အပိုင်း (၁၈၀၄)အသစ်ပြန်လည်ဖွဲ့စည်းခြင်း
ဟွာဂျီယူက ဇဝေဇဝါဖြင့် ရီဖူရှင်းထံသို့ အသံပို့လွှတ်လိုက်သည်။ "သူမက ငါ့ကို ကြည့်နေသလိုပဲ။"
ရီဖူရှင်းက သူမ၏ စကားကို ကြားသောအခါ အံ့သြသွားလေသည်။ သူ နားကြားမှားသလား။
မင်းသမီးဒွန်ဟောင်က သူတို့နှစ်ယောက်ကို သတိပြုမိသည်လား။
သို့ဆိုလျှင် မင်းသမီးဒွန်ဟောင်က သူတို့၏ ယခင်က တွေ့ဆုံမှုကို မှတ်မိနေခြင်း ဖြစ်နိုင်သလား။
သို့သော်လည်း ထိုအဖြစ်တို့က ဆယ်စုနှစ်များစွာ အကြာက ဖြစ်သည်။ မင်းသမီးဒွန်ဟောင်သည် အလွန်တောက်ပနေသူ ဖြစ်သောကြောင့်မဟုတ်လျှင် သူသည် လွန်ခဲ့သည့် ဆယ်စုနှစ်များစွာအကြာက တစ်စုံတစ်ယောက်အား မှတ်မိလိမ့်မည် မဟုတ်ပေ။
"ကိုက်ချိန်က အရှင်မင်းသမီးကို နှုတ်ခွန်းဆက်ပါတယ်။" ရွှေရောင်နတ်ပြည်ထောင်မှ ကိုက်ချိန်က မင်းသမီးဒွန်ဟောင်ဘက်သို့ လှည့်ကာ ပထမဆုံး ဦးညွှတ်အရိုအသေပေးသူ ဖြစ်လေသည်။ သူက အရှင်ဒွန်ဟောင်၏ လက်အောက်၌ ခစားရသူ ဖြစ်သော်လည်း အမှန်တကယ်၌ သူသည် မင်းသမီးအား ကြိမ်ဖန်များစွာ မြင်တွေ့ဖူးခြင်း မရှိပေ။
သူသည် ကောင်းကင်ဒေသ တော်ဝင်နန်းတော်အတွင်း၌ မင်းသမီးဒွန်ဟောင်၏ အဆင့်အတန်းက အလွန် မြင့်မားသည်ကိုသာ သိရှိပေသည်။ သူမ လိုချင်သည့်အရာဟူသမျှကို အရှင်ဒွန်ဟောင်က တွေဝေခြင်းမရှိဘဲ ချက်ချင်း ခွင့်ပြုပေးလိမ့်မည် ဖြစ်သည်။
"အရှင်မင်းသမီးကို နှုတ်ခွန်းဆက်ပါတယ်။" ကျန်သည့်သူများကလည်း ဦးညွှတ်အရိုအသေပေးလိုက်ကြသည်။ နတ်ပြည်ထောင်များဖြစ်စေ၊ ထိပ်သီးအင်အားစုများဖြစ်စေ၊ သူတို့အားလုံးက မင်းသမီးကို လေးစားသမှု ပြုကြရသည်။ အကြောင်းမှာ သူတို့ရှေ့၌ ရှိနေသူမှာ ကောင်းကင်ဒေသ၏ တစ်ဦးတည်းသော မင်းသမီးဖြစ်သောကြောင့် ဖြစ်၏။
ရီဖူရှင်း၏ တုံ့ပြန်မှုက တခြားသူများထက်စာလျှင် အနည်းငယ် နှေးကွေးပေသည်။ သူသည် တောက်ပသော နတ်ရောင်ဝါတို့နှင့် လွှမ်းခြုံထားသော ထိုတည်ငြိမ်သည့် အမျိုးသမီးကို မြင်သောအခါ သူ၏ မသိစိတ်ထဲ၌ ဦးညွှတ်အလေးပြုလိုခြင်း မရှိချေ။ ဖြစ်နိုင်သည်က အင်ပါယာရီချင်၊ နှင်းလူဝံအင်ပါယာနှင့် သူ့ဆရာ ဆရာဒူတို့ကြောင့် သူသည် မင်းသမီးဒွန်ဟောင်နှင့် ယှဥ်ပြိုင်လိုသည့် စိတ်ရှိနေသောကြောင့် ဖြစ်ပေလိမ့်မည်။
