စစ်နတ်ဘုရားရဲ့ ချစ်လှစွာသော ဝမ်ဖေး
I’ll Be the Male Lead’s Sister-in-Law
Chapter 101
Translated by Utopia
ဒီအကြောင်းတွေကို အပြင်လူတွေ ကြားသွားလို့ မဖြစ်ဘူး။ ကျန်းသခင်မက အသံခပ်အုပ်အုပ်နဲ့ မေးလာတယ်။
“သမီးရဲ့ ယောက္ခမကကော? ကျင်းဝမ် အိမ်တော်ကို ပြန်မလာတာ သူမကကော ဘာမှမပြောဘူးလား”
“သူမက မိဖုရားခေါင်ကြီးလေ၊ ကျင်းဝမ်က သူမရဲ့သား။ အမေက မိဖုရားခေါင်ကြီးကို သမီးကို ဘာပြောစေချင်နေတာလဲ” ကျန်းမင်ဝေ့က စိတ်ပျက်လက်ပျက်နဲ့ ပြောလာတယ်။ “သူ အလုပ်များလို့ အိမ်တောင် ပြန်မလာနိုင်တာဆို သမီး သည်းခံပေးနိုင်ပါတယ်။ ဒါပေမဲ့ အခုက ပြီးခဲ့တဲ့ ရက်တွေထဲ ချီယန်အိမ်တော်ကို ချောင်းပေါက်အောင် သွားနေတာ။ ဘေးအိမ်ကို နန်းတော်က တော်ဝင်အမိန့်စာ ပို့တာတောင် သူကပါ အတူလိုက်သွားလိုက်သေးတယ်။ သမီးမှာတော့ အရှက်မရှိ အရှင့်သားကို အိမ်တော်ဆီ ပြန်လာပါဦးဆိုပြီး လူလွှတ်ပြီး သွားခေါ်ခိုင်းခဲ့တာ၊ သွားခေါ်တဲ့သူတောင် အဲ့မရောက်သေးဘူး သူက ပြန်သွားပြီတဲ့”
ကျန်းမင်ဝေ့က နှာခေါင်းရှုံ့လိုက်ပြီး ခါးခါးသီးသီး ပြောလာတယ်။
“သူတော်စင်က အိမ်ရှေ့ ၃ ခေါက်တိတိ ဖြတ်လျှောက်သွားပေမဲ့ အိမ်ထဲတော့ မဝင်ဘူးလို့ ပြောကြတဲ့အတိုင်းပဲ။ ကျင်းဝမ်က သူတော်စင်ဖြစ်တော့မယ် ထင်တယ်”
“ဒီကလေးကတော့လေ ဘာတွေလျှောက်ပြောနေတာလဲ” ကျန်းသခင်မက ဟန့်တယ်ဆိုရုံလောက်လေး ဆူလာတယ်။ “ဘယ်လိုဖြစ်လို့ ချီယန်အိမ်တော်လို့ပဲ ပြောနေတာလဲ၊ အဲ့ဒါက အခု အန်းအိမ်တော် ဖြစ်သွားပြီလေ။ ကျင်းဝမ်က အန်းအိမ်တော်ကို လည်ဖို့ပတ်ဖို့ သွားတယ်ထင်နေတာလား၊ သူက ဧကရာဇ်ကိုယ်စား လက်တိုလက်တောင်း အကုန် လိုက်လုပ်ပေးနေရတာလေ။ အခု သူ့လက်အောက်ငယ်သားတွေလည်း နန်းတော်က ထွက်လို့ မရသေးဘူး၊ အားလုံးက ကျင်းဝမ်ကနေပဲ တစ်ဆင့် လုပ်နေရတာ။ ဒါကို ကြည့်ခြင်းအားဖြင့် ဧကရာဇ်က ကျင်းဝမ်ကို သဘောကျတယ်ဆိုတာ သိသာတယ်။ သမီးက သူ့အတွက် ဝမ်းမသာပေးနိုင်ရင်တောင် အဲ့လိုမျိုးတော့ အပြစ် မတင်သင့်ဘူး”
ကျန်းသခင်မဆီမှာ အဆူခံလိုက်ရပြီးတဲ့နောက် ကျန်းမင်ဝေ့ရဲ့မျက်နှာက နည်းနည်း ကြည်ကြည်သာသာ ဖြစ်လာတယ်။
