كلي بكلك مغرم 🩶⛓️

كلي بكلك مغرم 🩶⛓️41

كُـلـي بـِكـلـكِ مُــغـرم ⛓️🩶
الكاتبة:Roumaissa Asma 🍂
الحلقة41:

"حُبُكِ قَدْ سَكَنَ الْأَضْلَاعَ
فَأَصْبَحَ مِنْهَا الْقَلْبُ رَهِينَا"🐆❤️

بالرجوع لعند ريام لي كانت واقفة قدام الخزاانة تشوف فالروبات لي كانو معلقين قدامها بمختلف الالوان و الاشكال جبدت وحدة منهم كان لونها باج قماشها صاتان ستيلها ستيل قفطان بصح هي سامبل عليه فيها حزام رقيق مزينها و شوية عقاش على كول رقبتها يديها لاحقين لمرفقها و طولها طويل واصل لرجليها  ..

نحات واش كانت لابسة و لبستها بلخف مشطت شعرها حتى تسرح و زادت دارت شويةة مكياج نحات اثار التعب بيه برك بلا ماتكثر منو دارت قورمات خيطها رقييق و كلاس في يدها و خلات خاتم زواجها مزين يدها اليسرى بااين و عااطي العين بكل وضوح ..

خرجت من البيت بعدما تأكدت من منظرها و رضات عليه و هبطت للتحت كلما كانت تقرب كلما صوت التوبيخ يلحق لمسامعها بكثرة عقدت حواجبها بإستغراب و كملت طريقها بإتجاه الصوت لقات كامل الخدمات فالصالون واقفين فصف واحد حانيين راسهم و سراب مقابلتهم ترخس فيهم غير لمحتها داخلة عرفتها بلي هاذي هي لي تزوج بيها همام و رغم انو منظرها كان واضح وضوح الشمس بلي راهي هي مولات الدار إلا انها دارت لي في راسها و نطقت كلماتها بشظاياا السم لي فيهاا ..

سراب:و نتييي وين كنتييي؟؟علاش مكيش معااهم!!..كلماا نبعد من هاااذ الداار ديروو فييها واش حبييييتو بصصصح خلاااص راني جييت كلشي يولييي لبلاصتووو..

ريام قربت ليها و هي طقطق ببليغتها وقفت مقابلتها تشوف فيها من فوق للتحت و ربعت يديها على صدرها تناظر فيها بنظرات جامدة كي فهمت معنى كلامها لي حبت تمعنيلها بيه بلي راهي خدامة كيما هما رسمت شبه ابتسامة ماكرة على ثغرها و نطقت بنفس اسلوبها ..

ريام:من وقتاش كبيرة الخدم تهدر هاكا قدام مولات الدار؟؟..

سراب غير سمعت جوابها حطت يدها على قلبها و حلت فمها بصدمة ماتوقعتش تقلل احترام معاها لهاذ الدرجة متناسية انو هي لي بدات و هي لي حلت بيبان جهنم على راسهاا ..

سراب:كبيرةةة الخدممم؟؟؟؟؟؟ راااكييييي واعيةةةةة لواااش رااكي تقوووولييييي ..اناااا يماااات هماااام المنصوووري تهدريي معاياا هااكاا ..

ريام:و انا مرت همام المنصوري متشرفين!..

سراب سكتت لثواني و هي تشوف في نظراتها الباردة ليها لي ماكانو يعبرو على حتى ردة فعل البرود كاان عنوان لملامحها الهادية .. خدات نفس قصير قيسما قدرت تستوعب فيه بلي مهيش قدام وحدة ساهلة لي تركعلها بلخف و تبسمتلها ابتسامة اصطناعية مدعية فيها الصدمة..

سراب:اوو نتي هي مرت وليدي ماعرفتش سمحييليي..مااكنتش متوقعة نشوف وحدة كيما نتي قدامي صراحة..

ريام:سبحان الله حتى انا تخربطولي الخيوط غير شفتك تقول شفت الشاف تاع الخدامات لي تعطيلهم الاوامر شفتها لبارح برك بقيت متفكرتها ..كيما علابالك رااني عرووسة جديدة مزال ماتعرفت عليكم كامل..

سراب ضحكت ضحكة صفرة و جاوبتها بتقزز و هي تقرب ليها تحاول تلف الموضوع و تشوف كيفاش طبق خططها وتخليهم لأومبعد خطوة خطوة..

سراب:امم واضح ..نتعرفوو؟؟ ..

ريام:اييه تفضليي للداخل ..

دارتلها اشارة باش تدخل لصالون و راحت سابقتها رافعة مناخيرها لسما ترميلها في معااني من تحت للتحت باش تولي تعرف و تشد قدرها عندها لأنو من تشبيه الخدامات لي شبهتها بيه عرفتها عندها مشكل في اختلاف الطبقات و ماقدرتش تسرط فكرة انو وليدها الجنرااال لي عندو ارااضي و ملووك و فلووس يتزوج بوحدة فقيرة كيما هيي تسكن في حي شعبي فقير مبتذل! يعني عرفت بلي تفكيرها راهو متوقف غير علاجال النقطة هاذي بررك ..

دخلت لصالون و قعدت على الفوتاي حاطة رجل فوق رجل بقات تشوف فيها حتى جات قعدت مقابلتها و نطقت بهدوء و هي متبسة شبه ابتسامة صغيرة ..

ريام:اييه يماات رااجلي مالا..

سراب:هه ايه..

ريام:مرحبا بيك في داري..

سراب شافت فيها بمعنى منيتك و جاوبتها بضحكة صفرة مزيرةة ماشي حااملة تحكي معاهاا خاصة كي شافت طريقتها و قوتها فالكلام و الاجاية لأنو كانت متوقعتها بأسلوب فقير كي حالتها حتى خرجت عكس توقعها وصدمتها بجرئتها و قوة شخصيتها ..

سراب:يسسلمك..

ريام:كشماا تحبي يضيفووك ..

سراب:لا مرسي..اييه احكيلي كيفاش حتى تزوجتو كيفاش تعارفتوو متشووقة نعرف حكايتكم ..

ريام:شاافني مرةة طاح في حبيي ربي يحفظهولي زوجي قرة عييني غير شافني قاال غير هاذي لي نتزووج بييها و بقاا يتبع فياا حتى وافقت عليه و دااني ..

سراب:امم حبيتني تقنعيني بلي هو لي جرا موراك و وين في حومتك لي مستحيل يعفس تراابهاا  ..

ريام:ماعندي علاش نقنعك سقسيتي جاوبتك حبيتي تقتنعي روحي سقسي وليدك ..

سراب:ههه تربية الشوارع هاذي كنت متوقعة وحدة كيما نتي يعني ماتصدمتش منك..

جات راح جاوبها حتى قطع عليها كلامها صوت تلفونها لي صونا قدامها حركتلها راسها بمعنى اصبري عليا برك و جاوبت على الاتصال لي كان بإسم همام ..

ريام:الوو ..

همام:بعدي من المشاكل بلا ماتعيي روحك و جاوبيها تعيا تولي تسكت وحدها..

ريام :عفوا!!..."طلعت راسها تشوف فالباب مالقات حتى واحد عقدت حواجبها بإستغراب و كملت تحكي معاه" وين راك..

همام:ديري واش قتلك و ماتحوسيش تفهمي..!!