كلي بكلك مغرم 🩶⛓️

كُـلـي بـِكـلـكِ مُــغـرم ⛓️🩶
الكاتبة:Roumaissa Asma 🍂
الحلقة1:

"حُبُكِ قَدْ سَكَنَ الْأَضْلَاعَ
فَأَصْبَحَ مِنْهَا الْقَلْبُ رَهِينَا"🐆❤️

في وسط حي شعبي من الاحياء الشعبية بإمتياز وين نلقاو بيوت صغيرة تقريبا قزديرية الشكل غريبة المنظر لكن الاجواء لي كانو وسطها نقصو من بشاعة منظرها بالناس لي كانو داخلين خارجين الولاد الصغار يلعبو وسط الحومة دايرين فوضة قدام ديورهم .. هذاك طالع و لوخر هابط وحدة تنشر و الثانية تحكي مع جارتها من التاقة الغاشي كامل يسمعو في حديثهم مركزين معاهم .. اصوات التجار لي فالسوق لي قدامهم واصلين حتى لعندهم يعني كااان جو تاع حي شعبييي اصيييل بإمتياااز  ..

في إحدى الديور لي كانت وسط الحي هذااك كانت كاينة دار متوسطة الحجم متكونة من زوج بيوت كوزينة صغيرة على قد الحال و صالون مربع الشكل فيه غير زوج مطارح و طابلة وسطهم ..كانت دار صغيرة حيطوها مقشرة اثاثها مبتذل المهم عنهم انها دار فيها سقف متغطيين و حاميين راسهم  بيه ..

في بيت من بيتوها كانو زوج بنات خاشعين وسط نومهم كل وحدة فيهم غارقة في حلمها عايشة فيه حتى تسمع صوت رافاي قدام وحدة من البنات خلاهم ينوضو بين زوج ..ثنيناتهم نومهم خفيف على حس صغير يطيرلهم نعاسهم ناضت اصغرهم لي كانت فعمر 22 و طفاتو لأنو هي لي دارتو باش تنوض و تروح تخدم شافت في ختها لي ناضت حتى هي و جاوبتها على كلامها لي قالتو ..

هِند:صباح الخير ..ماقتيليش بلي راح تخدمي ليووم..

رِيَامْ:راح نولي نخدم كل يووم ..

هِند:علاش بدلتي خدمة؟؟..

رِيَامْ:ايه .."غير استوعبت جوابها عاودت نفات براسها و نطقت بهدوء" قصدي لا مابدلتش بدلونا توقيت الخدمة برك ..

هِند:ان شاءالله برك ماتسمعيهمش من بابا تعرفيه هو اصلا باش دخلتي تخدمي نهار بنهاار و بسيف باش قبل دوكا كل يوم هفف ..

رِيَامْ:وااش نديرلوو ماالااا يحطهملي في يدي كي الناس نولي نشد الداار ..

هِند:لي يسمعك يقول عندو و راهو باخل علينا ياك تعرفي حالتنا علاش راكي تزيدي فيها ..

ريام قلبت عينيها عليها بملل من نفس الاسطوانة لي اعتادت تسمعها منهم و ناضت مبعدة عليها و من كلامها لي تقريبا حفظاتو من ختها و من يماها و حتى باباهاا لازم كل يوم يفكروها بنفس الموضوع حتى كرهت من تكراروو ليها..

دخلت لدوش و تقابلت مع لمراية لي عكست منظر وجهها و ملامحها لي ترسمو بوضوح على مرئ  من عينيها تبسمت و قربت كثر للمراية و هي تحفظ في تفاصيل وجهها لي تعشقهم و طايحةة وسط عشقهم لأخر نفس فيها ..

كانو عندها ملامح حادة للهيبة و الجبروت كانو هما عنوانها بشرة حنطية اللون و وجه بيضوي الشكل خدود مستديرة و حواجب كثاف على شكل هلال عيون لوزية مجبودين كيما عينين القطة حدقة بؤبؤها متسعة منعكس فيهم شعاع ناري كأنو راهي تشوف في لهيب قدامها و هي كانت تشوف غير في جمالها بالنسبة ليها..

انف طويل مقدود تحتو شفاه جزئهم العلوي رقيق والتحتاني ممتلئ لونهم مابين الوردي و الاحمر ورغم التشققات لي كانو فيهم الا انو هذاا كان اخر همهاا منظرها يعجبها بكل حالاتهاا و اخر همها هو ارائهم فيها ..

ختمت تحديقها بنفسها بإبتسامة خفيفة و غسلت وجهها بلخف مشطت شعرها لي كان لاحق طولو لكتافها بلونو الاسود و غسلت سنانها بلخف غير كملت روتينها الصباحي دخلت للكوزينة حطت القهوة طيب و هي رجعت لبيتها خملت فراشها و وجدت حوايجها لي راح تلبسهم و راحت وجدت فنجان تاع قهوة كحلا و قعدت متنغمة بمذاقها المُر مستمتعة بيه ..

شافت لساعة لقاتو لحق الوقت لي تروح فيه راحت لبست حوايجها لي كانو عبارة عن تريكو بدون اكمام لونو اسود جاي مع طايتها حتى نحتلها تفاصيلها من فوق و بينلها تفاصيل خصرها زادت لبست سروال اوفر سايز لونو رمادي و لبست فوقهم حجاب ازرق غامق و اسدال بنفس اللون ربطت خيمارها مليح و رفدت نقابها حطاتو على وجهها حتى تغطاو ملامحها و بقاو يبانو منها غير عينيها زادت دارت قفازتها رفدت صاكها و خرجت رايحة لخدمتها ..