كلي بكلك مغرم 🩶⛓️

كلي بكلك مغرم 133

كُـلـي بـِكـلـكِ مُــغـرم ⛓️🩶
الكاتبة:Roumaissa Asma 🍂
الحلقة133:

"حُبُكِ قَدْ سَكَنَ الْأَضْلَاعَ
فَأَصْبَحَ مِنْهَا الْقَلْبُ رَهِينَا"🐆❤️

قرب لجهة باب بيتها و طبطب فيها خاف لا تكون لتم مع ختها و هو يزدم ديراكت ماجاياش يديرها بقا يطبطب و يستنا في جوابها بصح ماسمع والو عرفها راهي وحدها لداخل برك ماحبتش تخرج تنهد بقلة حيلة و بقا واقف بصمت حاير فيها وفي قسوحية الراس لي عندها بقا مدة و هو ساكت فالاخير نطق بهدوء تقول ماهو لي كان راح يشعلها قبل ثواني..

همام:ريام!! ..حلي الباب خلينا نهدرو..

ريام نفخت بتذمر و ربعت يديها على صدرها تخمم واش تقولو من طريقة كلامو حساتو مهدن مافهمتش كيفاش حتى لقات روحها رايحة تفتحلو فالباب ..غير فتحتها و دخل للداخل قربت ليه و نطقت بنفس هدوءو رغم انها مكانتش طايقة تواجدو معاها ..

ريام:هانا هاديين دوكا رانا نحكو كأشخااص عاقلين مرااناش منصاعين لعصبيتنا راانا نتناقشووو كزوجييين صحاا قولي برك ..مراكش ملاحظ بلي راك تزيد عليها؟؟..

همام:الكلام هذا موجه ليك لا؟..

ريام:فاش قلقتك كي قتلك نقعد في دارنا! علاش ديما معاكس قراراتي!! مابيكش انا شخصياا مابيكش مسؤوليتي راك حاب رايك لي يجوز هذاا مكان!! ...

همام غمض عينيه بهدوء و عاود حلهم شاف فيها بنظرات عميقة ماقدرتش تفهم مغزاهم وقرب ليها شدها من يدها قعدها على السرير و هو قعد اجونو فالارض باش يكون مقابلها جوز لسانو على شفايفو بخفة و نطق بنبرة هادية..

همام:في ميزك نتي لي يخلي مرتو مريضة عند دارهم لي يكون عارف حالتهم المادية تكفيهم هما برك رااجل؟؟ دوك اناا علابالي بوضع والديك و على عيني نعاونهم بصح ماشي نعاونهم باش يصرفوهم عليك!! علاش تزوجت بيك مالا؟شوفي بالاك يكون تخمامي غير تخمامك بصح انا راجل مانقبلش نخلي مسؤوليتي على غيري و هاذي حاجة تقدري تقولي انو تعلمتها من خدمتي! مادامني مسؤول عليك يعني لازمك تكون قدام عينيا و زيد بدلتي رايك؟ماشي كنتي تقولي نتا السبب فلي صراا؟مادامي انا السبب خليني نتحمل مسؤولييتي وحدي!!.. وبلا الشي هذا كيفاش حبيتينا نتفاهمو و حنا بعاد على بعض! قتلك كي نعيطلك جاوبي حتى نلقاك مطفية تلفونك كيفااش حبيتي العلاقةة هااذي تنجح و نتي فجيهة وانا فجهة إلا اذا كنتي مكيش حابتها تنجح هاذي حااجة تولي ليك و مكاش مشكل كي نحلوها من دوك احسن مانبقاو معلقين هاكا..

ريام بلعت ريقها من كلامو الاخير و بقات ساكتة ماعرفتش علاش ماعجبهاش واش قال علاش حست بقلبها تزير عليها وقت جبد سيرة الفراق رغم انو ماقالهاش بصريح العبارة بصح هذا لي كان قاصدو حكت خدها بتوتر و جاوباتو ..

ريام:بصح مراحش نكون مرتاحة لتم!..ماعنديش القدرة باش نزيد نواجه يماك ولا نواجهك نتا بحد ذاتك ..

همام:حتى واحد ماراح يقلقك اذا تحبي هما يجو ليك ماعنديش مانع بصح باش نتي تبقاي هنا لا !!..

جوز يدو على خصرها حتى استقرو يديه لتم مزير عليها بخفة و جبدها لعندو حتى ولات قريبة ليه كانت خطة ذكية منو باش يشتتلها تركيزها بحركتو لي دارها ركز عينيه مع عينيها و نطق بهمس مكمل فتأثيرو عليهاا بكل سهوولة..

همام:خوودي الراي لمرة وحدة برك كوني عااقلة و ماتقسحيش راسك!!..

ريام:اوعدني اذا جيت معاك حتى واحد مايقلقني ولله ماراني قادرة حابة نرتاح!..

همام:مكاش لي راح يقلقك مادمني هنا..

ريام:كي تقلقني نتا نفكرك بهاذ الهدرة..

همام تبسم بخفة بلا مايحس و حرك راسو بالايجاب مسايرها ناض من مكانو و نوضها معاه خلاها راحت جابت حجابها لبساتو و تلفتت ليه تحكي وهي دير فخيمارها ..

ريام:راح نقول لهند جي معايا ..

همام:كيما تحبي..

قرب ليها باسها على راسها بخفة و نطق بهمس قدام وذنها حتى حست بفراشات قاعدين يحومو وسط انسجة قلبها دغدغوها خلاوها تحس بشعور جديد قاعد يغمر فيها وهي معاه ..

همام:كان تبقاي دايمن هاكا عاقلة ماشي خير؟..

ريام:ماشي خير..

همام:معليش اومبعد نرجعك عاقلة على يديا متخافيش راهم جايين الياامات هاذوو ..