كلي بكلك مغرم 🩶⛓️

كلي بكلك مغرم 114

كُـلـي بـِكـلـكِ مُــغـرم ⛓️🩶
الكاتبة:Roumaissa Asma 🍂
الحلقة114:

"حُبُكِ قَدْ سَكَنَ الْأَضْلَاعَ
فَأَصْبَحَ مِنْهَا الْقَلْبُ رَهِينَا"🐆❤️

عند ريام لي كانت مزالت قاعدة وين خلاها حاطة راسها على الحيط تشوف لنقطة وحدة التفكير هلكها و جسدها مهلوك اكثر من تفكيرها حتى حاجة فيها ماكانت صحيحة صح الناس كي يبداو السبور لأول مرة يحسو بإنقباضات في عظاام رجليهم بصح هي راهي تحس بإنقباضات و تورمات و تكسرات و تشققات على مستوى كل جسمها تقول جاز عليها كاميون دقدقها ماخلا فيها مايتصلح ..

غمضت عينيها كي ستحلات القعدة لي كانت قاعدتها و جات راح تغفى حتى حست بأنفاس سخونة يضربو في وجهها لوهلة كانت راح تكمل غفوتها من تعبها حتى تخلل لمسامعها صوت زمجرات خفيفة سوااسواا قداام وذنيها حلت عينيها ببطئ و هي تدعي باش مايكونش في فبالها حتى لقات الكلب هذاك واقف قدام راسها يشمشم فيها و لي خافت منو طاحت فيه..

بلعت ريقها بتوتر و ناضت بشوية تحاول ماتبينلوش خوفها باش مايهجمش عليها طلعت راسها تحوس على همام مابانلهاش لتم نفخت بسخط و بدات تبعد عليه بشوية و هي مغمضة عينيها تحاول تتناسا في تواجدو معاها باش تركز على خطواتها و ماتتلفلهاش المشية من الخوف لي ركبو فيها لأنو بين مقبيل و دوك فرق كبير مقبيل كان بعيد عليها قدرت تلعب عليه خطة عكسية و راحت تجري بإتجاهو خلاتو يهرب منها دوكا ماعندها حتى مفر راهو قريب ليها فأي خطوة ديرها ينقض عليها ..

كلما تبعد خطوة تفتح نص عين و تشوف وين راه تلقاه مزالو بعيد غير دخلت لساحة وقفت في مكانها مصلبة حالة عينيها بصدمة الدم جمد فيها من منظر مجموعة الكلاب لي كان لتم كل واحد فيهم من نوع مختلف هذا بوكسر و هذاك بولدوڨ و من هيه دوبرمان ثاني الحاصول كل كلاب من انواع الحراسة و التدريب كانو لتم حرفيا مشهد مرعب شافتو مقابلها خلاها تحس بالبولة راح تهبطلها ..

شافت فهمام لي كان واقف وسطهم و حركتلو راسها بمعنى واش راك دييير من كثرة ما لسانها عجز عن التعبير متقدرتش حتى باش تهدر من المنظر المرعب هذاك ..

شاف فيها من بعيد بتحدي و تبسم بإستهزاء حط يديه فجيابو و نطق بهدوء و هو يشوف فملامحها المضطربة يحاول يشتت تركيزو منهم باش مايبدلش خططو و يبقا محافظ عليهم  ..

همام:واش رايك عجباتك الفكرة؟..

ريام:وشمن فكرة!! غاضتك كي قدرت على كلب واحد دوكا جبتلي خمس كلاب و نتا سادسهم فيهم؟؟؟..

همام شاف فيها بملامح ممحية من أي ردة فعل و بقا يرمش فيها بهدوء كأنو الامل الوحيد لي كان دايرو فيها طفاتو بكلامها لي ماقدرتش توزنو و تضبطو قداامو ..خدا نفس طويل بعدما بعد كل افكارو البريئة من راسو و جاوبها بنبرة هادية ..

همام:حاليا راح تواجهي غير هاذ الخمسة اومبعد شوية تواجهي السادس فيهم و تشوفيه واش قادر يدير..

ريام:واش راح دييير!!..

غير شافت حركة يدو لي دارها عرفاتو راح يطلقهم عليها بلعت ريقها بصعوبة و بدات تتراجع بخطواتها للور حتى قفزت بذعر و حطت يدها على قلبها لي حساتو حبس و رجع نبض على صوت نبيح الكلب لي كان موراها نساتو كامل ..

حركت راسها بنفي كي لقات روحها محاصرة بينهم و بلعت غصتها بسيف كي حست بدموعها على يخونوها و يهبطو فموقف كيما هذا عضت على شفايفها بقوة باش تشد بكيتها داخلها و نطقت بهمس..

ريام:ماديرش هااكا هماام!..