كلي بكلك مغرم 🩶⛓️مكتملة

كلي بكلك مغرم 🩶⛓️48

كُـلـي بـِكـلـكِ مُــغـرم ⛓️🩶
الكاتبة:Roumaissa Asma 🍂
الحلقة48:

"حُبُكِ قَدْ سَكَنَ الْأَضْلَاعَ
فَأَصْبَحَ مِنْهَا الْقَلْبُ رَهِينَا"🐆❤️

همام شاف فيها بنظرات هادية و جوز لسانو على شفايفو بخفة حط طرف ابهامو عليهم يخمم فالجملة لي راح يقولها و يجاوبها بيهاا و بقا في جدال بين عقلو و قلبو كي العادة و بعد صمت دام لثواني قصيرة فقط نطق مجاوبها بكلام مكانتش متوقعاتو منو و حتى هو مكانش مخططلو لأنو قال عكس الكلام لي قالهولو عقلو  ..

همام:حتى انا حسيت روحي لازمني نشوفك..قلت خلي اليوم انا نجي نوصلك ..

ريام:امم حسيت بغيابي في حياتك مالا ..

همام:بزاف..

ريام:مالا ماتزييدش تبعد ولاا اديييني معااك كي تروح ماتخلينيش وحدي ..صغري كامل جوزتو وانا وحدانية رجعت مانحملش الوحدة ..

همام بقا ساكت يركب في كلامها داخل مخو فالاخير  تبسم بخفة و حركلها راسو بالايجاب مجاوبها بإختصار..

همام:اومبعد نشوف..

ريام:هاياا ديماريي دووك نطولو عليهم و تبدا هند تنهشلي في راسي..

همام:ياك رؤية شرعية برك ماشي خطبة ماشي لازم تكوني حاضرة ..

ريام:ختي هاذيي اسي الجنرال..

همام:مليح كي ختك سلكت من حقدك عليهم و خليتيها فاليستا الخضرا بعيدة عليهم..

ريام:ماعندها مادخلها هي .. مع انو فالاول كي كنت صغيرة كرهتها هه بصح كي كبرت وعيت و عرفت بلي هي اكثر انسانة طيبة بيناتهم ..

همام:ويماك؟ ماتبانش علاقتك سيئة معاها كيما باباك ..

ريام:ماشي مهيش غالطة و كانت قادرة دير علاجالي بزاف حااجات بصح معليش حتى هي تبقا مراة و تخاف هه كي يهدر الراجل دايمن كلمتو هي لي تمشي..ماتديهاش في روحك ماشي دايمن كلامك يمشي عليا..

همام:اومبعد نشوفو كلامك اذا صح ولا لا..و نشوفو كلام شكوون يمشي على شكون..

ريام:تشك فقدراتي؟؟ماحبيتهاش منك..

همام:ماتتغريش بثقتك بنفسك و قوة شخصيتك بزااف مكيش مع أي واحد راكي مع همام ..

ريام:اييه نشوفووها معع انو منيش نستهزا بقدراتك ههه عباالك اليامات هاذو لي ماكنتش فيهم كان يحكمني الفيد بزاف رحت حوست على معنى اسمك لقيتو اسم على مسمى قاالك همام من اسماء الاسد يعرف بالشجاعة و القوة ههه اومبعد جا في بالي اسم شباب ليك قلت من اليووم نولي نعيطلك بيه من كثرة مانحسو يليق بيك..

همام:ديتلك عقلك لدرجة وليتي تحوسي على معنى اسمي و تقارنيه بشخصيتي؟؟..و زييد اخترعتي اسم جديد راح تولي تعيطيلي بيه..

ريام:شكون قالك ديتلي عقلي؟ ..لا عقلي مزالو في بلاصتو حمدلله سقسيني على قلبي نقولك صح..

همام:قلبك ضربة وحدددة!..

ريام:امم ..مراحش نحشم و نقولها صح صح ديتليي قلبي قبل عقلي لأنوو جاامي تعامل معايا واحد بنفس معاملتك ليا صح افعاالك كامل جديةة و تحسهم نابعين من عقلك على حسب اساسياتك بصح على الاقل رااهو يعتبر اهتماام اول مرة نحس بكااش واحد اهتم بيا يااناس ههه ..

همام:مراهمش على حسب اساسياتي لي نشوفو يستاهل اهتمامي نعطيهولو لأنو يستاهلوو و كوونك وليتي مرتي يعني من واجبي نهتم بيك..

ريام:يعني راك تهتم بيا برك لأنو هذا واجبك كزوج ليا!..

همام:يعني تقدري تقولي..

ريام:امم مليح..

قلبت عينيها عليه بإشمئزاز من جوابو لي توقعت يقوللها خلافو و بقات تشوف لطريق و هي ساكتة مخلياتو مستغرب منها و من سكوتها المفاجئ شاف فيه بنص عين و حرك راسو بلاحول يحاول يفهم شخصياتها و يتعرف عليها ماعرفش علاش كانت قبل ثواني تحكيلو بكل حماس دوكا تقلبت فرد مرة و من ملامحها المخنزرة عرفها تكون تقلقت بصح من واش ماعلابالوش!..

ممكن لأنها كانت تستنا في جواب احسن من الجواب لي قالهولهاا ماتوقعتش يقوللها راني نهتم بيك برك لأنو هذاا واجبي توقعت يكون جواب رومنسي على قد افعالو بصح صدمها بلي قاالو غافلة على انو همام من النوع لي يعبر بفعلو ماشي بفموو يعني ممكن يخونوه الكلمات بصح دايمن اهتماماتو بأدق التفاصيل هي لي تفووز ..

خرجت من بئر افكارها العميق كي شافتو بدل طريق على غير الطريق لي يروحو منها لدارهم شافت فيهم بإستغراب و بقات ساكتة تتأكد من الطريق لي راهو ماشي فيها حتى تأكدت صح بلي خرج على مسار المدينة و راهو رايح لبلاصة خلاف .. بلعت ريقها بتوتر و نطقت بتساؤول و هي تشوف فيه بنظرات مضطربة..

ريام:لويين راح تديييني!!!..