စစ်ဧကရာဇ် လီကွမ်ရီ ( Book 2 ) ( Ch 991 - ) ခွင့်ပြုချက်ရပြီး

1446 - 1450

စစ်ဧကရာဇ်(Chapter:1446)
(ဝိညာဉ်သားရဲသခင်)
.............................
     ယန်မီးတောက်လက်သီး ... လီကွမ်ရီထုတ်သုံးလိုက်သည့် လက်သီးတိုက်ကွက်ဖြစ်သည်။ ဤလက်သီး၌ နေအရင်းအမြစ်၏ သန့်စင်သော ယန်မီးတောက်စွမ်းအင်များ ပေါင်းစပ်ထားသည်။ ထို့ကြောင့် အထင်သေးလို့မရပေ။

     ယန်မီးတောက်လက်သီး တစ်ချက်ထဲဖြင့် ဟွမ်ယွီရွှမ်နှင့် တပည့်များကို အဆုံးသတ်ပစ်ရန် လုံလောက်သည်ထက်ပိုသည်။ ထိုကြောင့်လည်း ပြာပင်မကျန်ရစ်ဘဲ သေဆုံးသွားကြရခြင်း မဟုတ်ပါလော။ စက္ကန့်ပိုင်းမျှ အချိန်အတွင်း ဟွမ်ယွီရွှမ်နှင့် သူ၏တပည့်တွေမှာ မည်သည့်အချိန်ကမှ မရှိခဲ့သည့်အလား အရာအားလုံး တိတ်ဆိတ်နေပြီဖြစ်သည်။

     လီကွမ်ရီသည် မတူညီသော တာအိုလက်သီးမျိုးစုံကို ကျွမ်းကျင်ပိုင်နိုင်သည်။ ထို့ပြင် သူ၏လက်သီးနည်းစနစ်၌ အင်မော်တယ်ခန္ဓာကိုယ်ထည့်ပေါင်းထားသည့်အလား အားကောင်းသည်။ ပြီးပြည့်စုံသော အင်မော်တယ်ခန္ဓာကိုယ်နှင့်ယှဥ်လျှင် လိုအပ်ချက်တွေ ရှိနေသေးသော်လည်း ဤမျှနှင့်ပင် ကြောက်စရာ​ကောင်းနေပြီဟု ဆိုရပေမည်။

     အကယ်၍ လီကွမ်ရီသာ ယန်မီးတောက် အင်မော်တယ်ခန္ဓာကိုယ်ကို အဓိကဦးစားပေးပြီး ကျင့်ကြံပါက ယန်ကျောင်းတော်၏ အင်မော်တယ်ခန္ဓာကိုယ်ထက် များစွာသာလွန်သွားမည်မှာ မလွဲဧကန်ပင်။ ယန်ကျောင်းတော်မှ ယန်သခင်ကြီး၏ ယန်မီးတောက် အင်မော်တယ်ခန္ဓာကိုယ်အား အချိန်ခဏပိုင်းအတွင်း ချေမှုန်းပစ်နိုင်ပေလိမ့်မည်။ လက်ရှိအချိန်၌လည်း သူသည် ယန်မီးတောက် အင်မော်တယ်ခန္ဓာကိုယ်၏ သဘောသဘာဝကို နားလည်ထား၍ သူ၏ ယန်မီးတောက်လက်သီးသည် အင်မော်တယ်ခန္ဓာကိုယ်နှင့် ထပ်တူညီသောစွမ်းအားကို ထုတ်ဖော်နိုင်စွမ်း ရှိပေသည်။

     စကားကုန်ပြောရလျှင် လီကွမ်ရီ၏ ယန်မီးတောက်လက်သီးသည် ကန့်သတ်ချက်ကို ကျော်လွန်ဖို့ နီးစပ်နေပြီဖြစ်ရကား လွန်စွာ ကြောက်စရာကောင်းသည်။ ဤလက်သီးဖြင့် သူလုပ်ချင်ရာကို လုပ်နိုင်သည်။ လက်သီးစွမ်းအား ပိုမိုမြင့်မားစေရန် အခြားသော တာအိုလက်သီးများနှင့်လည်း ပေါင်းစပ်အသုံးပြုနိုင်သည်။