုနေရာ၌ မုန့်ကျန်းထျန်းတို့အဖွဲ့ရှိနေ၍ဖြစ်သည်။

     သူတို့သည် ထိုနေရာသို့ စတင်ထွက်ခွာနေကြသော်လည်း တိကျသည့် ရည်ရွယ်ချက်မရှိကြပေ။ မုန့်ကျန်းတို့အဖွဲ့ ရှိနေ၍သာ သွားနေကြခြင်းဖြစ်၏။ သူတို့၏အမြင်အရ မုန့်ကျန်းထျန်းတို့သည် ဒဏ္ဍာရီလာ မသေဆေးကို ရှာနေသည်ဟု ယူဆကြသည်။ ကောလဟာလဖြစ်၍ ရာနှုန်းပြည့် မယုံကြည်ရဲကြသော်လည်း အားလုံးက သွားရန်ရွေးချယ်ခဲ့ကြသည်။

     အမှောင်သခင်မင်းသား ပါဝင်သည့် မုန့်ကျန်းထျန်းတို့အဖွဲ့သည် နတ်ရှုံးတောင်၏ နယ်မြေအနေအထားကို အားလုံးထက် ပိုမိုရင်းနှီးသည်။ ထို့ကြောင့် မသေဆေးကို ရှာဖွေခြင်းဖြစ်နိုင်သည်ဟု အားလုံးက ယူဆနေကြခြင်းဖြစ်၏။

     ထို့ကြောင့် ကျင့်ကြံသူအများစုသည် နတ်ရှုံးတောင်မှ မထွက်ခွာသေးဘဲ တောင်ကြော၌ ဆက်နေကြသည်။ ဒဏ္ဍာရီလာ ပြန်ဝင်စားနိုင်သော မသေဆေးကို မည်သူက လက်လွတ်ခံနိုင်မည်နည်း။ အားလုံးက မျှော်လင့်ချက်ကိုယ်စီဖြင့် ဆက်ရှိနေကြသည်။

     အချိန်တိုအတွင်းမှာပင် အားလုံးက တောင်ကြော၏ အနက်ရှိုင်းဆုံးနေရာသို့ ထိုးဖောက်ဝင်ရောက်လာခဲ့ကြသည်။ သို့သော် မုန့်ကျန်းထျန်းတို့အဖွဲ့ကို ကျော်တက်ရဲသူမရှိချေ။

     မသေဆေးသာ ဤနေရာ၌ အမှန်တကယ် ရှိနေပါက မုန့်ကျန်းထျန်းတို့ကို ကျော်ပြီး မရနိုင်မှန်း သိကြသည်။ ထို့ကြောင့် အားလုံးက အကြွင်းအကျန်ကိုသာ စောင့်မျှော်ဖို့ တွေးထားကြသည်။

     ယခုအချိန်အထိ မသေဆေးရှိမရှိကို အတည်မပြုနိုင်ကြသေးသော်လည်း မုန့်ကျန်းထျန်းတို့ရှိနေခြင်းက အားလုံး၏ ယုံကြည်ချက်ကို ပိုမိုခိုင်မာစေခဲ့သည်။ ထို့ကြောင့် နေရာအနှံ့ ရှာဖွေတူးဖော်ခဲ့ကြသည်။ အားလုံးက တက်တက်ကြွကြွဖြင့် ကြိုးစားရှာဖွေနေကြသည်။