كلي بكلك مغرم 🩶⛓️

كُـلـي بـِكـلـكِ مُــغـرم ⛓️🩶
الكاتبة:Roumaissa Asma 🍂
الحلقة28:

"حُبُكِ قَدْ سَكَنَ الْأَضْلَاعَ
فَأَصْبَحَ مِنْهَا الْقَلْبُ رَهِينَا"🐆❤️

ختمت تزغريتتها بضحكة و بقات تشوف في وجهوهم المصدومة حرفيااا صدمتهم بالعملة لي دارتها ماكانوش متوقعينها توصل للجرأة هاذي و جيبلهم راجل و تصدمهم بخطبة فجائية ماكانو حاطيها لا على البال و لا على الخاطر هند قربت ليها و شدتها من يدها باش تخرجها و تفهمها فالمهزلة هاذي لي راهي دايرتها حتى وقفتها كي نفضت يدها منها و نطقت ..

ريام:شبيك؟..رااح نقطعو القااطو و نلبسو الخواتم و نولو خطيب و خطيبة هه عادي كلشي جا بزربة قلت خلي نزيد نزربها كثر ..

هند:ريام واش راكي ديريي!!وقتهاا!؟؟؟..

ريام:اييه عاادي زوجي المستقبلي خدام في سلك الدوولة ماعندوش الوقت للامور هاذي علابيها زربناا ..

قطعو كلامهم بين زوج كي شافو همام تقدم لعند ناصر لي كان يشوف فيهم بلا مايعبر ولا يقول أي كلمة صدماتو بواش دارت و من صدمتو ماعرفش واش يقول اصلا..

شاف في همام لي قرب ليه و بقا يسمع لواش كان يقولو بجدية وبكل هيبة طاغية عليه ..

همام:اسمحلنا عمي صح زربنا عليكم بصح كيما قاتلك خدمتي دايتلي كامل وقتي نخدم فالدولة و راك علابالك خدمتنا شحال صعيبة صح المكان مهوش مناسب بصح بنتك قلبها طيّب بزااف و حبت تفرحك و نتا فسبيطار ..

ناصر:زربتو بزاف ماشي هاكا تكون الخطبة و الزواج الزواج مهوش لعبة ..

همام:صح عندك الحق بصح الرسول قالنا "من اتاكم من ترضون خلقه و دينه فزوجوه الا تفعلو فتكن فتنة في الارض و فساد عريض" يعني صح جات بزربة بصح مافيهاش مادرناش العيب و بلعكس حبينا الحلال..

ناصر:واش حبيتني نقولك لي فيها خير هاذيك هي..الجيل تاع دوكاا يديرو لي يحبوه هماا برك ..

ريام كانت واقفة حاطة يدها على خدها تشوف فالتغيير الجذري تاع همام قريب ماعرفاتوش بلي هو لي راهو يهدر خاصة كي دخللهم الدين فلوسط جابلها الضحك بالجدية لي شافتها فيه رغم انو موالف بجديتو معاها بصح رغم هذا جاها غريب..

كي شافتو كمل كلاموو سفقت بيدها باش تلفت انتباههم و تسكتهم ثاني لأنو اذا زاد طال الحديث مراحش تفراا معاهم خاصة كي لاحظت بلي حتى واحد فيهم ماكان باين فيه انو قابل فحبت تحطهم تحت الامر الواقع وتخليهم يتقبلو قرارها بسيف عليهم ..

ريام:ايييييه هااايا نقطعووو القااطووو ..

راحت رفدت القفة لي جابتها يماها و بقات تحوس فيها حتى لقات داخلها موس و زوج مغارف و طبسي جبدتهم و راحت قسمت من القاطو و بدات تاكل منو راحت مدتلهم كامل شوية شوية غير ناصر و همام لي ماحبوش ياكلو اما هند و راضية كانو مسايرين ريام في هبالها برك مخليينها دير واش تحب اومبعد يشوفو كيفاش يحلوها معاها ..

ريام:اييه بقاات غييير اللحظة المنتظرةة..

راضية:وشمن لحظة ابنتي راكي زربتي بزااف ماقتيلناش اصلا بلي راح ديري الشي هذا..

ريام:حتى انا ماكنش علابالي يعني..تعودو تقولو كنت معاه ..راني عرفتو من شي سمانة و لازوج برك..و لباارح طلب مني الطلب هذا و وافقت وجيت ليكم..

راضية:بصح مانعرفوهش..

ريام:بصح انا نعرفو! على عكسكم نتوما هو وقف معايا و ماخلانيش عاوني! و في اول فرصة سمحتلوو طلب مني الزوااج واش حبيتو كثر ياك راهو حابب لحلال!..

راضية:دبري راسك ابنتي واش نقولك خلاص راكي قررتي ..

ريام حركتلها راسها بالايجاب كتأكيد على كلامها زعما قرارها هو لي يمشي كيماا راهي حاابة و نحات قفزاتها بزربة قربت لعند همام لي كان يحرك في راسو بلا حول من هبالها و وقفت قدامو و هو بدورو فهمها و جبد خاتم من جيبو دارهولها في صبعها و طلع راسو ليها يشوف في عينيها لي كانو يلمعو بإعجاب من جمال خاتمها تبسم ابتسامة صغيرة و نطق بهمس..

همام:مبروك عليك و علينا ..

ريام:يبارك فيك و فينااا ههه..العااقبةة لزوااج ..

همام:لي راهو مور سمانة ..

ريام:اوو!!! ..زربت عليا سي الجنراال ..

همام:خير الامور أعجلها!..

ريام:سبحان الله شعر جديد هذاا معلييش كيما تحب..

تلفتت لعايلتها لي كانو يشوفو فيهم بدهشة و رفدت يدها ليهم باش يوضاحلهم الخاتم و نطقت بحماس..

ريام:ايييه سمعتوو عرسي السماانة الجااايةة ..

راضية:مراحش يكفينا الوقت باش نوجدولوو زيدو خمو شوية ماتزربووش ..

همام:ماراح توجدي والو اخالتي كلشي راهو واجد لي عليكم توجدو رواحكم برك و جو للعرس ..

راضية:كيما تحبو واش حانقول..

ريام:اييه ماالا نخلييكم مزاالني راح نبقا عند عمتي اليامات هاذو هاايا تبقاو على خير ..

رفدت صاكها و خرجت همام شاف فيهم بإحترام و زاد خرج حتى هو هبط للتحت لقاها تستنا فيه برا دارلها اشارة لطونوبيل تاعو و هي راحت ركبت فيها زاد ركب هو و قلعو رايحين مع بعض..