كلي بكلك مغرم 🩶⛓️

كلي بكلك مغرم 126

كُـلـي بـِكـلـكِ مُــغـرم ⛓️🩶
الكاتبة:Roumaissa Asma 🍂
الحلقة126:

"حُبُكِ قَدْ سَكَنَ الْأَضْلَاعَ
فَأَصْبَحَ مِنْهَا الْقَلْبُ رَهِينَا"🐆❤️

الطبيبة تنهدت و حركت راسها بالايجاب  راحت جابت دوزانها لي تسحقهم و بدات تفحص فيها مخلية ريام راح تزيد شوية و تنفجر عليهم بين زوج خاصة كي شافتو يشوف فيهم عادي ماحشم ما قال نهبط عيني و نخليها على راحتها ..فات شوية وقت و كملت الطبيبة فحصها نحات قفازتها الطبية رماتهم و نطقت موجهة كلامها لهمام..

الطبيبة:مسيو همام راح نوصفلها شوية فيتامينات من المستحسن تبداهم اليوم ..

همام:من غير الفيتامينات واش لازملها؟..

الطبيبة:خااصها الراحة ماترفدش حاجات ثقيلة ماتجريش ماتجهدش روحها بزاف تتهلا في ماكلتهاا تبع عند طبيبة نسائية باش تبقا متبعة حالتها و اذا نويتو على حمل ثاني هي تساعدكم و تقوللكم الوقت المناسب ليه ..

همام شاف فريام بنص عين و حرك راسو بالايجاب مجاوبها..

همام:ان شاءالله..هذا مكان؟..

الطبيبة:حاليا هذا مكاان نتمنى مايصراو حتى مضاعفات ليها باش مانولوش في حكاية وحدوخرا ..

همام:كلشي راهو لاباس ياك؟..

الطبيبة:ويي حمدلله ياربي..

همام:مليح اكتبي الفيتامينات هاذو نروح نجيبهم ..تقدر تخرج اليوم؟..

الطبيبة:لا حتى لغدوة احسن باش نتأكدو بلي كلشي راهو بخير ..

حركلها راسو بالايجاب و شد عليها الورقة لي مدتهالو خرج لبرا لقا اديب رايح جاي مزالو يحكي وحدو راح لعندو خبطو على كتافو حتى فيقو من سهوتو و تلفت ليه يشوف واش كاين.. مدلو الورقة و نطق ..

همام:هاك رووح لأقرب فارمسي اشري هاذوو و ماطولش..

اديب:مزالكم مطولين هنا..

همام:لا جيبهملي و روح لدار من غدوة تقدر تخرج..

اديب:ونخليك وحدك!..

همام:متخافش ماكان والوو غدوة نروح لدار ..

اديب:ان شاءالله تفروها بيناتكم بلخف باش جو تخطبوولي ..

همام:روح قبببلما نبدا بيك نتا و الخطبة تاعككك..

فلت من يدو بسرعة قبلما يشدو بين يديه و راح يجري ركب فطونوبيلتو و قلع رايح للفارماسي شرا واش قالو و رجع لعندو مدهملو و راح لدار بعدما وصاه باش يتهلى في روحو و يجاوب عليه فالتلفون اذا عيطلوو باش مايبقاش بالو معاه ..

أما همام غير ودعو عاود دخل لعندها لداخل مدلها الفيتامين على حسب واش قاتلو الطبيبة و راح قعد لاهي بتلفونو بينما هي كانت راقدة ..

لحقت لعشيا و طااح الليل جابولها العشاء وكلها بنفس الطريقة تاع صباح بسييف باش كمللها الطبسي و خلاتو يوكلهولها و بعد تأثير الدواء لي شرباتو و التعب لي نال منها عاودت ولات رقدت بلا ماتحس مخلياتو قاعد يراقب فيها حتى داتو عينو مام هو و رقد وهو قاعد على الكرسي ..