كلي بكلك مغرم 🩶⛓️مكتملة

كلي بكلك مغرم 240 الى 250

كُـلـي بـِكـلـكِ مُــغـرم ⛓️🩶
الكاتبة:Roumaissa Asma 🍂
الحلقة241:

"حُبُكِ قَدْ سَكَنَ الْأَضْلَاعَ
فَأَصْبَحَ مِنْهَا الْقَلْبُ رَهِينَا"🐆❤️

في بلاصة اخرررى بعيدة عليهم و عند هند لي كانت هذاك وين ناضت لبست بينوارها و راحت غسلت وجهها و دخلت للكوزينة باش توجد الفطور الصبااحي قبلماا ينوض اديب و يروح للخدمة كانت منغمسة وسط افكارها تخمم لبعيد حتى سمعاتو ناض بيدما حطت كلش على الطابلة لقاتو داخل لعندها وهو لابس حوايجو تاع الخدمة راح قعد قدامها على الطابلة و جغم من فنجال قهوتو لي كانت فرغتهولو و هي تحكي بنوع من الانزعاج..

هند:اليامات هاذي راني حاسة كاش حاجة راهي صايرة و انا ماعلابااليش ..

اديب طلع عينيه فيها مستني منها تكمل تقولو واش هي بصح لقاها سكتت تخمم مع نفسها حتى اثارت استغرابو حرك راسو بمعنى واش كاين و جاوبها بإستغراب..

اديب:واش هي؟..

هند:ماعلاباليش.. ريام ماشي موالفة ماجاوبش عليا كي نعيطلها عندي يومين و انا نعيط مجاوبش حتى على المساجاات تقلقت عليها ..وزيد موالفة حتى و اذا ماعيطتش انا تعيط هي تسقسي..

اديب:مهيش فدار..احم قصدي بين زوج ..مراهمش فدار..

هند:وين راهم؟..

اديب:مانعرف..ممكن يكونو راحو كيما المرة لي فاتت ..

هند:بصح ماقاتليش..ماشي موالفة تغيب هاكا ..زعما نروحو عندها ..

اديب:قتلككك مكااشهم وين ترووحي ماتفهميش!!..

شافت فيه بنظرات تعجب و طلعت حاجبها فيه للفوق مجاوباتو بنفس نبرتو لي حكا بيها معاها متعمدة تحكي بيها باش تخليه يفيق لواش دار لأنو حساتو تحمس شوية معاها و مهوش من عوايدو يهدر معاها بهاذ الطريقة ..

هند:فهمنا و العياط علاش!!..

اديب:احم ماحسيتش على روحي ..

هند:مرة ثانية حس اومبعد اهدر ..

اديب:غلطناا و مننك السمااح اهندووش قلبي وليتي على نبشة صغيرة تشعلي غير الخير..

هند:لأنو تستاهل و عقالتي معاك مجابتش نتيجة نولي مانحشمش خير ماتولي لعوايدك ..

اديب:معليش اسيدي حلوة من عندك ديري لي تحبييي راني قابل بيه ..

هند:ماعندكش خيار ثاني اصلا..

اديب:اااه ااه القطة ولات نمرة ..

هند:النمرة لي كي تقلقها تعضك ماشي غير تخبشك برك ..

اديب:على حساب كلامك ماتكونش شي نمرة صغيرة جاية فالطريق..

هند:راهي جاية ختك تعرفها؟..