စစ်နတ်ဘုရားရဲ့ ချစ်လှစွာသော ဝမ်ဖေး
I’ll Be the Male Lead’s Sister-in-Law
Chapter 103
Translated by Utopia
ဒါပေမဲ့ မုမင်ထန်က တကယ် ကြိုးစားပြီး စကားလည်း နာခံတယ်။ ကျန်းသခင်မ ဘာလေးပဲ ပြောလိုက်ပြောလိုက် နှစ်ခါ ထပ်ပြောရတယ်ဆိုတာ မရှိဘူး။ မုမင်ထန်က ကျန်းအိမ်တော်မှာ တစ်နှစ်ကျော်လေးပဲ နေသွားတယ်ဆိုပေမဲ့ သူမ နေသွားတဲ့ အဲ့အချိန်လေးက ကျန်းသခင်မအတွက်တော့ အငြိမ်းချမ်းဆုံးနှစ်ပဲ။ မုမင်ထန်ရဲ့ ပြောပုံဆိုပုံ ပြုမူနေထိုင်ပုံက သူမရဲ့ ပျောက်သွားတဲ့သမီးလေးအတိုင်းပဲ။ ပြောရရင် သမီးအရင်းထက်တောင်မှ သူမက ပိုပြီး စဉ်းစားချင့်ချိန်တတ်သေးတယ်။
ကျန်းသခင်မအတွက်တော့ မုမင်ထန်က စိတ်ကူးထဲက ပြီးပြည်စုံတဲ့သမီးပုံစံပဲ။ သူမက မင်ဝေ့လိုပဲ လုပ်ရဲကိုင်ရဲရှိတယ်၊ ဒါပေမဲ့ သူမလိုတော့ အထက်စီးဆန်ပြီး လိုချင်တာ တစ်ခုပဲ တဇွတ်ထိုး မလုပ်တတ်ဘူး။ အခုလည်း မင်ဝေ့နေရာမှာ သူမသာဆို ကျန်းသခင်မ ဒီလောက်တောင် လေကုန်ခံပြီး ဖျောင်းဖျနေရမှာ မဟုတ်ချေ။ တကယ့်ကိစ္စက စတောင် မစရသေးဘူး သမီးဖြစ်သူကို ဖျောင်းဖျရတာနဲ့တင် အချိန်တော်တော် ကုန်နေပြီ။
ဘာကြောင့်ရယ်မသိ ကျန်းသခင်မ လေးတွဲ့တွဲ့နဲ့ သက်ပြင်းချမိတယ်။ ဘေးအိမ်ကသူကလည်း ဝမ်ဖေးတစ်ပါးဖြစ်သလို သူမရဲ့ သမီးလည်း ဖြစ်တယ်။ ကံကြမ္မာက သူတို့ကို ဘယ်ဆီတွန်းပို့လိုက်လဲ တွေးမိပြန်တော့ ကျန်းသခင်မ သက်ပြင်းချမိပြန်တယ်။
အဲ့တုန်းက ကျန်းသခင်မ မုမင်ထန်ကို မြို့တော်ဆီ ခေါ်လာခဲ့ရတဲ့ အကြောင်းအရင်းတွေထဲ အဓိက အချက်ကတော့ သူမ သမီးပျောက်လို့ ဝမ်းနည်းပူဆွေးနေခဲ့ရတာကြောင့်ဖြစ်တယ်။ သွေးဆူနေတုန်း လုပ်မိလုပ်ရာ လုပ်ခဲ့ပေမဲ့ တကယ်တမ်းကျ ဒီနည်းလမ်းက ဘာကိုမှ မဖြေရှင်းပေးနိုင်ချေ။ ဒီလိုနဲ့ မြို့တော်ကို ပြန်ရောက်တဲ့အခါ ကျန်းသခင်မလည်း စိတ်တည်ငြိမ်သွားတယ်၊ အစက မုမင်ထန်ကို ပိုက်ဆံနည်းနည်းပါးပါး ပေးပြီး ပြန်လွှတ်လိုက်မလို့ လုပ်ခဲ့ပေမဲ့ ဘယ်သူက ထင်မှာလဲ သူမက ကျန်းအိမ်တော်က စမ်းသပ်သမျှကို ကျော်ဖြတ်နိုင်ခဲ့တယ်။ ကျန်းသခင်မက ကြမ်းကြမ်းတမ်းတမ်း ဆက်ဆံတာတောင်မှ သူမက တောင့်ခံနိုင်တုန်းပဲ။
