كلي بكلك مغرم 🩶⛓️مكتملة

كلي بكلك مغرم 🩶⛓️

كُـلـي بـِكـلـكِ مُــغـرم ⛓️🩶
الكاتبة:Roumaissa Asma 🍂
الحلقة30:

"حُبُكِ قَدْ سَكَنَ الْأَضْلَاعَ
فَأَصْبَحَ مِنْهَا الْقَلْبُ رَهِينَا"🐆❤️

بعد اسبووع جوزاتو ريام في دار عمتها حتى بقا نهار واحد برك لعرسها باش قررت تروح لدارهم رغم انو باباها و يماها عيااو فيها باش تولي لدار معاهم بصح حلفت الا تروح لأنو علابالها بلي راح يبداو يعبروو على عدم قبولهم لعرسها و هي مهيش حابة تكسر راسها فالموضوع هذا و مادامها قررت اكيد راح طبق قرارها سواء برضايتهم ولا بلاش...

خرجت من دار عمتها بعدما ودعتهم و راحت كانت راح تروح لدار فالاخير بطلت و ماداام همام كان مدلها دراهم باش تشري لجهازها قررت تروح تكمل لي خصها بيدما خرجت لأنو تقريبا كملاتو شرات غير الحوايج و الكوسميتيك العفايس تاع الدار قاللها ماجيبي والو و هي جاتها من الجنة و الناس لقات غرضها فالشريان و شرات كامل واش كان خاصها و ناقصها كي كملت كامل واش شرات بعتتهم مع همام باش يديرهم في بيتهم تحت طلبو هو باش يوجد كلشي قبلما جي لعندو ..

وصلت لدارهم بعدما جوزت تقريبا عشية كاملة و هي برا كملت فيها كامل واش سحقت و دخلت للداخل هند غير شافتها داخلة تبسمت بإشتياق و قربت ليها عنقتها فرحانة بشوفتها ..

هند:تووحشتتك علاش ماحبيتيش تولي لدار ..

ريام:هاني وليت..

هند:كي بقاا نهار و تتزوجي..

ريام:اييه الله غالب هذاا الموجود..

هند:معليش.. مقبيل وصلونا بايط كبار تخيلي واش فيهم! لبسة تاع عرس..قفطان لماما و انا عبااية خليجيةة بنقابها و لبابا قميص هه ..

ريام:اييه هاذوو غير اهتمامات زوجي الله يحفظوو ..كيما علابالك السيد شخصية مهمة و العرس لازم يكون تحت بروتوكولات و الخرطي هذااك يعني خمم فيكم و جابلكم لبسة ..

هند:يعني راح نروحو كي الضياف ..

ريام:ايه ..

هند:بصح فهمينا فيها هاذي وقتاش تلاقيتو كيفاش تعرفتو كيفاش حتى قررتو تتزوجو كلشي جااز بزربة ..

ريام:اممم هاكي قلتيها جاز كلشي بزربةة تعارفنا صدفة و زدنا تلاقينا ببعض بزاف مرات فالحومة اومبعد خلالي رقموو و كي حصلت عيطتلو يعاوني و عاونييي و ماتخلاش عليااا و وقف معاياا و طلب مني لحلال و انا قبلت لأنو لقيتو خير و ارحم من عايلتي..

هند:ماتقوليش هاكا ريام تعرفيه باباك كي يتقلق كيفاش يوولي صح غلط بصح ندم و شفتي واش صرا فيه ..

ريام:جاازت الحكاايةة..خلينيي نروح نرتاح غدوة عرسي ..

هند:خلينا على الاقل نحسوه جو الاعراس هايا خليني نوجدلك ماسكات ديريهم لوجهك و نتي ادخلي دوشي دووش عميييق و اروااحي..

ريام:كنت ناوية نروح للحمام و عجزت ..

هند:باالاكيي ياختي خلينا من الحراام ..

ريام:علاش؟واش لي حرام فالحمام..

هند:الرسول صلى الله عليه وسلم قال : ( مَنْ كَانَ يُؤْمِنُ بِاللَّهِ وَالْيَوْمِ الْآخِرِ فَلَا يُدْخِلْ حَلِيلَتَهُ الْحَمَّامَ ) وحسنه الألباني في صحيح الترمذي .
وحليلته أي زوجته و في دليل ثااني روى الترمذي : أَنَّ نِسَاءً مِنْ أَهْلِ حِمْصَ أَوْ مِنْ أَهْلِ الشَّامِ دَخَلْنَ عَلَى عَائِشَةَ فَقَالَتْ : أَنْتُنَّ اللَّاتِي يَدْخُلْنَ نِسَاؤُكُنَّ الْحَمَّامَاتِ ؟ سَمِعْتُ رَسُولَ اللَّهِ صَلَّى اللَّهُ عَلَيْهِ وَسَلَّمَ يَقُولُ : ( مَا مِنْ امْرَأَةٍ تَضَعُ ثِيَابَهَا فِي غَيْرِ بَيْتِ زَوْجِهَا إِلَّا هَتَكَتْ السِّتْرَ بَيْنَهَا وَبَيْنَ رَبِّهَا ) وصححه الألباني في صحيح الترمذي يعني خلينا نتقيوو الشبهات ياك كاين دوش فالدار دوشي فييه..

ريام:خلااص مالا وجدي واش قلتي و انا نروح ندوش .. ماكان حتى واحد فالدار؟منيش نسمع في حسهم..

هند:بابا راهو فالجامع و ماما خرجت تشري دوزان تاع الحلوة باش ديرلك صنف تااع التشاارك تديه معاك لدار زعما الفاال كي ماخليتوهاا دير والو ههه ..

ريام:هو قااالي كلش راهو واجد ..

هند:اييه معليش ..هايا روحي لدووش دوك نوجدلك حوايجك..

ريام:شريت بيجامة جديدة راهي فهاذ الصاشيات و أدي وحدة شريتهالك ليك ..

هند:يااا شكراا ..

راحت بزربة تشوف واش شراتلها و خلات ريام واقفة فنفس بلاصتها متبسمة لفرحتها لي شافتها فيها رغم انو جاست صغير بصح فرحهاا و حتى هند بدورها فرحت بالجاست كثر من البيجامة لأنو بفعلها بينتلها بلي صح هي قلبها بيض مع الناس لي يسحقو تبينلهم حبها ليهم أما مع الناس لي يكونو سبب في حزنها تكون معاهم كشخص ثااني عكس شخصيتها الاولة ..

دخلت لدوش ودوشت دووش عميييق رجعت جديدة بييه حست بروحها راهي عروسة صح بعدما كملت خرجت لقات هند وجدتلها البيجامة الجديدة لي قاتلها عليها و جبدت الماسكات لي اصلا موالفة ريام هي لي تشريهم راحت لبست حوايجها بلخف و عاودت رجعت ليها خلاتها دير فيهااا واش حبت ..

دارتلها ماسك على وجهها و خلاتو ينشف راحت جابت مشطة و بدات تمشطلها في شعرها نشفتهولها بالسيشوار و دارتلها فيه قردون بعدما نشف الماسك راحت غسلاتو و دارتلها وحدوخر و تقريباا هكاك جوزو وقتهم حتى جات يماهم و بدات دير فالحلوة لتم وين حسو بلي كان جو شوية عرااسي عاشوه مابيناتهم برك و قدرت تحس بشوية فرحة تتسارا في عروقها و تخليها مرتاحة فوسط الاجواء لي كانت تعيش فيهم معاهم لأول مرة ..