هذا الرجل ...أبوك 💙💜💚
🎆الحلقة الاولى : القسم 1🎆
*****
كانت تجرب في روب روج بوردو ضابطة بدنها، تروا كار وتوصل لتحت ركبتها بشوي ،هبط شعرها نوار على اكتافها "كيف مايرجع ...الفرططو ...للنار ايلي تحرقووووو.....كيف مايرجع ...الفلاااااااح ....للحقل ايلي عرقوووو ...كيف مايرجع الملااااح للبحر ايلي ...." جبدت السلسلة ايلي ماحبتش تتحل ،حاولت معاها بارشا مرات ومانجمتش،نادت بصوت مليان دلال " مااااااااا.....يا...ماااااا" طلت مرا في اول الاربعين براسها ،بيضاء شمعة وخدودها حمر كي التفاح ،عينيها يلمعو وحدهم تقول باش ينطقو "شبيك يا طفلة "
دارتلها وهي تسيب في تزعبينها " اوووف ....السلسلة ماحبتش تتسكرلي ...ولازمني نخرج توا ...هيا ايجا عاوني "
تنهدت امها ومسحت يديها بمنديلة كوجينة جابتها في يدها "الصبر منك يا بنيتي .."
"اوووف مااا ...ريحة ثوم "
ضربتها على ظهرها " اسكت عليا ...قالو ثوم ...ماتتحركش خنشوف ها الصفااا"
لمت السلسلة بصوابعها وجبدت السكارة ، كساحت وما حبتش تمشي"اشرب كرشك شوية ...خنسكرها "
وساعت عينيها ولمت شعرها من على وجها ، تلفتت لامها " تقليش سمنت " لوات شفايفها تقول باش تبكي "ياربي ...ماهوش وقتو ...هذا الكل من ماكلتك...نهار وطولو وانت تعشش فيا تقول دندون ...قتلك راو مافمة حتى عارضة تاكل الكسكسي والمقرونة ...هاي اخرتها ...ياربي اش باش نعمل عندي سيونس متاع تصوير العشية "
"اسكت عليا ...ايلي يسمع يقول عارضة ازياء غوتشي والا ارماني ...وانت يا دوبك تعرض سروال بعشرين دينار "
"نعرفك راو...حياتك الكل تتمنالي باش ماننجحش في حتى شي...وين نقلك باش نعمل حاجة فاشن ...تعبس وجهك وتكشبر وترمي في المعنى وكان تلقى راك بلبزتهم عليا وكلمتهم باش ما لا يقبلوني ولا يعيطولي .."
قرصتها من كتفها خلات بلاصتها حمراء "ها الشوالق والتعوويج بالتالونات ماعندو وينو باش يوصلك ، ماينفعك كان هذا " ضربتها على راسها " برا شوف حاجة اخرى تكون محلولة شوية من لوطة موش لازم تحزقلهم بدنك وتفرجهولهم الكل...اياماتنا المرا ما تتوازى كان بلحمتها و زندها وفخذها ...وتوا تقول يد مصلحة وزييد تحب تضعف ،ربي يهديكم جيل توا ....ايا نحي عليا ها الروبة وشوف حاجة اخرى "
كزت سنونها موش عاجبها الحال خزرت للمرايا وثبتت في روحها مليح ، ديما ترى انها مرا مزيانة تخلقت باش الناس تراها ، وتحبها ،تتشهر والكل يتبعوها ...تولين ...الاسم متاعها...في اول العشرين ...متوسطة في الطول ...ستيل مانكان...بيضاء...عينيها عسلية فاتحين مع الشمس يولو شفافين ،فمها صغير و شفايفها مليانين...كانت بالفعل بنية مزيانة وتعجب العين...حلت بلاكارها وقعدت تلوج في روب تناسبها وبالطبيعة لازم تكون كيف ماقالتلها امها والا ...كل شي يطيح في الماء....عادي جدا تحرم عليا عرض الازياء ...وتمنع عليها الخلط متاع الشوتينغ ...جاء ليدها وحدة في النوار واطرفها في الدنتال ،قاستها وتمايلت بيها قدام المرايا...ربما تكون هاكي ايلي تصلح ...لبستها ولبست معاها طالون كيفها ومشات بيهم خطوات ،خزرت للمرايا لعل تشوف حاجة خايبة فيها ...ڨلوبالمون تعدي روحهها ..
*******
أنت تقرأ
💚 هذا الرجل ....أبوك 💚🌺( Bu Adam Senin Baban )🌺 كرونيك (مكتملة )
Short Story★الاسم " هذا الرجل ...أبوك bu adam senin baban 💐 ★النوع "رومنسي ، اجتماعي ★القصة "💠 كيف اي بنية في عمرها ...تولين ❄🌺 تحلم ببارشا حاجات ، تسعى بكل جهد ما ليها باش تحققها ...لكن الواقع والمجتمع يفرض عليها حاجات اخرى ....زعمة تشد صحيح في حلمها والا...
