အပိုင်း(၁၈၁၈)မူလဘုံအတွက် ကတောက်ကဆဖြစ်ခြင်း
အရိပ်ဘုံတွင် မရေမတွက်နိုင်သော သက်ရှိများ နေထိုင်သည်။ သူတို့၏အရေအတွက်မှာ ဘီလီယံချီ၏။
ယခု သူတို့အားလုံးမှာ နေရပ်မှ ထွက်လာကြသည်။
တိုက်ပွဲနှင့်အဝေးတစ်နေရာမြို့တစ်ခုတွင် လူအများအပြားသည် ကောင်းကင်၌ ပျံသန်းနေကြသည်။ မြေပြင်သည် တုန်ခါကာ အဆောက်အဦများ အဆက်မပြတ် လှုပ်ခါနေ၏။ မြေပြင်မှ မကောင်းသော စွမ်းအားများ ယိုစိမ့်လာနေသည်။ လူတိုင်းက ထိုစွမ်းအားကို ခံစားမိကြ၏။
ဘာတွေဖြစ်နေတာလဲ။
လူတိုင်းသည် ထိတ်လန့်ကြောက်ရွံ့စွာ တွေးတောမိကြ၏။ မှော်နက်စစ်တပ်သည် အရိပ်ဘုံကို ကျူးကျော်လာချေပြီ။ သို့သော်လည်း အရိပ်ဘုံကား ကြီးမားကျယ်ပြောလှ၏။ မှော်နက်စစ်တပ်က အားလုံးကို ထိန်းချုပ်နိုင်စွမ်းမဲ့သည်။ သူတို့က ထိပ်သီးအင်အားစုများပိုင်ဆိုင်သော ဒေသတချို့ကိုသာ ထိန်းချုပ်ကာ ယခုတွင် ယိုယွဲ့နတ်နန်းတော်၌ စုစည်းနေကြသည်။
ထိုနေရာတွင် စစ်ပွဲဖြစ်နေသည်ဟု ကောလာဟလများက ဆိုသည်။
သို့သော်လည်း အဘယ်ကြောင့် ဤနေရာတွင် အပြောင်းအလဲများ ဖြစ်လာရသနည်း။
ထိုမကောင်းသောစွမ်းအားများ သိပ်သည်းလာလျှင် လူတိုင်းက ချွေးစေးများပြန်လာကြသည်။ အားနည်းသောကျင့်ကြံသူများကား တုန်ယင်လာကြ၏။ ကလေးသူငယ်များမှာ ငိုကြွေးလာကြသည်။ သူတို့အားလုံးမှာ ထိတ်လန့်ကြောက်ရွံ့မှုကို ခံစားလာကြရသည်။
ပိုမိုများပြားသောကျင့်ကြံသူများ ကောင်းကင်သို့ ပျံသန်းလာနေကြ၏။ မြို့အပေါ်ကောင်းကင်တွင် ရန်ဟောင်အဆင့်ကျင့်ကြံသူများရှိနေသည်။ သူတို့က မြေပြင်မှ ယိုစိမ့်လာသော စွမ်းအားများကိုခံစားမိလျှင် စိတ်နှလုံးပြင်းထန်စွာ တုန်လှုပ်ကြ၏။
ထိုအငွေ့အသက်များ စီးဆင်းလာသောနေရာတိုင်း တူညီသော မြင်ကွင်းများသည် မြို့အနှံ့၊ နေရာအနှံ့ဖြစ်ပေါ်လာ၏။ တချို့က ထိုစွမ်းအားကို ခံစားမိလျှင် စမ်းသပ်စစ်ဆေးကြ၏။
