كلي بكلك مغرم 🩶⛓️

كلي بكلك مغرم 🩶🌪74

كُـلـي بـِكـلـكِ مُــغـرم ⛓️🩶
الكاتبة:Roumaissa Asma 🍂
الحلقة74:

"حُبُكِ قَدْ سَكَنَ الْأَضْلَاعَ
فَأَصْبَحَ مِنْهَا الْقَلْبُ رَهِينَا"🐆❤️

همام طلع حاجب و نزل الثاني مستغرب من كلامها لي جاه غريب نوعا ما لأنو مكانش داير في بالو بلي راح تخمم من الجهة هاذي لي غفل عليها هوو بالذات موضوع الدراري و الحمل ماجاااه لا على البال ولا على الخاطر كي لقاها تخمم فيه جاتو حاجة بيزااغ لأنو هو بروحو ماعلابالوش واش هو رايو فهاذ الموضوع ..

فاتو ثواني عديدة من الصمت كان استغلهم و هو يحاول يجاوب نفسو على سؤال تكررلو بزااف مراات بصح ماعرفش واش هو الجواب مخو ماعطالو حتى جواب مقنع يقنعو بيه فالوقت لي كان هو يخمم فجوابو هي كانت تتخيل في حياتها كيفاش راح جوزها وهي معطوبة من شي بلاصة هدوءو بانلها كيف الهدوء لي يكون ماقبل العاصفة و صمتو مازاد إلا فتوترها و خوفها من ردة فعلوو ..

غير شافتو تحرك جات راح تخطي خطوة للور باش تبعد حتى شافتو شدها من يدها و جرها معاه بهدوء قعدها على الفوتاي وقعد قدامها ناطق بصوت هادي و هو يشوف فيها بنظرات هادية مخليها مستغربة من هدوءو لي مكانتش متوقعاتو..

همام:مكيش حابة جيبي ولاد..؟

ريام:يعنييي ماشي هااكا ..على الاقل حاليااا..

همام:ماخممتش فالموضوع صراحة..مجاش لبالي كامل..

ريام:مافهمتش اذا لازم نرتاح من هدوءك هذا ولا لا..

همام:بغض النظر على رايك لي مشيتيه و القرار لي ديتيه بلا شوااري بصح من حقك تقرري قرار كيما هذا و مراحش نحاسبك عليه لأنو نتي لي راح تحمليه تسع شهور و تولديه و تتعبي عليه ..ممكن خدمتي الوحيدة هي نحطو فيك و نوفرلك واش تسحقي فالفترة هاذيك!

ريام تجاهلت كلامو الاخير لي جابلها الضحك و جاوباتو بدهشة ماشي مصدقة طريقة تعاملو معاها فهاذ الموضوع..

ريام:سبحان الله..ماكنتش متوقعةة ردة فعلك هاااذي يااناس تزوجت براجل متفهم مااشي متعصببب يخمم فياا ههه ..

همام:متعصب فبعض القرارات غير مايغركش هدوئي..

ريام:المهم ههه شفتك رجعتو طفل حتى قبلما مايولد..

همام:راني حاب طفل..يكونو عندو عيون كيما عيونك متميزين بحِدتهم و نظرة الثقة و الشراسة لي فيهم ..يكون كيما باباه فكل صفاتو يخدم نفس خدمتي باش نولي نعول عليه في كبري يورثني و يولي خليفتي..

ريام:ههه تبانلي مااكرهتش من العسكر لي دايمن مقابلهم كنت حاطااتك راح تحب طفلة باش تعيش حااجة جديدة..لأنو في خدمتك كاين غير الرجاال و زيد خووك ولد يعنييي خاصك طفلة تكسرلك الروتين..

همام:و نتي راكي حابة طفلة على حساب كلامك..

ريام:ايييه و تكون تتشبهلي لياا ..

همام:مالا جيبي توام طفلة و طفل..واحد ليا و وحدة ليك..

ريام:هههه نجيب نجيب بصح مزاال ..

همام:علاش مكيش حابة و قررتي القرار هذا؟..

ريام:ماعلاباليش من الاحسن الواحد حتى يفوتوو شهوور باش يقرر.. على الاقل 10 شهوور من الزوااج نكون تعرفت عليك و تعرفت عليا ملييح باش مانلقاوش صعوبة فتربيتهاا ..

همام:تربيتوو ..

ريام:تربيتهم ههه ياك توام..

همام:ان شاءالله ..وقتما تكوني مستعدة قوليلي..

ريام:ان شاءالله..نروح نشوفهم اذا كملوو العشاا جعتتت ..

ناضت من قدامو و هبطت للتحت مخلياتو قاعد بنفس طريقتو لي كان قاعد بيها حاجة ماتحركت فيه من غير قبضة يدو لي تزيرت و نفسو السخون لي زفرو من نيفو لبرا متحكم بأعصابو لي ثارو بعدما تخلوا مع نفسو كيفاش قدر يتحكم فعصبيتو قدامها ماعرفش..

كان يكذب غير على روحو وعليها كل الكلام لي قالوو قلبو كان قايلو عكسو خاصة كي بداو يتناقشو على جنس البيبي لي حابين يجيبوه جاتو رغبة كبيييرة باش يكون عندو واحد كان و راهو و مزااالو حاب يكون عندو وليدو يحمل اسمو و يووليي خليفتو كيما قاللها..

كان يصيب دووكا يولي عندو واحد يطبق معاه خططو لي كان راسمهم في راسو كأب مع وليدو بصح فنفس الوقت كان مؤيد قرارها و من الطبيعي يقبل بيه و هو ماعلابالوش واش راهي راسمتلهم الدنيا اومبعد .. ماعلابالوش واش قادر يصرا بعد يومين ولا سمانة ولا شهر فمراحش يقدر يغامر بقرار عشوائي كيما هذا و يخليها تحمل و يخلو طفل صغير يتلاوح مابيناتهم يعني من المنطقي يقبل بقرارها و يقبل بيه بسيف عليه رغم انو راهو حاب عكسو بصح الظروف جبراتو باش يقبل بالقرار هذا رغم انو مكانش راضي عليه كليا!...