كلي بكلك مغرم 🩶⛓️

كُـلـي بـِكـلـكِ مُــغـرم ⛓️🩶
الكاتبة:Roumaissa Asma 🍂
الحلقة29:

"حُبُكِ قَدْ سَكَنَ الْأَضْلَاعَ
فَأَصْبَحَ مِنْهَا الْقَلْبُ رَهِينَا"🐆❤️

تقرييبا طريق كاامل جوزوها و هما ساكتين واحد فيهم ما نطق هي كانت لاهية تخمم في مستقبلها المجهول معاه و هو يخمم فأمور العرس هذا لي قررلو على غفلة و حبو يكون بعد سمانة قطع تفكيرو فالعرس كي تفكر واش دارت مقبيل مع عايلتها و تلفت ليها لقاها غايسة فالطريق باين حتى هي راهي غارقة وسط تفكيرها لي كان مديهاا لبعيد حمحم باش يلفت انتباهها و نطق بهدوء..

همام:لهاذ الدرجة مشاكلك مع عايلتك خلاك توصلي معاهم لهاذ المواصل..

ريام:وشمن مواصل؟..

همام:يعني حطيتيهم تحت الامر الواقع و خليتيهم يقبلو بقرارك بلا ماتدي شوارهم ..

ريام:مايهمنيش في رايهم المهم انا راني قابلة ..بزاف حاجات كنت محتاجة نسمع رايهم فيهاا ولاا بلا مانسمع رايهم يوقفو معايا على الاقل بصح مالقيتهمش علاش نلقاهم دوكا؟..

همام:لهاذ الدرجة حاقدة؟؟..

ريام:كل وااحد و كيفاش يخمم و اناا لي يقيسني نمحيه من قاموسي ..

همام:واش دارولك؟..

ريام:كي تولي راجل ريام نحكيلك ..

همام شاف فيها بنظرات تعجب مطلع حاجبو للفوق مستغرب من كلامها اومبعد ضحك بخفة كي تفكر بلي هو لي قاللها الكلام هذا كي قاتلو احكيلي قاللها كي تولي مرت الجنرال نحكيلك عرفها بلي هي انسانة مهتمة بالتفاصيل و العجيب انها ماتنساهمش ..حرك راسو بالايجاب متفهم كلامها و جاوبها ...

همام:كيماا تحبي..

ريام:حتى نتا راح تحكيلي واش حكياتك قتلي كانو عندك مشاكل مع عايتلك ..

همام:ان شاءالله..

ريام:اييه قولي واش حكاية العرس هذا لي بعد سمانة ..

همام:جاتني فرصة و ماحبيتش نضيعها اليامات لي مور العرس راح نتضغط شوية بالخدمة يعني عجلت باش نتهنا و مانخليكش معلقة معايا تستناي فيا ..

ريام:اممم معليش ..

همام:العرس مراحش يكون كيما العراس لي تعرفيهم راح يكون على اساس بروتوكوول محدد يعني عرس الجنرالات..

ريام:علاش الجنرالات عندهم عرس محدد؟..

همام:ايه راح يكونو حاضرين شخصيات مهمة فيه ..

ريام:يااا رااح يجييي الرئيييس يحضر عرسييي..

همام:تحمستي شوية لا؟؟ ..

ريام:علااه؟؟ نتا قلت شخصيات مهمة ..

همام:تاع الخدمة برك..المهم عايلتك اعرضي منهم شوية برك مايفوتووش 40 واحد ..

ريام:40 وااحد ههه بين عماتي و خالاتي و ولادهم مراهمش ربعين..

همام:الله غالب هذاا وااش كااين..

ريام:معليش تهنيا منهم اصلا ..يجو غير يهدرو فيا واش لبست و واش مالبستش و يزيدوو يضربووك ليا بعين بسم الله الرحمان الرحيم اعووذ بالله من الشيطاان الرجيم..

همام:راح تلبسي لبسة وحدة برك..

ريام:يااه! واش البروتوكل هذاا تاعكم ..

همام:راح نعوضك علييه نكمل خدمتي لي مور العرس و نديرلك العرس لي راكي حاباتو و ديري فيه واش تحبي ..

ريام:امم ان شاء الله..و العقد وقتااش يكون؟؟..

همام:نهار العرس..

ريام:كيما الاترااك ههه مليحةة ..اييه قتلي راح يكون فيه شخصيات مهمة يعني راح يكون ميكس؟؟؟ ..و اناا؟ في عرسي و نبقا بنقابي ولا كيفاش!..

همام:ايه مع الاسف ..

ريام:هفف ماانتفاهموش هااكا ماالا..

ربعت يديها على صدرها و دورت راسها لجهة التاقة معصبة غير مع روحها شاف فيها بنص عين و تنهد بقا ثواني و هو ساكت فالاخير نطق مجاوبها بهدوء..

همام:ياك قتلك راح نعوضك عليه و نديرلك العرس لي راكي حاباتو و نتي تحكمي فيه و في تسييرو ..

ريام شافت فيه و رخفت غوباشتها مصبرة روحها بالكلام هذاا من اهتمامو بررك أما هي مكانتش حابة لا تعاود العرس لا ديرو كيما راهي حابة لأنو اصلا عجبتها طريقة العرس لي حكالها عليها إلا في نقطة النقاب لي راح تبقا بيه أما هي مهيش من النوع لي يحب التضخيم عرس سامبل برك يكفيها ..

حركتلو راسها بالايجاب ممتنة لكلامو و نطقت بنبرة هادية مخلياتو هايم وسط نظراتها لي رغم انها كانت تشوف فيه بطريقة عادية إلا ان الحِدة لي يتميزو بيهم بقات طاغية عليهم..

ريام:بلا ماتعوضني وجودك معايا يكفيني..! نقولك على سر صغير؟؟..

همام:قولي..

ريام:نتا اول واحد توقف معايا و ماتخلينيش..كي عيطتلك جيت ليا و خليت شغلك باش ماتخلينيش وحدي و زدت أمنتني بلي منيش نكذب و وقفت معايا ماخليتنيش .. على عكس عايلتي شفت بابا واش دار كي وصلت هاذيك الورقة لدار! شكرا على وجودك في حياتي!..