စစ်နတ်ဘုရားရဲ့ ချစ်လှစွာသော ဝမ်ဖေး
I’ll Be the Male Lead’s Sister-in-Law
Chapter 104
Translated by Utopia
မုမင်ထန် နည်းနည်းတော့ စိတ်မကောင်းဖြစ်သွားတယ်။ သူက အကုန်သိပြီးသားဆိုတော့ သူမလည်း တခြားကိစ္စကိုပဲ ဆက်ပြောတော့တယ်။
“ပစ္စည်းတွေအပြင် အရှင့်သားကို ၂၄ နာရီပတ်လုံး ကျန်းမာရေး စောင့်ရှောက်ပေးဖို့ဆိုပြီး နန်းတော်က သမားတော် ၅ ယောက်ကို လွှတ်လိုက်တယ်။ နောက်ပြီး အရှင့်သားရဲ့ ဘွဲ့နာမည်ကို ကြေညာပေးဖို့ ကုန်းကုန်းတစ်ယောက်က တော်ဝင်အမိန့်စာနဲ့အတူ ရောက်လာတယ်။ အဲ့အချိန်တုန်းက အရှင့်သား မနိုးသေးတာနဲ့ ကျွန်မပဲ ကိုယ်စား လက်ခံထားပေးလိုက်တယ်ရယ်”
“ကိုယ့်ဘွဲ့နာမည်ကို ကြေညာတဲ့ တော်ဝင်အမိန့်စာ?” ရှဲ့ရွှမ်းချန်က မျက်မှောင်ကြုတ်သွားတယ်။ “သူ ကိုယ့်ကို ဘာဘွဲ့ ပေးလိုက်လဲ”
“ဧကရာဇ်က အရှင့်သားကို အန်းဝမ် ဘွဲ့ ပေးလိုက်တယ်။ အရှင့်သားကို သားအရင်းလိုပဲ သဘောထားတော်မူတယ်လို့လည်း ပြောခဲ့သေးတယ်။ အခုချိန်ကစပြီး ကျွန်မတို့က ကျင်းအိမ်တော်နဲ့ အာဏာအတူတူပဲ။ အရှင့်သားက ကျင်းဝမ်ထက် အသက်ပိုကြီးတာမို့ ကျင်းဝမ်ထက်တော့ ရာထူးနည်းနည်း ပိုကြီးတယ်လို့ ပြောတယ်”
“အန်းဝမ်”
ရှဲ့ရွှမ်းချန်က ခပ်နှေးနှေး ရေရွတ်လိုက်တယ်။ တော်ဝင်ဘွဲ့အမည်တွေကို ပေးတဲ့အခါ နောက်ကွယ်မှာ လေးနက်တဲ့အဓိပ္ပာယ်တွေ ရှိတယ်။ ဥပမာ - ချင်၊ ဟန် စတဲ့ ရှေးမင်းဆက်တွေကို မှီငြမ်းပြီး ပေးတာမျိုးပေါ့။ ပေးတဲ့မင်းဆက်က အင်အားတောင့်တင်းတဲ့ မင်းဆက် ဖြစ်ခဲ့လေ ကောင်းလေပဲ။ ဒါမှမဟုတ်လည်း နေရာဒေသတစ်ခုကို အစွဲပြုပြီး ပေးတာမျိုးဆိုရင် ကြွယ်ဝချမ်းသာတဲ့မြေဖြစ်လေ ကောင်းလေပဲ။
ဒါပေမဲ့ ဘွဲ့နာမည်ကို ပေးတဲ့နေရာမှာ နောက်တစ်ချက် ထည့်စဉ်းစားရတာက ကောင်းခြင်းမင်္ဂလာနဲ့ ပြည့်စုံဖို့ ဖြစ်တယ်။ ဥပမာ သက်ရှည်ကျန်းမာခြင်း စသည်ဖြင့်ပေါ့။ ဒီလိုပဲ အန်း ဆိုတဲ့နာမည်မှာ အဓိပ္ပာယ်တွေ အများကြီး ရှိတယ်။
ရှဲ့ရွှမ်းချန်က ဘာမှမပြောလာဘဲ နှာခေါင်းရှုံ့လိုက်တယ်။ သူ့မျက်နှာထားက သိပ်မကောင်းတာမြင်တော့ မုမင်ထန်က မေးလာတယ်။
